পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ফ্ৰান্সৰ ইভিয়ানত অনুষ্ঠিত জি৭ সন্মিলনত “কৃত্ৰিম বুদ্ধিমত্তাৰ এক নিৰাপদ, দ্ৰুত আৰু দক্ষ সূচনা নিশ্চিতকৰণ” শীৰ্ষক আলোচনাচক্ৰত ভাষণ প্ৰদান কৰে।

প্ৰধানমন্ত্ৰীয়ে গুৰুত্ব দি কয় যে কৃত্ৰিম বুদ্ধিমত্তা মানৱ সভ্যতাৰ দিশ পুনৰ্নিৰ্ধাৰণ কৰাৰ সম্ভাৱনা থকা এক পৰিৱৰ্তনশীল শক্তি হোৱাৰ লগতে ই মানুহক শক্তিশালীও কৰিব লাগিব। তেওঁ ব্যাখ্যা সহকাৰে কয় যে এই বৃহৎ চিন্তাধাৰাৰ বাবেই ভাৰতে শেহতীয়াকৈ এআই ইম্পেক্ট সন্মিলন আয়োজন কৰিছিল। এআইৰ বাবে ভাৰতৰ মানৱ-কেন্দ্ৰিক বা মানৱ দৃষ্টিভংগীৰ ওপৰত গুৰুত্ব আৰোপ কৰি তেওঁ কয় যে এই প্ৰযুক্তি অন্তৰ্ভুক্তি, নিৰাপত্তা আৰু ৰাজহুৱা কল্যাণৰ নীতিত আধাৰিত হ’ব লাগিব।

ভাৰতে সদায় চাইবাৰ ক্ষেত্ৰখনক এক বিশ্বজনীন ৰাজহুৱা কল্যাণ হিচাপে গণ্য কৰি আহিছে বুলি উল্লেখ কৰি প্ৰধানমন্ত্ৰীয়ে গুৰুত্ব আৰোপ কৰে যে গণতান্ত্ৰিক দেশসমূহৰ এআই আৰ্হিসমূহৰ প্ৰৱেশাধিকাৰ থাকিব লাগিব যিয়ে তেওঁলোকৰ গুৰুত্বপূৰ্ণ তথ্য আন্তঃগাঁথনি সুৰক্ষিত কৰিব পাৰে আৰু চাইবাৰ ভাবুকিৰ সৈতে মোকাবিলা কৰাত সহায় কৰিব পাৰে। তেওঁ এআই বিকাশৰ বাবে এক সংহত দৃষ্টিভংগীৰ বাবে আহ্বান জনায় য’ত সুৰক্ষা, গতি আৰু দক্ষতা একেলগে মোকাবিলা কৰিব পাৰি। এই সন্দৰ্ভত তেওঁ চাৰিটা পৰামৰ্শ আগবঢ়ায়ঃ এআই প্ৰণালীবোৰ আৰ্হিৰ ফালৰ পৰা নিৰাপদ হ’ব লাগে; এআই প্ৰয়োগৰ সৈতে সাধাৰণ মান, পৰীক্ষাৰ পৰিকাঠামো আৰু নিয়ন্ত্ৰক নিৰ্দেশনা থাকিব লাগিব; ডিপফেক, ভুল তথ্য আৰু চাইবাৰ জালিয়াতিৰ সৈতে মোকাবিলা কৰিবলৈ ফলপ্ৰসূ গোলকীয় সহযোগিতা থাকিব লাগিব আৰু এক অন্তৰ্ভুক্তিমূলক বিশ্ব নিশ্চিত কৰিবলৈ এআইৰ সুবিধাসমূহ গোলকীয় দক্ষিণৰ দেশসমূহত উপনীত হ’ ব লাগিব।

প্ৰধানমন্ত্ৰীয়ে সামৰণিত কয় যে এআই-এ মানৱীয় সম্ভাৱনাৰ সম্প্ৰসাৰণ ঘটাব লাগিব, মানৱীয় পচন্দক শক্তিশালী কৰিব লাগিব আৰু মানৱীয় মৰ্যাদা সুৰক্ষিত কৰিব লাগিব আৰু উল্লেখ কৰে যে ভাৰতে এই উদ্দেশ্যসমূহৰ প্ৰসাৰৰ বাবে অংশীদাৰসকলৰ সৈতে কাম কৰি যাব।

******

MJPS/SS/ST/HS