পি এম ইণ্ডিয়া

কেন্দ্ৰীয় ক্ৰীড়া মন্ত্ৰী শ্ৰী মনসুখ মাণ্ডৱীয়া ডাঙৰীয়া, ক্ৰীড়া বিভাগৰ ৰাজ্যিক মন্ত্ৰী ভগ্নী ৰক্ষা খাড়ছে ডাঙৰীয়ানী, আপোনালোক সকলো যুৱ খেলুৱৈ, প্ৰশিক্ষক, অন্যান্য বিশিষ্ট অতিথি, অভ্যগতসকল।

আপোনালোকৰ মাজলৈ আহি মোৰ মনত আজি এক নতুন শক্তিৰ সঞ্চাৰ হৈছে। ইমানসংখ্যক পদক বিজয়ী একেলগে সমৱেত হোৱা আৰু সকলোৰে সৈতে একে সময়তে মত বিনিময় কৰাৰ সুযোগ পোৱাটো সাধাৰণ কথা নহয়। এয়া মোৰ বাবে অতি আনন্দদায়ক অনুভূতি।

আপোনালোক প্ৰতিগৰাকী যুৱ খেলুৱৈয়ে প্ৰমাণ কৰিছে যে আবেগ আৰু একাগ্ৰতাক যেতিয়া বিজয়লৈ ৰূপান্তৰিত কৰা হয়, তেতিয়া ই কেৱল পদকেই কঢ়িয়াই নানে, মুখমণ্ডলতো আনন্দৰ জ্যোতি বিয়পাই দিয়ে। স্বাভাৱিকতে, ইয়াৰ ফলত দেশৰো গৌৰৱ বৃদ্ধি পায়।

বন্ধুসকল,

আপোনালোকে ১৪০ কোটি দেশবাসীক গৌৰৱ অনুভৱ কৰাৰ সুযোগ প্ৰদান কৰিছে। কাৰণ, যদি আটাইতকৈ ডাঙৰ কোনো সাফল্য আছে, তেন্তে সেয়া হৈছে ত্ৰিৰংগাৰ সন্মান বৃদ্ধি কৰা। আপোনালোকে ত্ৰিৰংগাৰ গৌৰৱ বৃদ্ধি কৰিছে, ইয়াৰ মৰ্যাদা অধিক উচ্চ কৰিছে। সেয়েহে, আপোনালোকৰ সাফল্য কেৱল আপোনালোকৰ নিজৰ সাফল্য নহয়; এয়া দেশৰ কোটি কোটি নাগৰিকৰ সাফল্য। ভাৰতৰ সকলো জনসাধাৰণৰ হৈ মই আপোনালোক প্ৰতিগৰাকীকে পুনৰ আন্তৰিক অভিনন্দন জনাইছোঁ। একে সময়তে আপোনালোকৰ প্ৰশিক্ষক, সহায়ক কৰ্মচাৰী আৰু পৰিয়ালৰ সদস্যসকলকো আন্তৰিক অভিনন্দন জনাইছোঁ।

বন্ধুসকল,

আজি আমাৰ প্ৰাক্তন ৰাষ্ট্ৰপতি ড০ এ পি জে আব্দুল কালামৰো জন্ম বাৰ্ষিকী। তেওঁৰ জীৱন আৰু দূৰদৰ্শী চিন্তাধাৰা আমাৰ সকলোৰে বাবে প্ৰেৰণাৰ উৎস। মই তেওঁকো শ্ৰদ্ধাৰে স্মৰণ কৰিছোঁ।

বন্ধুসকল,

বিভিন্ন দিশৰ পৰা এইবাৰৰ এছিয়ান গেমছ আমাৰ বাবে স্মৰণীয় হৈ ৰ’ব। আজি আমাৰ পুৰুষ আৰু মহিলা উভয় হকী দলেই ইয়াত উপস্থিত আছে। এইবাৰ দুয়োটা দলে সোণৰ পদক অৰ্জন কৰিছে। বিশেষকৈ আমাৰ মহিলা হকী দলে ৪৪ বছৰৰ দীঘলীয়া অপেক্ষাৰ অন্ত পেলাই সোণৰ পদক জয় কৰি আনিছে। ক্ৰিকেটত আমাৰ পুৰুষ আৰু মহিলা উভয় দলে একেৰাহে দ্বিতীয়বাৰৰ বাবে পদক লাভ কৰিছে। দৰাচলতে, তেওঁলোকে নিজৰ পূৰ্বৰ অভিলেখৰো পুনৰাবৃত্তি কৰিছে।

কাবাডীতো আমাৰ পুৰুষ আৰু মহিলা উভয় দলে সোণৰ পদক লাভ কৰিছে। একেদৰে, ধনুৰ্বিদ্যাত পাঁচটা সোণৰ পদক অৰ্জন কৰা হৈছে। পাঁচটা সোণৰ পদক লাভ কৰাটোও যেন পৰম শক্তিমানৰ আশীৰ্বাদৰ প্ৰতিফলন।

শ্বুটিঙত অসাধাৰণ প্ৰদৰ্শন, বক্সিং আৰু মল্লযুঁজত উল্লেখযোগ্য সাফল্য, এথলেটিকছত নতুন অভিলেখ, ২৮ বছৰৰ পাছত ভাৰোত্তোলনত পদক অৰ্জন আৰু ১৯৮২ চনৰ পাছত প্ৰথমবাৰৰ বাবে মাৰাথন প্ৰতিযোগিতাত ভাৰতৰ সাফল্য—এই সকলোবোৰেই আমাৰ বাবে অত্যন্ত আনন্দৰ বিষয়।

বন্ধুসকল,

মই বিশেষভাৱে আমাৰ কন্যাসকলৰ প্ৰশংসা কৰিব বিচাৰোঁ। ভাৰতে লাভ কৰা ৮৫টা পদকৰ ভিতৰত ৩৮টা পদক আমাৰ মহিলা খেলুৱৈসকলে অৰ্জন কৰিছে। ইয়াৰ ভিতৰত ১১টা সোণৰ পদকো আছে।

এই পদকসমূহ কেৱল সংখ্যা নহয়; এইবোৰে নতুন ভাৰতৰ এক শক্তিশালী প্ৰতিচ্ছবি দাঙি ধৰিছে।

আজি ভাৰতে এনে কিছুমান ক্ৰীড়া ক্ষেত্ৰতো পদক লাভ কৰিছে, য’ত এছিয়ান গেমছৰ ইতিহাসত ইয়াৰ পূৰ্বে আমি কেতিয়াও পদক লাভ কৰা নাছিলোঁ। মিশ্ৰিত মাৰ্শ্বেল আৰ্টছ, ছফ্ট টেনিছ আৰু পালতোলা নৌকাযানৰ কেইবাটাও শাখাত আমাৰ খেলুৱৈসকলে প্ৰথমবাৰৰ বাবে পদক জয় কৰি নতুন ইতিহাস ৰচনা কৰিছে।

বন্ধুসকল,

এতিয়া আমি ক্ৰীড়াৰ ক্ষেত্ৰত আৰু অধিক উচ্চতাত উপনীত হ’ব লাগিব। আমি কৰিব লাগিব, নহয়নে? আমি আৰু অধিক সাফল্য অৰ্জন কৰিব লাগিব, নহয়নে?

মই আপোনালোকৰ সন্মুখত কেইটামান সংকল্প দাঙি ধৰিব বিচাৰিছোঁ। আপোনালোক সকলোৱে সম্পূৰ্ণ উৎসাহেৰে উত্তৰ দিব লাগিব—‘আমি কৰিম!’

মোৰ সৈতে কওক—

প্ৰতিটো ক্ৰীড়াক্ষেত্ৰতে ত্ৰিৰংগাৰ সন্মান বৃদ্ধি কৰিম—আমি কৰিম!

প্ৰতিটো ক্ৰীড়াক্ষেত্ৰতে ত্ৰিৰংগাৰ সন্মান বৃদ্ধি কৰিম—আমি কৰিম!

ক্ৰীড়াৰ ক্ষেত্ৰত ভাৰতৰ নতুন পৰিচয় গঢ়ি তুলিম—আমি কৰিম!

প্ৰতিটো ক্ৰীড়া শাখাত নতুন নতুন চেম্পিয়ন সৃষ্টি কৰিম—আমি কৰিম!

আমাৰ নামত অধিক নতুন অভিলেখ সংযোজন কৰিম—আমি কৰিম!

বন্ধুসকল,

আজি আমি যি ষ্টেডিয়ামত সমৱেত হৈছোঁ, সেই ষ্টেডিয়ামৰ নাম মেজৰ ধ্যান চান্দৰ নামেৰে ৰখা হৈছে। হকীৰ প্ৰতি তেওঁৰ নিষ্ঠা ইমান গভীৰ আছিল যে তেওঁ নিশাও ঘণ্টাৰ পাছত ঘণ্টা ধৰি অনুশীলন কৰিছিল।

তেওঁৰ কঠোৰ পৰিশ্ৰমে আমাক বাৰে বাৰে মনত পেলাই দিয়ে যে সংকল্প আৰু সপোন এদিনতে পূৰণ নহয়। ইয়াৰ বাবে বছৰ বছৰ ধৰি ধৈৰ্য, একাগ্ৰতা আৰু নিৰন্তৰ প্ৰচেষ্টাৰ প্ৰয়োজন হয়।

বন্ধুসকল,

বিগত ১২ বছৰত ভাৰতেও নিজৰ খেলুৱৈ আৰু ক্ৰীড়া ব্যৱস্থাটোক শক্তিশালী কৰাৰ বাবে যথেষ্ট ধৈৰ্য আৰু নিষ্ঠাৰে কাম কৰিছে।

এসময়ত বৃহৎ প্ৰতিযোগিতাসমূহত ভাৰতে মাত্ৰ কেইটামান পদকহে লাভ কৰিবলৈ সক্ষম হৈছিল। বহু ক্ৰীড়া শাখাৰ বিষয়ে দেশৰ মানুহে জানিছিলেই নহয় যে সেইবোৰো ক্ৰীড়াৰ অন্তৰ্গত।

অলিম্পিকৰ দৰে বৃহৎ প্ৰতিযোগিতা অনুষ্ঠিত হৈছিল, কিন্তু আধাতকৈও অধিক ক্ৰীড়া শাখাত ভাৰতৰ কোনো প্ৰতিনিধিত্ব নাছিল। কথাটো এবাৰ ভাবি চাওকচোন। আমি যদি প্ৰতিযোগিতাতেই অংশগ্ৰহণ নকৰোঁ, তেন্তে পদক ক’ৰ পৰা আহিব?

বন্ধুসকল,

আমি এই নিৰাশাবাদী মানসিকতা দূৰ কৰাৰ সংকল্প গ্ৰহণ কৰিছিলোঁ আৰু তাৰ ফলস্বৰূপে আজি বিশ্বৰ প্ৰতিটো বৃহৎ ক্ৰীড়া মঞ্চতে ভাৰতৰ প্ৰতিনিধিত্ব বৃদ্ধি পাইছে।

বন্ধুসকল,

এই পৰিৱৰ্তন কেনেকৈ সম্ভৱ হ’ল?

আপোনালোকে যি মানসিকতা আৰু একাগ্ৰতাৰে সাফল্য অৰ্জন কৰিলে, একেই মনোভাৱেৰে এই পৰিৱৰ্তন সম্ভৱ হৈছে। বিগত ১০ৰ পৰা ১২ বছৰত দেশে নিষ্ঠা আৰু আন্তৰিকতাৰে নিৰন্তৰ কাম কৰিছে, দীৰ্ঘম্যাদী পৰিকল্পনা গ্ৰহণ কৰিছে আৰু ক্ৰীড়াৰ বাবে এক স্বচ্ছ তথা আধুনিক ব্যৱস্থা গঢ়ি তুলিছে।

আপোনালোক সকলোৱে জানে যে আমি অলিম্পিক পদক লক্ষ্য আঁচনি (টপছ) আৰম্ভ কৰিছিলোঁ। আমি খেলো ইণ্ডিয়া আঁচনিও আৰম্ভ কৰিছিলোঁ। সময়ৰ লগে লগে এই আঁচনিৰ পৰিসৰ অধিক বৃদ্ধি কৰা হৈছে।

মনসুখ ভায়ে আগতে উল্লেখ কৰাৰ দৰে, খেলো ইণ্ডিয়াৰ সম্প্ৰসাৰণ আৰু ক্ৰীড়া ফেডাৰেচনসমূহক শক্তিশালী কৰাৰ বাবে ৩৬,০০০ কোটি টকাতকৈও অধিক ধন আবণ্টন দিয়া হৈছে।

বন্ধুসকল,

আজি দেশজুৰি এক হাজাৰতকৈও অধিক খেলো ইণ্ডিয়া কেন্দ্ৰ স্থাপন কৰা হৈছে। ষ্টেডিয়াম, ক্ষুদ্ৰ ষ্টেডিয়াম আৰু বহুমুখী ক্ৰীড়া প্ৰেক্ষাগৃহ নিৰ্মাণ কৰা হৈছে।

সৰু-বৰ চহৰসমূহত এথলেটিকছৰ দৌৰাৰ পথ, ফুটবল খেলপথাৰ, হকী খেলপথাৰ, সাঁতোৰৰ পুখুৰী আৰু এনে হাজাৰ হাজাৰ ক্ৰীড়া আন্তঃগাঁথনি নিৰ্মাণ কৰা হৈছে।

এই আঁচনিৰ অধীনত খেলুৱৈসকলক পোনপটীয়াকৈ আৰ্থিক সহায়ো আগবঢ়োৱা হৈছে। তেওঁলোকক নিজৰ পকেটৰ পৰা হোৱা ব্যয় পূৰণৰ বাবে ভাট্টা প্ৰদান কৰা হৈছে।

অলিম্পিক পদক লক্ষ্য আঁচনিৰ অধীনত খেলুৱৈসকলে প্ৰতিমাহে ৫০,০০০ টকাকৈ লাভ কৰে। কোনো ক্ৰীড়া শাখাৰ বাবে বিদেশত প্ৰশিক্ষণৰ প্ৰয়োজন হ’লে চৰকাৰে তাৰ ব্যৱস্থা কৰাৰ লগতে আৰ্থিক সহায়ো আগবঢ়ায়।

বন্ধুসকল,

যুৱক-যুৱতীসকলে যাতে খেলিবলৈ আৰু প্ৰতিযোগিতাত অংশগ্ৰহণ কৰিবলৈ সৰ্বাধিক সুযোগ লাভ কৰে, তাৰ বাবে শীতকালীন ক্ৰীড়া প্ৰতিযোগিতাৰ দৰে কাৰ্যসূচী আৰম্ভ কৰা হৈছে। সাংসদ ক্ৰীড়া প্ৰতিযোগিতাও আৰম্ভ কৰা হৈছে।

দেশে এখন নতুন ক্ৰীড়া নীতি আৰু এখন নতুন খেলো ভাৰত নীতি প্ৰণয়ন কৰিছে।

আমাৰ দিব্যাংগ খেলুৱৈসকলেও নিজৰ প্ৰতিভা আৰু সামৰ্থ্যৰ জৰিয়তে দেশৰ গৌৰৱ বৃদ্ধি কৰিছে। তেওঁলোকৰ বাবেও উন্নত সুযোগ আৰু আধুনিক ক্ৰীড়া সুবিধা নিশ্চিত কৰা হৈছে।

সেইবাবেই আজি প্ৰতিগৰাকী খেলুৱৈয়ে আত্মবিশ্বাসেৰে অনুভৱ কৰে যে তেওঁৰ সমগ্ৰ যাত্ৰাত দেশ তেওঁৰ কাষত থিয় হৈ আছে। আৰু যেতিয়া এজন খেলুৱৈয়ে এনে সমৰ্থন লাভ কৰে, তেতিয়া তেওঁ দেশৰ বাবে কি কৰিব পাৰে, তাৰ উৎকৃষ্ট উদাহৰণ আপোনালোক নিজেই।

বন্ধুসকল,

এইবাৰৰ এছিয়ান গেমছত ভাৰতীয় দলৰ বহু খেলুৱৈৰ বয়স আছিল মাত্ৰ ১৫ৰ পৰা ১৭ বছৰৰ ভিতৰত। ইমান কম বয়সতে তেওঁলোকে অসাধাৰণ প্ৰদৰ্শনেৰে দেশৰ গৌৰৱ বৃদ্ধি কৰিছে। তেওঁলোকে দেশবাসীৰ হৃদয় জয় কৰিছে।

ইয়াৰ পৰা প্ৰমাণিত হয় যে সাফল্যৰ ক্ষেত্ৰত বয়স কোনো বাধা নহয়। দৰাচলতে, ক্ৰীড়াৰ ক্ষেত্ৰত কম বয়সতে আৰম্ভ কৰাটো এক অতিৰিক্ত সুবিধা।

সেইবাবেই আমাৰ প্ৰচেষ্টা হৈছে অতি কম বয়সৰ পৰাই ক্ৰীড়া প্ৰতিভা চিনাক্ত কৰা। পাঁচৰ পৰা ১৫ বছৰ বয়সৰ শিশুসকলৰ মাজত প্ৰতিভা চিনাক্তকৰণ আৰু তেওঁলোকক উপযুক্ত প্ৰশিক্ষণ দিয়াৰ ক্ষেত্ৰত আমি বিশেষ গুৰুত্ব দিছোঁ।

আগন্তুক বছৰবোৰত খেলো ইণ্ডিয়া আৰু উদীয়মান খেলো ইণ্ডিয়া কাৰ্যসূচীৰ জৰিয়তে হাজাৰ হাজাৰ নতুন খেলুৱৈয়ে নিজৰ প্ৰতিভা বিকাশৰ সুযোগ লাভ কৰিব।

ভৱিষ্যতৰ ক্ৰীড়া প্ৰতিযোগিতাসমূহৰ বাবে আমি আমাৰ প্ৰস্তুতি অধিক শক্তিশালী কৰিব লাগিব।

২০২৮ চনত লছ এঞ্জেলছ অলিম্পিক অনুষ্ঠিত হ’ব। ২০৩০ চনত ভাৰতে কমনৱেলথ গেমছ আয়োজন কৰিব। আৰু ২০৩৬ চনত অলিম্পিক আয়োজন কৰাটোও ভাৰতৰ আকাংক্ষা।

এই লক্ষ্যৰ প্ৰতি লক্ষ্য ৰাখিয়েই মই লালকিল্লাৰ পৰা প্ৰতিভা সন্ধান অভিযান আৰম্ভ কৰাৰ কথা কৈছিলোঁ। আজি দেশৰ গাঁৱে-ভূঞে প্ৰতিভা চিনাক্ত কৰা হৈছে আৰু সেই প্ৰতিভাৰ বিকাশৰ ব্যৱস্থা কৰা হৈছে।

এই খেলুৱৈসকলেই আগন্তুক বছৰবোৰত ভাৰতৰ বাবে পদক কঢ়িয়াই আনিব।

বন্ধুসকল,

আমাৰ সপোন ডাঙৰ। আমাৰ সংকল্পও ডাঙৰ। আৰু আজি সেই সপোন বাস্তৱায়িত কৰাৰ আত্মবিশ্বাস ভাৰতৰ আছে। প্ৰতিগৰাকী ভাৰতীয়ৰ মনত এই আত্মবিশ্বাস আছে।

সেইবাবেই সম্পূৰ্ণ দৃঢ়তাৰে মই কওঁ—

ভাৰতত বৃহৎ ক্ৰীড়া প্ৰতিযোগিতা অনুষ্ঠিত কৰিম—আমি কৰিম!

ভাৰতত বৃহৎ ক্ৰীড়া প্ৰতিযোগিতা অনুষ্ঠিত কৰিম—আমি কৰিম!

ভাৰতত বৃহৎ ক্ৰীড়া প্ৰতিযোগিতা অনুষ্ঠিত কৰিম—আমি কৰিম!

বিশ্বৰ আগশাৰীৰ ক্ৰীড়া ৰাষ্ট্ৰসমূহৰ ভিতৰত ভাৰতক স্থান দিম—আমি কৰিম!

ভাৰতক বিশ্বৰ ক্ৰীড়া কেন্দ্ৰ হিচাপে গঢ়ি তুলিম—আমি কৰিম!

ভাৰতত বিশ্বমানৰ ক্ৰীড়া আন্তঃগাঁথনি গঢ়ি তুলিম—আমি কৰিম!

ভাৰতৰ প্ৰতিটো প্ৰান্তৰ পৰা চেম্পিয়ন সৃষ্টি কৰিম—আমি কৰিম!

বন্ধুসকল,

এছিয়ান গেমছত আমাৰ সাফল্য ভাৰতৰ সলনি হোৱা মানসিকতাৰো এক উদাহৰণ। ই দেখুৱাইছে যে আজিৰ যুৱপ্ৰজন্ম প্ৰতিটো উচ্চতা স্পৰ্শ কৰিবলৈ অধীৰ হৈ আছে।

ভাৰতৰ যুৱপ্ৰজন্মৰ দৃঢ় সংকল্পতকৈ উচ্চ কোনো শিখৰ নাই। আমাৰ যুৱশক্তিৰ সামৰ্থ্যৰ বাহিৰত কোনো লক্ষ্য নাই।

সম্ভাৱনাৰ অসীম আকাশ আমাৰ সন্মুখত মুকলি হৈ আছে, আৰু ভাৰতৰ যুৱপ্ৰজন্মই নিজেই নিজৰ লক্ষ্য নিৰ্ধাৰণ কৰিছে।

সেইবাবেই অতি কম সময়ৰ ভিতৰতে ভাৰত বিশ্বৰ তৃতীয় বৃহত্তম নৱ-উদ্যোগ পৰিৱেশতন্ত্ৰত পৰিণত হৈছে।

আমাৰ যুৱক-যুৱতীসকলে মহাকাশ খণ্ডত কোম্পানী গঢ়ি তুলিছে। তেওঁলোকে উপগ্ৰহ প্ৰযুক্তিৰ ওপৰত কাম কৰিছে। একেই যুৱপ্ৰজন্মই প্ৰতিৰক্ষা খণ্ডতো নতুন প্ৰযুক্তি বিকাশ কৰিছে। কৃত্ৰিম বুদ্ধিমত্তাৰ ক্ষেত্ৰতো তেওঁলোকে নতুন নতুন পৰীক্ষা-নিৰীক্ষা চলাইছে।

এই পৰিৱৰ্তন কেৱল বৃহৎ চহৰসমূহতে সীমাবদ্ধ হৈ থকা নাই।

যিদৰে আজি দূৰৱৰ্তী অঞ্চলৰ প্ৰতিভাৱান খেলুৱৈসকলেও ক্ৰীড়াৰ ক্ষেত্ৰত সুযোগ লাভ কৰিছে, ঠিক তেনেদৰে নৱ-উদ্যোগ, গৱেষণা আৰু অন্যান্য ক্ষেত্ৰতো সৰু চহৰ তথা গাঁৱৰ যুৱক-যুৱতীসকলে নতুন চিন্তা আৰু ধাৰণাৰে আগবাঢ়ি আহিছে।

এই আত্মবিশ্বাসৰ আঁৰত আছে গভীৰ আস্থা। বিগত এটা দশকত দেশে গঢ়ি তোলা ব্যৱস্থাসমূহে যুৱপ্ৰজন্মক এই বিশ্বাস প্ৰদান কৰিছে যে তেওঁলোকে ডাঙৰ সপোন দেখিব পাৰে।

তেওঁলোকে জানে যে সেই সপোন বাস্তৱায়িত কৰাত সহায় কৰিবলৈ দেশৰ সম্পূৰ্ণ শক্তি তেওঁলোকৰ পিছফালে আছে।

বন্ধুসকল,

আমাৰ প্ৰচেষ্টাৰ সুফল কেৱল খেলপথাৰত প্ৰতিযোগিতাত অংশগ্ৰহণ কৰা খেলুৱৈসকলৰ মাজতে সীমাবদ্ধ নহয়।

ক্ৰীড়া প্ৰশিক্ষণ, শৰীৰৰ সক্ষমতা পুনৰুদ্ধাৰ আৰু চিকিৎসা-সহায়, ক্ৰীড়া ব্যৱস্থাপনা আৰু ক্ৰীড়া সম্প্ৰচাৰৰ দৰে ক্ষেত্ৰতো যুৱক-যুৱতীসকলৰ বাবে নতুন কৰ্মসংস্থাপনৰ সুযোগ সৃষ্টি হৈছে।

ক্ৰীড়াৰ বিকাশৰ লগে লগে ইয়াৰ সৈতে জড়িত বহুতো বৃত্তি আৰু কৰ্মক্ষেত্ৰৰো উন্নতি হৈছে। ইয়াৰ ফলত যুৱপ্ৰজন্মৰ বাবে কৰ্মসংস্থাপন আৰু উদ্যোগ স্থাপনৰ নতুন পথ মুকলি হৈছে।

বন্ধুসকল,

আজি আমি যি ক্ষেত্ৰতেই নাথাকোঁ কিয়, নিজৰ সাফল্যৰ বাবে কঠোৰ পৰিশ্ৰম কৰিবই লাগিব। একে সময়তে, পৰৱৰ্তী প্ৰজন্মক গঢ়ি তোলাৰ দায়িত্বও আমি গ্ৰহণ কৰিব লাগিব।

আজি আপোনালোকৰ হাতত আন্তঃৰাষ্ট্ৰীয় প্ৰতিযোগিতাত অংশগ্ৰহণ কৰাৰ অভিজ্ঞতা আছে। সেয়েহে, মই আপোনালোকক অনুৰোধ জনাম যে আপোনালোকৰ দৰে আগবাঢ়ি যোৱাৰ সপোন দেখা শিশুসকলৰ বাবে কিছু সময় উলিয়াওক।

নিজৰ পৰিশ্ৰমৰ ঘামৰ জৰিয়তে তেওঁলোকৰ সপোনবোৰকো লালন-পালন কৰক। এনেদৰেই সাফল্য আহে।

যেতিয়াই সুযোগ লাভ কৰে, নিজৰ গাঁও আৰু চহৰৰ শিশুসকলক লগ কৰক। বিভিন্ন বিদ্যালয়লৈ যাওক। আপোনালোকে যি খেলপথাৰত প্ৰথমবাৰৰ বাবে খেলিবলৈ আৰম্ভ কৰিছিল, সেই খেলপথাৰখনলৈও নিশ্চয় যাওক।

আপোনালোকৰ অভিজ্ঞতা সেই শিশুসকলৰ বাবে অত্যন্ত মূল্যৱান হ’ব পাৰে। হয়তো আপোনালোকৰ এষাৰ কথাই কোনো শিশুক ক্ৰীড়াৰ ক্ষেত্ৰত আগবাঢ়ি যাবলৈ সাহস প্ৰদান কৰিব পাৰে।

বন্ধুসকল,

দেশৰ যুৱপ্ৰজন্মই কেৱল ক্ৰীড়াৰ ক্ষেত্ৰতে আপোনালোকৰ পৰা প্ৰেৰণা নলয়। কাৰণ, ক্ৰীড়াৰ ভূমিকা কেৱল খেলপথাৰতে সীমাবদ্ধ নহয়।

ক্ৰীড়াই আমাক জীৱনত অনুশাসন শিকায়। পৰি যোৱাৰ পাছত কেনেকৈ পুনৰ উঠি থিয় হ’ব লাগে, সেয়া শিকায়। পৰাজয়ৰ পাছতো কেনেকৈ জয়ী হ’ব লাগে, সেয়া শিকায়।

ক্ৰীড়াই আমাক এটা লক্ষ্যত দীৰ্ঘদিন ধৰি কেনেকৈ একাগ্ৰ হৈ থাকিব লাগে আৰু পৰিৱৰ্তিত পৰিস্থিতিৰ সৈতে কেনেকৈ নিজকে খাপ খুৱাব লাগে, সেয়াও শিকায়।

এই শিক্ষাবোৰ আমাৰ দৈনন্দিন জীৱনৰ অংশ হৈ পৰে। ক্ৰীড়াৰ এই মনোভাৱে আমাৰ সমগ্ৰ জীৱনজুৰি আমাক সহায় কৰে।

বন্ধুসকল,

মই সদায় কওঁ—যিয়ে খেলে, তেওঁ  উদ্ভাসিত হৈ উঠে।

গতিকে খেলি থাকক, বিকশিত হৈ থাকক।

আগন্তুক প্ৰতিযোগিতাসমূহৰ লগতে আপোনালোকৰ ভৱিষ্যতৰ সকলো প্ৰচেষ্টাৰ বাবে পুনৰ আন্তৰিক শুভেচ্ছা জনাইছোঁ।

আপোনালোকৰ উৎসাহ আৰু আত্মবিশ্বাসেই নতুন ভাৰতৰ আটাইতকৈ ডাঙৰ শক্তি। এই আত্মবিশ্বাসৰেই আমি ভাৰতক নতুন নতুন উচ্চতালৈ লৈ যাব লাগিব।

গতিকে আহক, পুনৰ সম্পূৰ্ণ উৎসাহেৰে মোৰ সৈতে কওক—

বিকশিত ভাৰত—আমি কৰিম!

২০৪৭ চনৰ ভিতৰত বিকশিত ভাৰত গঢ়িম—আমি কৰিম!

আমি কৰিম!

বিশ্বৰ শীৰ্ষ তিনিখন অৰ্থনীতিৰ ভিতৰত ভাৰতক স্থান দিম—আমি কৰিম!

বিশ্বৰ শীৰ্ষ তিনিখন অৰ্থনীতিৰ ভিতৰত ভাৰতক স্থান দিম—আমি কৰিম!

আত্মনিৰ্ভৰ ভাৰত গঢ়িম—আমি কৰিম!

আত্মনিৰ্ভৰ ভাৰত গঢ়িম—আমি কৰিম!

বিশ্বৰ উৎপাদন কেন্দ্ৰ হিচাপে ভাৰতক গঢ়ি তুলিম—আমি কৰিম!

বিশ্বৰ উৎপাদন কেন্দ্ৰ হিচাপে ভাৰতক গঢ়ি তুলিম—আমি কৰিম!

প্ৰযুক্তিৰ ক্ষেত্ৰত ভাৰতৰ নেতৃত্ব প্ৰতিষ্ঠা কৰিম—আমি কৰিম!

মহাকাশৰ দিশে নতুন নতুন পদক্ষেপ গ্ৰহণ কৰিম—আমি কৰিম!

অলিম্পিকৰ আয়োজন কৰিম—আমি কৰিম!

নতুন নতুন ক্ৰীড়া শাখাত পদক অৰ্জন কৰিম—আমি কৰিম!

হয়, আমি কৰিম!

আপোনালোক সকলোকে অশেষ অভিনন্দন।

আপোনালোকক  জনাইছো ধন্যবাদ।

ঘোষণাঃ প্ৰধানমন্ত্ৰীৰ ভাষণৰ এয়া এক মূলভাব সন্নিবিষ্ট কৰি কৰা  অনুবাদ। প্ৰধানমন্ত্ৰীয়েও তেওঁৰ মূল ভাষণটো হিন্দী ভাষাত  দিছিল।

***

MJPS/SS/VJ/ST/DM