পি এম ইণ্ডিয়া

বিশিষ্ট ব্যক্তিসকল,

ব্ৰিকছ ব্যৱসায়িক সমূদায়ৰ নেতাসকল,

উদ্ভাৱক আৰু বন্ধুসকল,

নমস্কাৰ!

ব্ৰিকছ ব্যৱসায়িক ফ’ৰামলৈ আপোনালোক সকলোকে আন্তৰিক স্বাগতম জনাইছোঁ।

এই বছৰ আমি ব্ৰিকছৰ ২০ বছৰীয় প্ৰতিষ্ঠা দিৱস উদযাপন কৰিছোঁ। ২০০৬ চনত যেতিয়া এই গোটটো আৰম্ভ হৈছিল, তাত কেৱল চাৰিখন দেশ আছিল। আজি ব্ৰিকছ আৰু ব্ৰিকছৰ অংশীদাৰসকলক সামৰি আমাৰ ২১খন দেশৰ এটা পৰিয়াল গঢ় লৈ উঠিছে।

আজি ব্ৰিকছৰ দেশসমূহে বিশ্বৰ ৫০ শতাংশ জনসংখ্যা, ৪০ শতাংশ জিডিপি আৰু ২৫ শতাংশতকৈও অধিক বাণিজ্যক প্ৰতিনিধিত্ব কৰে। কেৱল ইমানেই নহয়, এই বছৰবোৰত যিবোৰ সময়ত বিশ্বৰ জিডিপি প্ৰায় আঢ়ৈ গুণ বৃদ্ধি পাইছে, তাৰ বিপৰীতে ব্ৰিকছ দেশসমূহৰ একত্ৰিত জিডিপি প্ৰায় চাৰে চাৰি গুণ বৃদ্ধি পাইছে। অৰ্থাৎ, ব্ৰিকছৰ অৰ্থনৈতিক শক্তি বিশ্বৰ তুলনাত প্ৰায় দুগুণ গতিৰে বৃদ্ধি পাইছে।

ব্ৰিকছৰ দেশসমূহ গোলকীয় উদ্ভাৱন আৰু সমাধানৰ বাবে গুৰুত্বপূৰ্ণ কেন্দ্ৰ হৈ পৰিছে। তৃণমূল পৰ্যায়ৰ পৰা আৰম্ভ কৰি অগ্ৰণী প্ৰযুক্তিলৈকে, আমাৰ দেশসমূহত উদ্ভাৱনৰ নতুন সম্ভাৱনাই ৰূপ লাভ কৰিছে। ব্ৰিকছৰ বৰ্ধিত পৰিসৰ, গতি আৰু আশাবাদ আমাৰ মাজত স্পষ্টকৈ দেখা গৈছে। ভাৰতত অনুষ্ঠিত এই ফ’ৰামটো হৈছে এতিয়ালৈকে অনুষ্ঠিত আটাইতকৈ বৃহৎ ব্ৰিকছ ব্যৱসায়িক ফ’ৰাম।

বন্ধুসকল,

ভাৰতৰ ব্ৰিকছ সভাপতিত্বৰ মূল বিষয়বস্তু হৈছে— “স্থায়িত্ব, উদ্ভাৱন, সহযোগিতা আৰু বহনক্ষমতাৰ বাবে নিৰ্মাণ”।

যোৱা ১২টা বছৰত ভাৰতে এই মন্ত্ৰক নিজৰ অৰ্থনৈতিক আৰু বাণিজ্য নীতিৰ আধাৰ কৰি লৈছে। স্থায়িত্বৰ কথা ক’বলৈ গ’লে, ভাৰতে শক্তিৰ পৰা প্ৰযুক্তিলৈকে, যোগান শৃংখলাক অধিক বৈচিত্ৰময় আৰু বিশ্বাসযোগ্য কৰি তুলিছে। এই স্থায়িত্বৰে ফল যে গোলকীয় অনিশ্চয়তাৰ মাজতো ভাৰতে আজি বিকাশ আৰু সুস্থিৰতাৰ ভৰসা প্ৰদান কৰিছে।

আমি পথ, ৰে’লৱে, বন্দৰ আৰু বিমান বন্দৰসমূহ দ্ৰুতগতিত সম্প্ৰসাৰণ কৰি আছোঁ। ইয়াৰ লগতে জাহাজ নিৰ্মাণ, ছেমিকণ্ডাক্টৰ, কোৱাণ্টাম, গুৰুত্বপূৰ্ণ খনিজ আৰু জৈৱ প্ৰযুক্তিৰ দৰে কৌশলগত ক্ষেত্ৰসমূহত নতুন ক্ষমতা গঢ়ি তুলিছোঁ। এইবোৰ ক্ষেত্ৰত ভাৰত বিশ্বজোৰা ব্যৱসায়ৰ বাবে নতুন সুযোগৰ কেন্দ্ৰ হৈ পৰিছে। সেয়েহে ভাৰতত প্ৰস্তুত কৰক, ভাৰতৰ সৈতে উদ্ভাৱন কৰক আৰু বিশ্বৰ বাবে সম্প্ৰসাৰণ কৰক।

বন্ধুসকল,

আজি ভাৰতত এক ষ্টাৰ্টআপ বিপ্লৱ চলি আছে। ২ লাখতকৈও অধিক ষ্টাৰ্টআপ আৰু ১২০টাতকৈও অধিক ইউনিকৰ্নৰে ভাৰত আজি বিশ্বজনীন সমাধানৰ এক হাবত হৈ পৰিছে। ইয়াৰ এক আভাস আপোনালোকে “ব্ৰিকছ ভাৰত ইনোভেটছ এক্সপ’ত দেখিবলৈ পাব।

আমাৰ ষ্টাৰ্টআপসমূহে কৃত্ৰিম বুদ্ধিমত্তাৰ যোগেদি শিক্ষা আৰু স্বাস্থ্যসেৱাক ৰূপান্তৰিত কৰিছে, গ্ৰীন হাইড্ৰ’জেন আৰু বেটাৰীৰ ওপৰত কাম কৰিছে আৰু প্ৰতিৰক্ষা তথা মহাকাশ খণ্ডতো নতুন সীমা অতিক্ৰম কৰিছে। এতিয়া আমি ব্ৰিকছৰ মাধ্যমেৰেও এই বিশ্বমানৰ উদ্ভাৱনসমূহক বিশ্ব বজাৰলৈ লৈ যাব লাগিব।

বন্ধুসকল,

ভাৰতৰ উদ্ভাৱন কাহিনীৰ আন এটা বৈশিষ্ট্য হ’ল— জনসংখ্যাৰ পৰিসৰত উদ্ভাৱন। ভাৰতৰ ইউনিফাইড পেমেণ্টছ ইণ্টাৰফেচ (ইউপিআই)এ বৃহৎ জনসংখ্যাৰ পৰিসৰত বিত্তীয় অন্তৰ্ভুক্তি আৰু ডিজিটেল লেনদেনক নতুন গতি প্ৰদান কৰিছে।

আজি বিশ্বৰ ৫০ শতাংশ ৰিয়েল-টাইম লেনদেন এই প্ৰযুক্তিৰ যোগেদিয়েই হয়। আৰু এই ডিজিটেল স্তৰত নতুন সমাধান গঢ়ি তুলিবলৈ আমি উদ্যোগ আৰু ষ্টাৰ্টআপসমূহক এক মুকলি পৰিস্থিতিতন্ত্ৰ প্ৰদান কৰিছোঁ। আমি গৌৰৱান্বিত যে ভাৰতৰ এই বিশ্বমানৰ পৰিস্থিতিতন্ত্ৰক বহু দেশে আদৰি লৈছে। ব্ৰিকছ দেশসমূহৰ উদ্ভাৱকসকলেও এই অভিজ্ঞতাৰ আধাৰত নিজৰ দেশৰ বাবে নতুন সমাধান প্ৰস্তুত কৰিব পাৰে।

বন্ধুসকল,

আজি যেতিয়া বিশ্বত বাণিজ্যিক বাধা বৃদ্ধি পাইছে, ভাৰতে অৰ্থনৈতিক সেতু নিৰ্মাণ কৰিছে। ২০১৪ চনৰ পৰা আমি বিশ্বৰ প্ৰায় ৪০খন দেশৰ সৈতে মুক্ত বাণিজ্য চুক্তি সম্পন্ন কৰিছোঁ। ব্ৰিকছতো আমাৰ দৃষ্টিভংগী সেয়াই— বাধা হ্ৰাস কৰা আৰু ব্যৱসায়ৰ বাবে সুযোগ বৃদ্ধি কৰা।

সেয়েহে, আমাৰ অধ্যক্ষতাত আমি কৃষি, স্বাস্থ্য, দক্ষতা আৰু স্মাৰ্ট-গ্ৰিডৰ দৰে ক্ষেত্ৰসমূহত নতুন সহযোগিতা নেটৱৰ্ক গঢ়ি তুলিছোঁ। ষ্টাৰ্টআপ আৰু ক্ষুদ্র, লঘু তথা মজলীয়া উদ্যোগসমূহক বজাৰ আৰু বিত্তীয় সাহায্যৰ সৈতে সংযোগ কৰিবলৈ আমি ব্ৰিকছ ইনকিউবেটৰ নেটৱৰ্ক, ব্ৰিকছ এমএছএমই প’ৰ্টেল, আৰু ব্ৰিকছ ষ্টাৰ্টআপ ইনোভেচন ফাণ্ডৰ দৰে পদক্ষেপ গ্ৰহণ কৰিছোঁ।

এই সকলোবোৰ সহযোগিতা গাঁথনিৰ লাভ আপোনালোক সকলোৱে উঠাব পাৰে আৰু আমাৰ দেশসমূহৰ মাজত বিনিয়োগ আৰু প্ৰতিভাৰ আদান-প্ৰদান বৃদ্ধি কৰিব পাৰে।

বন্ধুসকল,

গোলকীয় বাণিজ্য তেতিয়াহে আগবাঢ়িব পাৰে যেতিয়া সামুদ্ৰিক পথসমূহ সুৰক্ষিত হয়, যোগান পথসমূহ মুকলি থাকে, আৰু নাবিকসকল সুৰক্ষিত হৈ থাকে। সেয়েহে, ভাৰত সামুদ্ৰিক যাতায়াতৰ স্বাধীনতা আৰু নাবিকসকলৰ সুৰক্ষাৰ দৃঢ় সমৰ্থক।

‘ব্ৰিকছ ৱিমেনছ ব্যৱসায়িক এলাইয়েন্স’-ও আমাৰ দৃষ্টিৰ এক গুৰুত্বপূৰ্ণ অংশ। আমি বিচাৰোঁ যে মহিলা উদ্যোগীসকলে আমাৰ বিকাশৰ কাহিনীক নেতৃত্ব দিয়ক। আমি অতি আনন্দিত যে ভাৰতত অনুষ্ঠিত এই এলাইয়েন্সৰ বৈঠকত প্ৰায় ২০০গৰাকী মহিলা ব্যৱসায়ী নেতাই অংশগ্ৰহণ কৰে।

বন্ধুসকল,

আজি যেতিয়া ব্ৰিকছে নিজৰ তৃতীয় দশকত প্ৰৱেশ কৰিছে, ব্ৰিকছ ব্যৱসায়িক কাউন্সিলৰ ওচৰত মোৰ আহ্বান থাকিব, আপোনালোকে ব্ৰিকছ দেশসমূহৰ মাজৰ শীৰ্ষ ১০টা বাণিজ্যিক বাধা আঁতৰাবলৈ এখন প্ৰতিবেদন প্ৰস্তুত কৰিব পাৰিবনে? আমি প্ৰতি বছৰে ১০০টা ব্ৰিকছ ষ্টাৰ্টআপক আন ব্ৰিকছ বজাৰত সম্প্ৰসাৰণৰ বাবে সহায় কৰিব পাৰোঁনে? আমি আমাৰ ব্যৱসায়সমূহৰ মাজত ১,০০০টা নতুন অংশীদাৰিত্ব গঢ়ি তুলিব পাৰোঁনে? এই তিনিটা মানদণ্ডত আমি প্ৰতি বছৰে আমাৰ অগ্ৰগতি পৰ্যালোচনা কৰিব লাগে।

আহক, ব্ৰিকছৰ আকাংক্ষাক কাৰ্যত আৰু সামূহিক শক্তিক বিশ্বজনীন সমাধানলৈ ৰূপান্তৰিত কৰোঁ। ব্ৰিকছ আগবাঢ়ক, আৰু বিশ্বকো আগবঢ়াই নিয়ক।

আপোনালোক সকলোকে বহুত বহুত ধন্যবাদ।

**********

MJPS/SS/ST/DB