পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি জম্মু আৰু কাশ্মীৰত নিয়ন্ত্ৰণ ৰেখাৰ সমীপৱৰ্তী গুৰেজ উপত্যকাত সেনা আৰু বিএছএফ জোৱানৰ সৈতে দিৱালী উদযাপন কৰে৷ তেওঁ তাত প্ৰায় দুঘণ্টা সময় কটায়৷ সীমান্তত জোৱানৰ সৈতে এয়া প্ৰধানমন্ত্ৰী মোদীৰ ক্ৰমাগত চতুৰ্থটো দিৱালী উদযাপন৷

প্ৰধানমন্ত্ৰীয়ে জোৱানসকলক মিঠাই খোৱাই দিৱালীৰ শুভেচ্ছা জ্ঞাপন কৰে৷

জোৱানসকলক সম্বোধন কৰি তেওঁ কয় যে সকলোৰে দৰে তেঁৱো পৰিয়ালৰ সৈতে দিৱালী উপযাপন কৰিব বিচাৰে৷ সেইবাবেই তেওঁ সুৰক্ষা বাহিনীৰ জোৱানসকলৰ মাজলৈ আহিছে, কাৰণ জোৱানসকলক প্ৰধানমন্ত্ৰীয়ে নিজৰ পৰিয়াল হিচাপে গণ্য কৰে৷

তেওঁ কয় যে জোৱানসকলৰ সৈতে সময় পাৰ কৰিলে তেওঁ নতুন উৎসাহ-উদ্দীপনা লাভ কৰে৷ প্ৰতিকূল পৰিবেশৰ মাজতো জোৱানসকলে দেশবাসীৰ বাবে অনেক ত্যাগ, কষ্ট স্বীকাৰ কৰাৰ বাবে প্ৰধানমন্ত্ৰীয়ে তেওঁলোকক ভূয়সী প্ৰশংসা কৰে৷
অনুষ্ঠানত উপস্থিত থকা জোৱানসকলে নিয়মীয়াকৈ যোগাসন কৰে বুলি জানিব পাৰি তেওঁ আনন্দিত বুলি উল্লেখ কৰি প্ৰধানমন্ত্ৰীয়ে কয় যে যোগাসনৰ ফলত তেওঁলোকৰ শক্তি-সামৰ্থ বৃদ্ধি পাব আৰু মানসিকভাৱে দৃঢ় হ’ব৷ সুৰক্ষা বাহিনীৰ পৰা অৱসৰ গ্ৰহণ কৰা জোৱানসকল একোগৰাকী উত্তম যোগা প্ৰশিক্ষক হ’ব পাৰে বুলিও তেওঁ কয়৷

নিয়মীয়া কৰ্তব্য পালন অধিক উজু আৰু নিৰাপদ কৰিবলৈ জোৱানসকলক উদ্ভাৱনীমূলক কৌশল আৱিষ্কাৰ কৰাৰ ক্ষেত্ৰতো প্ৰধানমন্ত্ৰীয়ে তেওঁলোকক উৎসাহিত কৰে৷ তেওঁ উল্লেখ কৰে যে শ্ৰেষ্ঠ উদ্ভাৱনকাৰীক এতিয়া চৰকাৰী স্বীকৃতি প্ৰদান কৰা হয় আৰু সেনা দিৱস, নৌসেনা দিৱস আৰু বায়ুসেনা দিৱসত বঁটা আগবঢ়োৱাৰ ব্যৱস্থা কৰা হৈছে৷

প্ৰধানমন্ত্ৰীয়ে কয় যে সশস্ত্ৰ বাহিনীৰ কল্যাণ আৰু উন্নতিৰ বাবে চৰকাৰ সম্পূৰ্ণৰূপে দায়বদ্ধ৷ এই সন্দৰ্ভত তেওঁ দশক দশক ধৰি নিষ্পত্তিবিহীনভাৱে থকা ‘এক পদবী, এক পেঞ্চন’ আঁচনি ৰূপায়নৰ কথা উল্লেখ কৰে৷

স্থলসেনা বাহিনীৰ মূৰব্বী জেনেৰেল বিপিন ৰাৱটৰ লগতে আন জেষ্ঠ সেনা বিষয়াসকল অনুষ্ঠানত উপস্থিত থাকে৷
পৰিদৰ্শনকাৰীৰ টোকাত প্ৰধানমন্ত্ৰীয়ে লিখিছে—নিজৰ প্ৰিয়জনৰ পৰা নিলগত থাকি মাতৃভূমিক নিৰাপদে ৰখাটো সৰ্বশ্ৰেষ্ঠ ত্যাগৰ প্ৰতীক৷ সীমান্তত নিয়োজিত দেশৰ প্ৰতিজন জোৱান আমাৰ সাহস আৰু শক্তিৰ প্ৰতীক৷

আপোনালোকৰ সৈতে দিৱালী উদযাপনৰ মই এক সুযোগ লাভ কৰিলো৷ সীমান্তত পহৰাৰত সাহসী সৈনিকসকলৰ বাবেই আজি কোটি কোটি দেশবাসীৰ ঘৰত আশাৰ চাকি জ্বলি উঠিছে৷

‘নিউ ইণ্ডিয়া’ৰ সপোন সাৰ্থক কৰিবলৈ আমি সকলোৱে ঐক্যবদ্ধ হৈ কাম কৰা উচিত৷ জোৱানসকলো এই সপোনৰ এক গুৰুত্বপূৰ্ণ অংশ৷ আটাইলৈ দেৱালীৰ বহুত বহুত শুভেচ্ছা জনালো৷”

****

AKT/NT/MS