পি এম ইণ্ডিয়া

আৰ্জেণ্টিনাৰ সমৰ্পিত যোগ–সাধক,

ভাৰত আৰু ভাৰতীয় সংস্কৃতিৰ প্ৰতি অবাধ প্ৰেম প্ৰদৰ্শন কৰা আৰ্জেণ্টিনাৰ বাসিন্দাসকল,

আৰ্জেণ্টিনাত বাস কৰা ভাৰতীয় ভাতৃ–ভগ্নীসকল,

আৰ্ট অব্ লিভিঙৰ কাৰ্যকৰ্তা তথা সদস্যসকল,

নমস্কাৰ!

বুয়েনাছ তাৰ্দাৰ্ছ৷ বুয়েনছ আয়াৰ্ছত ৰাতিপুৱা, দুপৰীয়া আৰু সন্ধিয়া বুয়েনছ অৰ্থাৎ বতৰ স্বাভাৱিক হৈ থাকে৷ মহৰ্ষি পতঞ্জলিৰ পৰম্পৰাৰ সৈতে জড়িত আপোনালোক সকলোকে এশ পঁচিছ কোটি ভাৰতীয়ৰ তৰফৰ পৰা অলেখ অভিবাদন জনাইছো৷ মই আৰ্ট অব্ লিভিঙৰ সদস্যসকলক তথা আপোনালোক সকলোকে এই মনোৰম আয়োজনৰ বাবে হৃদয়েৰে অশেষ অভিনন্দন জ্ঞাপন কৰিছো৷

বন্ধুসকল,

মই ২৪ ঘণ্টাতকৈও অধিক সময় সময় ১৫ হাজাৰ কিলোমিটাৰতকৈও অধিক পথ অতিক্ৰম কৰি কিছুদেৰী পূৰ্বে বুয়েনছ আয়াৰ্ছত উপস্থিত হৈছো৷ কিন্তু আপোনালোকৰ উৎসাহ আৰু প্ৰেমৰ ফলত মই মুঠেও ভাৰতৰ বাহিৰত থকা যেন লগা নাই৷ ইয়াত বহু লোক অতিশয় যত্নৰে তথা আদৰেৰে সূৰ্য নমস্কাৰ কৰি আছিল৷ আৰ্জেণ্টিনাৰ এই ৰূপালী সন্ধ্যাকালচোৱাত আপোনালোকৰ যোগ সাধনাই মোক প্ৰফুল্লিত কৰি তুলিছে আৰু উৎসাহেৰে ভৰাই তুলিছে৷

বন্ধুসকল,

আজিৰ কাৰ্যসূচীৰ নাম হৈছে ‘‘শান্তিৰ বাবে যোগ’’৷ যোগৰ কোনো কাৰ্যসূচীৰ নাম ইয়াতকৈ সুন্দৰ হ’ব নোৱাৰে৷ যোগৰ দ্বাৰা আমাৰ শৰীৰ আৰু মন দুয়োটাই স্বাস্থ্যৱান হয়৷ যোগে আমাৰ শৰীৰক শক্তি আৰু মনক শান্তি প্ৰদান কৰে৷ যেতিয়া ব্যক্তিৰ মনত শান্তি থাকিব তেতিয়া পৰিয়ালত, সমাজত, দেশত আৰু বিশ্বতো শান্তি স্থাপিত হ’ব৷ স্বাস্থ্য, কল্যাণ আৰু শান্তিৰ বাবে বিশ্বক ভাৰতে যোগাভ্যাস উপহাৰ দিছে৷ ২১ জুন তাৰিখে আন্তঃৰাষ্ট্ৰীয় যোগ দিৱসে এই মূল্যবোধসমূহৰ প্ৰতি আৰ্জেণ্টিনা সহিতে সমগ্ৰ বিশ্বৰে প্ৰতিবদ্ধতা প্ৰদৰ্শন কৰে৷ সৰ্বে সন্তু সুখিনঃ আৰু বসুধৈৱ কুটুম্বকম হ’ল এই ভাৰতীয় দৰ্শনৰ এক ব্যৱহাৰিক অভিব্যক্তি৷ মই এই জানি সুখী হৈছোঁ যে এই বৰ্ষত বুয়েনছ আয়াৰ্ছতো যোগ দিৱসত ১০ হাজাৰ লোকে অংশগ্ৰহণ কৰিছে৷

বন্ধুসকল,

যোগৰ অৰ্থ হ’ল জড়িত কৰা৷ ই আমাক কল্যাণৰ সৈতে জড়িত কৰে৷ সুখৰ সৈতে জড়িত কৰে৷ আৰু আজি ভাৰত তথা আৰ্জেণ্টিনাৰ মাজৰ হাজাৰ কিলোমিটাৰ দূৰত্বক যোগে সংযোগ কৰিছে আৰু আমাৰ দুয়োখন দেশক, আমাৰ জনতাক সংবদ্ধ কৰিছে৷ আমাক এক আত্মীয়ৰ সম্বন্ধত সংবদ্ধ কৰিছে৷ ভাৰত আৰু আৰ্জেণ্টিনাৰ মাজত দূৰত্ব হ’ল ১৫ হাজাৰ কিলোমিটাৰ৷ আমাৰ দুয়োখন দেশৰ মাজত দুখন বিশাল মহাসাগৰ আৰু মহাদ্বীপ আছে৷ দুয়োখন দেশৰ সময়ৰ ব্যৱধান হ’ল ৮ ঘণ্টা আৰু ৩০ মিনিট৷ অৰ্থাৎ ইয়াত এতিয়া আপোনালোকৰ সন্ধিয়া, কিন্তু ভাৰতত মানুহে ব্ৰহ্ম মুহূৰ্তৰ সাধনা আৰম্ভ কৰিবলৈ ধৰিব৷ কিন্তু আপোনালোকৰ যোগাভ্যাসে এয়া প্ৰদৰ্শিত কৰিছে যে ভাৰত আৰু আৰ্জেণ্টিনাৰ পৰস্পৰৰ সংস্কৃতিসমূহৰ প্ৰতি আদৰ ভাৱৰ সন্মুখত এই দূৰত্ব একোৱেই নহয়৷ আৰ্জেণ্টিনাই ভাৰতৰ দৰ্শন, কলা, সংগীত আৰু নৃত্যক ভাল পায়, ভাৰতত আৰ্জেণ্টিনাৰ ফুটবলৰ তাৰকাৰ লক্ষাধিক অনুগামী আছে৷ মাৰাডোনাৰ নাম আমাৰ দেশৰ কথা–বতৰাত তথা জটুৱা–ঠাঁচতো ব্যৱহৃত হ’বলৈ ধৰিছে৷

এতিয়া ভাৰতৰ এখন ৰাজ্য উৰিষ্যাত হকী বিশ্বকাপ অনুষ্ঠিত হৈ আছে৷ ইয়াত ফলত ভাৰতত উৎসাহৰ বাতাৱৰণ পৰিলক্ষিত হৈছে৷ আজিয়েই আৰ্জেণ্টিনাই হকী বিশ্বকাপত নিজৰ প্ৰথমখন মেচত জয় লাভ কৰিলে৷ শুনিবলৈ পোৱা মতে এই মেচ যথেষ্ট ৰোমাঞ্চকৰ আছিল৷ মই আৰ্জেণ্টিনাৰ হকী দলক অনাগত মেচসমূহৰ বাবে শুভকামনা প্ৰদান কৰিছো৷

ভাৰত আৰু আৰ্জেণ্টিনাৰ লোকসকলৰ সপোন আৰু আকাংক্ষা সম পৰ্যায়ৰ৷ দুয়োখন দেশৰ মাজত সম্পৰ্ক যথেষ্ট সৌহাৰ্দপূৰ্ণ আৰু বন্ধুত্বপূৰ্ণ৷ আমি দুয়োখন দেশেই উন্নয়নশীল আৰু গণতান্ত্ৰিক দেশ৷ দুয়োখন দেশে বিশ্বৰ পৰা পৰস্পৰৰ ভূমিকা আৰু প্ৰভাৱৰ দ্বাৰা সহায় লাভ কৰে৷

আজি যেতিয়া ভাৰতৰ মিত্ৰ দেশ আৰ্জেণ্টিনাই জি২০ সন্মিলনৰ উদ্যোক্তাৰ ভূমিকা গ্ৰহণ কৰিছে, এয়া আমাৰ বাবে অতিশয় সুখ তথা গৰ্বৰ কথা৷ এই সন্মিলনত যিসমূহ বিষয়ত আলোচনা হ’ব, যেনে বিশ্বৰ অৰ্থনীতি, বহনক্ষম বিকাশ, জলবায়ু পৰিৱৰ্তন, অৰ্থনৈতিক পলৰীয়া অপৰাধী, এই বিষয়সমূহৰ সৈতে কেৱল ভাৰত অথবা আৰ্জেণ্টিনাই নহয়, সমগ্ৰ বিশ্ব জড়িত হৈ আছে৷

আমাৰ দুয়োখন দেশৰ মাজত নিজা সহযোগিতাৰ অপাৰ সম্ভাৱনা আছে৷ ব্যৱসায়, ফাৰ্মা, তেল আৰু গেছ, তথ্য প্ৰযুক্তি তথা মহাকাশ, এনেকুৱা বহু বিষয় আছে য’ত আমি পৰস্পৰে পৰস্পৰৰ ক্ষমতাৰ দ্বাৰা ব্যক্তিগত সুবিধা অৰ্জন কৰিব পাৰো৷

ভাৰত আৰু আৰ্জেণ্টিনাৰ সহযোগিতাই জল, থল আৰু মহাকাশ, সকলোতে এক নতুন সহযোগিতা তথা সুন্দৰ ভৱিষ্যতৰ সৃষ্টি কৰিব পাৰে৷ আজি যোগে আমাক একত্ৰিত কৰিছে৷ মই বিচাৰিম যে আমি এনেকুৱা আৰু অৱকাশৰ সৃষ্টি কৰোঁ যাৰ দ্বাৰা আমাৰ মাজত সম্পৰ্ক, সংবাদ আৰু সহযোগিতা বৃদ্ধি হওক৷ আৰু ভাৰত তথা আৰ্জেণ্টিনাৰ মাজত বিকাশৰ সুন্দৰ গতি লাভ হওক৷ আত্মীয়তাত নতুন মিঠা স্বাদ জড়িত হওক৷

বন্ধুসকল,

আৰ্জেণ্টিনাত ভাৰত আৰু ভাৰতৰ বন্ধুসকলক মই ভাৰতক বিস্তাৰিত ভাৱে জনাৰ বাবে আমন্ত্ৰণ জনাইছো৷ আৰ্জেণ্টিনাত বাস কৰা আপোনালোক সকলো ভাৰতীয়ই জানুৱাৰীত কাশীত অনুষ্ঠিত হ’বলগীয়া প্ৰবাসী ভাৰতীয় দিৱসলৈ যেন নিশ্চয়কৈ আহে আৰু আৰ্জেণ্টিনাৰ আপোনালোকৰ বন্ধু–বান্ধৱকো যেন লগত লৈ আহে৷

এই সময়চোৱাত প্ৰয়াগৰাজ অৰ্ধকুম্ভও অনুষ্ঠিত হৈ থাকিব৷ সেই অদ্ভূত অৱকাশৰ, ভাৰতৰ সাংস্কৃতিক সমৃদ্ধিৰ, পৰিৱৰ্তিত ভাৰতৰ, নতুন ভাৰতৰ দৰ্শনো আপোনালোক সকলোৱে কৰিব পাৰিব৷ মই আপোনালোকৰ প্ৰতি কৃতজ্ঞ যে আপোনালোকে মোক ভাৰতৰ, যোগৰ কথা ক’বলৈ অৱকাশ প্ৰদান কৰিলে৷ মই আৰ্ট অব্ লিভিঙক তেওঁলোকৰ এই প্ৰয়াসৰ বাবে সাধুবাদ প্ৰদান কৰিছো৷

সুশ্ৰী পাত্ৰীসিয়া সোসাক কৃতজ্ঞতা জনাইছো কিয়নো তেওঁ যোগৰ এই মনোমোহা সন্ধিয়াক অধিক সুৰময়ী কৰি তুলিলে৷ আপোনালোক যোগৰ সৈতে এইদৰেই জড়িত হৈ থাকক৷ যোগে বিশ্বক এইদৰেই সংবদ্ধ কৰি ৰাখক৷ সুখেৰে থাকক, শান্তিত থাকক, আনন্দত থাকক৷

মুচাস গ্ৰাসিয়াস৷

ধন্যবাদ৷

******

AKT/SH/MANN