પીએમઇન્ડિયા

પશ્ચિમ બંગાળના રાજ્યપાલ, શ્રી સી.વી. આનંદ બોઝજી; કેન્દ્રીય મંત્રીમંડળમાં મારા સહયોગી, અશ્વિની વૈષ્ણવજી, શાંતનુ ઠાકુરજી, સુકાંત મજુમદારજી; પશ્ચિમ બંગાળમાં વિપક્ષના નેતા, સુવેન્દુ અધિકારીજી; સંસદમાં મારા સહયોગીઓ, શમિક ભટ્ટાચાર્યજી, ખગેન મુર્મુજી, કાર્તિક ચંદ્ર પોલજી; અન્ય પ્રતિનિધિઓ, દેવીઓ અને સજ્જનો.

આજે, માલદાથી પશ્ચિમ બંગાળની પ્રગતિને વેગ આપવાના અભિયાનને વધુ ગતિ મળી છે. થોડી વાર પહેલા, પશ્ચિમ બંગાળના વિકાસ સાથે સંબંધિત અનેક પ્રોજેક્ટ્સનું ઉદ્ઘાટન કરવામાં આવ્યું અથવા તો તેમનો શિલાન્યાસ કરવામાં આવ્યો છે. પશ્ચિમ બંગાળને નવી રેલ સેવાઓની ભેટ આપવામાં આવી છે. આ પ્રોજેક્ટ્સ અહીંના લોકો માટે મુસાફરી સરળ બનાવશે અને વેપાર તથા વ્યવસાયને પણ સરળ બનાવશે. ટ્રેન મેન્ટેનન્સ માટે અહીં ઉભી કરવામાં આવેલી સુવિધાઓ બંગાળના યુવાનો માટે નવી તકો પૂરી પાડશે.

મિત્રો,

બંગાળની આ પવિત્ર ધરતી પરથી આજે ભારતીય રેલવેના આધુનિકીકરણ તરફ વધુ એક મોટું પગલું ભરવામાં આવ્યું છે. આજે ભારતમાં વંદે ભારત સ્લીપર ટ્રેનોનો પ્રારંભ થયો છે. આ નવી વંદે ભારત સ્લીપર ટ્રેનો આપણા દેશવાસીઓની લાંબી મુસાફરીને વધુ આરામદાયક, ભવ્ય અને યાદગાર બનાવશે. “વિકસિત ભારત” ની ટ્રેનો કેવી હોવી જોઈએ? તે આ વંદે ભારત સ્લીપર ટ્રેનમાં સ્પષ્ટપણે દેખાય છે. થોડી વાર પહેલા માલદા સ્ટેશન પર, હું કેટલાક મુસાફરો સાથે વાત કરી રહ્યો હતો; દરેક જણ કહી રહ્યા હતા કે આ ટ્રેનમાં બેસીને તેમને અદભૂત આનંદની અનુભૂતિ થઈ છે. આપણે વિદેશી ટ્રેનોના ફોટા અને વીડિયો જોતા હતા અને ઈચ્છતા હતા કે આવી ટ્રેનો ભારતમાં પણ હોય. આજે આપણે એ સપનું સાકાર થતું જોઈ રહ્યા છીએ. મેં તાજેતરમાં નોંધ્યું છે કે વિદેશીઓ ભારતની મેટ્રો અને ટ્રેનોના વીડિયો બનાવી રહ્યા છે જેથી વિશ્વને ભારતીય રેલવેમાં આવી રહેલી ક્રાંતિ વિશે જણાવી શકાય. આ વંદે ભારત ટ્રેન ‘મેડ ઇન ઇન્ડિયા‘ છે; તેને બનાવવામાં આપણા ભારતીયોનો પરસેવો વહે છે. દેશની આ પ્રથમ વંદે ભારત સ્લીપર ટ્રેન મા કાલીની ધરતીને મા કામાખ્યાની ધરતી સાથે જોડે છે. આવનારા સમયમાં આ આધુનિક ટ્રેનનો સમગ્ર દેશમાં વિસ્તાર કરવામાં આવશે. હું બંગાળ, આસામ અને સમગ્ર દેશને આ આધુનિક સ્લીપર ટ્રેન માટે ખૂબ ખૂબ અભિનંદન આપું છું.

મિત્રો,

આજે ભારતીય રેલવે પરિવર્તનના તબક્કામાંથી પસાર થઈ રહી છે. રેલવેનું વિદ્યુતીકરણ કરવામાં આવી રહ્યું છે, અને રેલવે સ્ટેશનો આધુનિક બની રહ્યા છે. આજે પશ્ચિમ બંગાળ સહિત દેશભરમાં 150 થી વધુ વંદે ભારત ટ્રેનો દોડી રહી છે. આની સાથે જ આધુનિક અને હાઈ-સ્પીડ ટ્રેનોનું સંપૂર્ણ નેટવર્ક બનાવવામાં આવી રહ્યું છે, અને તેના સૌથી મોટા લાભાર્થીઓ બંગાળના ગરીબ અને મધ્યમ વર્ગના પરિવારો છે.

મિત્રો,

આજે બંગાળને વધુ ચાર આધુનિક અમૃત ભારત એક્સપ્રેસ ટ્રેનો મળી છે: ન્યૂ જલપાઈગુડી – નાગરકોઈલ અમૃત ભારત એક્સપ્રેસ, ન્યૂ જલપાઈગુડી – તિરુચિરાપલ્લી અમૃત ભારત એક્સપ્રેસ, અલીપુરદ્વાર – બેંગલુરુ અમૃત ભારત એક્સપ્રેસ અને અલીપુરદ્વાર – મુંબઈ અમૃત ભારત એક્સપ્રેસ. આનાથી બંગાળ અને ખાસ કરીને ઉત્તર બંગાળની દક્ષિણ અને પશ્ચિમ ભારત સાથેની કનેક્ટિવિટી વધુ મજબૂત થશે. આ ખાસ કરીને એવા મુસાફરો માટે છે જેઓ દેશના વિવિધ ભાગોમાંથી બંગાળ અને પૂર્વીય ભારતની મુલાકાતે આવે છે—જેઓ ગંગા સાગર, દક્ષિણેશ્વર અને કાલીઘાટના દર્શન માટે આવે છે. આ અમૃત ભારત એક્સપ્રેસ ટ્રેનો અહીંથી તમિલનાડુ અને મહારાષ્ટ્રની મુસાફરી કરનારાઓ માટે મુસાફરી સરળ બનાવશે.

મિત્રો,

આજે જ્યારે ભારતીય રેલવે આધુનિક બની રહી છે, ત્યારે તે આત્મનિર્ભર પણ બની રહી છે. ભારતના રેલ એન્જિન, રેલ કોચ અને મેટ્રો કોચ ભારતની ટેકનોલોજીની ઓળખ બની રહ્યા છે. આજે આપણે અમેરિકા અને યુરોપ કરતા વધુ લોકોમોટિવ્સ (રેલ એન્જિન) બનાવી રહ્યા છીએ. આપણે વિશ્વના અનેક દેશોમાં પેસેન્જર ટ્રેન અને મેટ્રો ટ્રેનના કોચની નિકાસ કરીએ છીએ. આ બધું આપણા અર્થતંત્રને નોંધપાત્ર રીતે લાભ આપે છે અને આપણા યુવાનોને રોજગારી પૂરી પાડે છે.

મિત્રો,

ભારતને જોડવું એ અમારી પ્રાથમિકતા છે; અંતર ઘટાડવું એ અમારું મિશન છે, અને આ આજના કાર્યક્રમમાં પણ સ્પષ્ટપણે જોવા મળે છે. ફરી એકવાર, આ પ્રોજેક્ટ્સ માટે તમને સૌને મારી શુભેચ્છાઓ. ખૂબ ખૂબ આભાર. મારે નજીકમાં જ એક ખૂબ મોટા કાર્યક્રમમાં હાજરી આપવાની છે જ્યાં ઘણા લોકો રાહ જોઈ રહ્યા છે; જે વાતોનો મેં અહીં ઉલ્લેખ નથી કર્યો, તે હું ત્યાં વિગતવાર સમજાવીશ, અને મીડિયાનું ધ્યાન પણ તે ભાષણ પર વધુ રહેશે. ખૂબ ખૂબ આભાર.

SM/IJ/GP//JD