পি এম ইণ্ডিয়া

সক্ৰিয় প্ৰশাসন আৰু সময়বদ্ধ ৰূপায়নৰ বাবে আইচিটি-ভিত্তিক, বহুমুখী মঞ্চ ‘প্ৰগতি’ৰ মাধ্যমেৰে প্ৰধানমন্ত্ৰী শ্ৰী নৰেন্দ্ৰ মোদীয়ে আজি ২৭সংখ্যক বৈঠকত অংশ লয়৷

২৬সংখ্যক প্ৰগতি বৈঠকত ১১ লাখ কোটিৰ মুঠ বিনিয়োগ প্ৰকল্পৰ এক সংমিশ্ৰিত সমীক্ষা হোৱা দেখা গৈছে৷ সকলো ক্ষেত্ৰত ৰাজহুৱা অভিযোগৰ সমাধানো নিৰীক্ষণ কৰা হৈছে৷

আজি ২৭সংখ্যক বৈঠকত প্ৰধানমন্ত্ৰীয়ে ৰে’লৱে, পথ আৰু শক্তি খণ্ডৰ ৮টা পৰিকাঠাম প্ৰকল্পৰ অগ্ৰগতিৰ বুজ লয়৷ এই প্ৰকল্পসমূহ বিহাৰ, ঝাৰখণ্ড, চত্তীশগড়, মধ্য প্ৰদেশ, হিমাচল প্ৰদেশ, উত্তৰ-প্ৰদেশ, উত্তৰাখণ্ড, মহাৰাষ্ট্ৰ, উৰিষ্যা, চণ্ডীগড়, অন্ধ্ৰ প্ৰদেশ, দিল্লী, গুজৰাট, ৰাজস্থান, পশ্চিম বংগ, ছিকিম আৰু অৰুণাচল প্ৰদেশকে ধৰি বিভিন্ন ৰাজ্যত বিয়পি আছে৷

প্ৰধানমন্ত্ৰীয়ে নতুন চিকিৎসা মহাবিদ্যালয় স্থাপন প্ৰকল্পৰ সঠিক ৰূপায়নৰ অগ্ৰগতি পৰ্যবেক্ষণ কৰে৷ কেন্দ্ৰীয় চৰকাৰে দেশৰ স্বাস্থ্য খণ্ডৰ উন্নয়নৰ বাবে কেইবাটাও গুৰুত্বপূৰ্ণ পদক্ষেপ গ্ৰহণ কৰিছে বুলি উল্লেখ কৰি প্ৰধানমন্ত্ৰীয়ে কয় যে স্বাস্থ্য খণ্ডৰ আন্তঃগাথনিৰ ক্ষিপ্ৰ উন্নয়ন হোৱা উচিত৷

প্ৰধানমন্ত্ৰীয়ে কয় যে ২০১৮ৰ ১৪ এপ্ৰিলৰ পৰা ৫ মে’লৈ চলা গ্ৰাম স্বৰাজ অভিযানৰ প্ৰথম পৰ্যায়ে দেশৰ ১৬,০০০ গাঁওত কেন্দ্ৰীয় চৰকাৰৰ ৭খন গুৰুত্বপূৰ্ণ আঁচনি ৰূপায়নত বৃহৎ সাফল্য অৰ্জন কৰিছে৷ গ্ৰাম স্বৰাজ অভিযানৰ দ্বিতীয় পৰ্যায় বৰ্তমান আকাংক্ষিত জিলাৰ ৪০ হাজাৰৰো অধিক গাঁওত চলি আছে৷ অহা ১৫ আগষ্টৰ পূৰ্বে সৰ্বোত্তম ফলাফল লাভৰ বাবে তেওঁ ৰাজ্য আৰু কেন্দ্ৰীয় চৰকাৰৰ সকলো বিষয়-ববীয়াক নিষ্ঠা সহকাৰে কাম কৰিবলৈ আহ্বান জনায়৷

প্ৰধানমন্ত্ৰীয়ে সৌভাগ্য যোজনাৰ অধীনত এই পৰ্যন্ত লাভ কৰা অগ্ৰগতিত সন্তুষ্টি ব্যক্ত কৰে আৰু কয় যে নিৰ্ধাৰিত সময়ছোৱাৰ ভিতৰত ৪কোটি পৰিয়ালক বিদ্যুৎ সংযোগ প্ৰদানৰ উচ্চাভিলাষী লক্ষ্য পূৰণ কৰিবলৈ যথা-সম্ভৱ সকলো প্ৰচেষ্টা গ্ৰহণ কৰা উচিত৷

***

AKT/VJ/SK/MS