পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি অছলোত নৰৱে’ৰ প্ৰধানমন্ত্ৰী মাননীয় জোনাছ গহৰ ষ্ট’ৰেৰ সৈতে দ্বিপাক্ষিক আলোচনাত মিলিত হয়। আজি পুৱা অছলো বিমানবন্দৰত উপস্থিত হোৱাৰ সময়ত ভাৰত আৰু নৰৱেৰ মাজৰ ঘনিষ্ঠ সম্পৰ্কৰ  বিশেষ চিহ্ন হিচাপে প্ৰধানমন্ত্ৰী ষ্ট’ৰে তেওঁক উষ্ম আদৰণি জনায়।

নেতাদ্বয়ে বাণিজ্য আৰু বিনিয়োগ, ভাৰত-ই এফ টি এ বাণিজ্য আৰু অৰ্থনৈতিক অংশীদাৰিত্ব চুক্তি (টি ই পি এ), জলবায়ু কাৰ্য্য তথা শক্তি পৰিৱৰ্তন, নীল অৰ্থনীতি আৰু মহাসাগৰীয় প্ৰশাসন, গৱেষণা আৰু উচ্চ শিক্ষা, উত্তৰ মহাসাগৰ আৰু মেৰু সহযোগিতা, মহাকাশ আৰু প্ৰতিভাৰ গতিশীলতাৰ বিষয়ে অনুসৰণ কৰি ভাৰত-নৰৱে’ সম্পৰ্কৰ সম্পূৰ্ণ পৰিসৰৰ পৰ্যালোচনা কৰে। তেওঁলোকে সুস্থিৰতা আৰু সেউজ বিকাশৰ প্ৰতি তেওঁলোকৰ অংশীদাৰী দায়বদ্ধতাক গুৰুত্ব দি সম্পৰ্কক সেউজ কৌশলগত অংশীদাৰিত্বলৈ উন্নীত কৰিবলৈ সন্মতি প্ৰকাশ কৰে ।

দুয়োগৰাকী নেতাই অৰ্থনৈতিক আৰু বাণিজ্যিক অংশীদাৰিত্ব বৃদ্ধিৰ বৃহৎ সম্ভাৱনা আছে বুলি সন্মতি প্ৰকাশ কৰে। প্ৰধানমন্ত্ৰীয়ে ভাৰতত নৰৱে’ৰ উদ্যোগসমূহৰ অধিক বিনিয়োগক আদৰণি জনায়। দুয়োগৰাকী নেতাই ২০৩০ চনৰ ভিতৰত ভাৰত আৰু নৰৱে’ৰ মাজত বৰ্তমানৰ বাণিজ্য দুগুণ কৰাৰ লক্ষ্যৰ ওপৰত গুৰুত্ব আৰোপ কৰে আৰু টিইপিএৰ অধীনত ১০০বিলিয়ন আমেৰিকান ডলাৰৰ বিনিয়োগৰ প্ৰতিশ্ৰুতি পূৰণ কৰাৰ লগতে ভাৰতত এক নিযুত চাকৰি সৃষ্টি কৰিবলৈ বিভিন্ন খণ্ডৰ গতিশীল সম্পৰ্কৰ দিশত কাম কৰিবলৈ ব্যৱসায়িক প্ৰতিনিধিসকলক উৎসাহিত কৰে।

নেতাদ্বয়ে তেওঁলোকৰ দলসমূহক সামুদ্ৰিক পৰিৱেশ তন্ত্ৰ সুৰক্ষা, জাহাজ নিৰ্মাণ, সেউজ জাহাজ পৰিবহণ, সুৰংগপথ আৰু আন্তঃগাঁথনি, মহাকাশ, এআই, ৰবটিক্স, চাইবাৰ সুৰক্ষা, সাগৰীয় প্ৰশিক্ষণ, মীন পালন আৰু জলজ পালনকে ধৰি নীলা অৰ্থনীতিত সহযোগিতা গভীৰ কৰাৰ দায়িত্ব দিয়ে। তেওঁলোকে ইউ এন চি এল অ’ এছ নীতি পুনৰ নিশ্চিত কৰে আৰু ভাৰত-প্ৰশান্ত মহাসাগৰীয় পদক্ষেপত নৰৱে’ৰ যোগদানক আদৰণি জনায়। প্ৰধানমন্ত্ৰী মোদীয়ে ফ্ৰান্সত অনুষ্ঠিত হ’বলগীয়া ভাৰত ইন’ভেটছ ২০২৬ ত অংশগ্ৰহণ কৰিবলৈ নৰৱে’ক আমন্ত্ৰণ জনায়। তেওঁ দুয়োখন দেশৰ মাজত ষ্টাৰ্ট-আপ উদ্ভাৱন হাব আৰু গ্ৰীণ ইনোভেচন হেকাথন স্থাপনৰ পৰামৰ্শও দিয়ে।

পৰিৱেশ আৰু নৱীকৰণযোগ্য শক্তিৰ সহযোগিতাৰ ওপৰত গুৰুত্ব আৰোপ কৰি নেতা দুগৰাকীয়ে কাৰ্বন কেপচাৰ, ইউটিলাইজেচন এণ্ড ষ্ট’ৰেজ (চিচিইউএছ), অফছ’ৰ ৱিণ্ড আৰু ভাৰতত পৰিষ্কাৰ শক্তি প্ৰকল্পসমূহত নৰৱে’ৰ বৃহৎ বিনিয়োগৰ দৰে বিশেষ প্ৰযুক্তিৰ ক্ষেত্ৰত অধিক সহযোগিতাৰ আহ্বান জনায়।

নেতাসকলে পৰিৱেশগতভাৱে দায়বদ্ধ অনুশীলনসমূহ পুনৰ নিশ্চিত কৰি উত্তৰ মেৰু গৱেষণা আৰু পৰিবহন শক্তিশালী কৰিবলৈ সন্মত হয়। তেওঁলোকে নৱীকৰণযোগ্য শক্তি, মহাসাগৰ, জলবায়ু, স্বাস্থ্য, গুৰুত্বপূৰ্ণ খনিজ, উদীয়মান প্ৰযুক্তি আৰু তথ্য প্ৰযুক্তিকে ধৰি গৱেষণা তথা উদ্ভাৱনৰ ক্ষেত্ৰত যৌথ কামৰ ওপৰত গুৰুত্ব আৰোপ কৰে। উচ্চ শিক্ষাৰ ক্ষেত্ৰত, তেওঁলোকে যুটীয়া ডিগ্ৰী কাৰ্যসূচী, অৰ্হতাৰ পাৰস্পৰিক স্বীকৃতি আৰু শিক্ষাৰ্থী তথা শিক্ষকসকলৰ গতিশীলতা অন্বেষণ কৰিবলৈ একমত হয়।

তেওঁলোকে বহুপাক্ষিক মঞ্চত সহযোগিতাৰ বিষয়েও আলোচনা কৰে আৰু পাৰস্পৰিক স্বাৰ্থৰ গুৰুত্বপূৰ্ণ আঞ্চলিক তথা গোলকীয় বিষয়সমূহৰ ওপৰত মতামত বিনিময় কৰে। নৰৱে’ৰ প্ৰধানমন্ত্ৰীগৰাকীয়ে সংস্কাৰিত ৰাষ্ট্ৰসংঘৰ নিৰাপত্তা পৰিষদত ভাৰতৰ স্থায়ী সদস্যপদৰ বাবে নৰৱে’ৰ সমৰ্থনৰ কথা দোহাৰে।

নেতাদুগৰাকীয়ে সন্ত্ৰাসবাদক নিন্দা কৰে আৰু এই সমস্যাৰ মোকাবিলা কৰিবলৈ সমন্বিত বিশ্বব্যাপী পদক্ষেপ গ্ৰহণৰ আহ্বান জনায়।

তেওঁলোকে প্ৰতিৰক্ষা সহযোগিতা আৰু প্ৰতিৰক্ষা ঔদ্যোগিক সহযোগিতাৰ সম্ভাৱনাৰ কথা উল্লেখ কৰে, ডিজিটেল ৰাজহুৱা সামগ্ৰীৰ ক্ষেত্ৰত তৃতীয় দেশৰ সহযোগিতা অন্বেষণ কৰিবলৈ সন্মত হয় আৰু ডিজিটেল পৰিৱৰ্তনক চালিত কৰিবলৈ ডিজিটেলাইজেশ্যনৰ ওপৰত এক যুটীয়া কৰ্মগোষ্ঠী স্থাপন কৰিবলৈ মন্ত্ৰালয়সমূহক দায়িত্ব দিয়ে।

প্ৰধানমন্ত্ৰী মোদীয়ে প্ৰধানমন্ত্ৰী ষ্ট’ৰ আৰু নৰৱে’ৰ জনসাধাৰণক তেওঁলোকৰ উষ্ম আতিথ্যৰ বাবে ধন্যবাদ জ্ঞাপন কৰে। তেওঁ প্ৰধানমন্ত্ৰী ষ্ট’ৰক ভাৰত ভ্ৰমণ কৰিবলৈ আমন্ত্ৰণ জনায়। দুয়োগৰাকী নেতাই উচ্চ পৰ্যায়ৰ বিনিময়ৰ গতি বজাই ৰাখিবলৈ সন্মত হয়।

***

MJPS/SS/VJ/MK