પ્રધાનમંત્રી શ્રી નરેન્દ્ર મોદી 23 ઓક્ટોબર 2026 ના રોજ સવારે 11 વાગ્યે ભારત મંડપમ, નવી દિલ્હી ખાતે ચિન્મય અમૃત મહોત્સવ વૈશ્વિક સંમેલનનું ઉદ્ઘાટન કરશે. તેઓ આ પ્રસંગે ઉપસ્થિત જનમેદનીને પણ સંબોધિત કરશે.
23 થી 25 ઓક્ટોબર 2026 દરમિયાન યોજાનાર આ ત્રિદિવસીય સંમેલનમાં ભારત અને વિદેશમાંથી 9,000થી વધુ સહભાગીઓ એકત્ર થશે. આ કાર્યક્રમ ચિન્મય મિશનના 75 વર્ષ પૂર્ણ થવાની યાદમાં વર્ષભર ચાલેલા ઉત્સવના સમાપનનું પ્રતીક છે. વેદાંત અને ભગવદ્ ગીતાના જ્ઞાનને સૌ સુધી પહોંચાડવા માટે સ્વામી ચિન્મયાનંદ દ્વારા 1951 માં ચિન્મય મિશન નામના વૈશ્વિક આધ્યાત્મિક આંદોલનની સ્થાપના કરવામાં આવી હતી. દાયકાઓ દરમિયાન, મિશને આધ્યાત્મિક શિક્ષણ, સાંસ્કૃતિક જાળવણી, યુવા સશક્તિકરણ અને સમુદાય સેવામાં પોતાના કાર્યનો વિસ્તાર કર્યો છે.
વર્ષભર ચાલેલી ઉજવણીની શરૂઆત ગયા વર્ષે તમિલનાડુના ગંગાઈકોંડા ચોલાપુરમ ખાતે થઈ હતી, જ્યાં પ્રધાનમંત્રીએ ઇલૈયારાજાના સંગીત સાથે ચિન્મય મિશન દ્વારા તૈયાર કરાયેલ ભગવદ્ ગીતાનું તમિલ કાવ્યાનુવાદ વિમોચન કર્યું હતું. આ વર્ષ દરમિયાન અસંખ્ય પહેલો અને કાર્યક્રમોનું આયોજન કરવામાં આવ્યું હતું, જેમાં વિવિધ સ્થળોએ સમૂહ હવન, ત્રિપુરામાં મા સૌંદર્ય ચિન્મયી મંદિરની પ્રાણ પ્રતિષ્ઠા અને ‘ચિન્મય ગીતા સમર્પણમ‘ નો સમાવેશ થાય છે, જે હેઠળ વિશ્વભરના 1 લાખથી વધુ લોકોએ ઓનલાઈન એકસાથે ભગવદ્ ગીતાના 15મા અધ્યાયનો પાઠ કર્યો હતો. આ ઉજવણીની એક મુખ્ય પહેલ ‘ગીતા પંચામૃત‘ હતી, જે ભગવદ્ ગીતાના પાંચ પસંદગીના શ્લોકો પર ધ્યાન કેન્દ્રિત કરતી હતી. ગીતાનો સંદેશ સમગ્ર દેશમાં પહોંચાડવા માટે, ચિન્મય યુવા કેન્દ્રના 15 યુવા સભ્યોએ ‘ચિન્મય અમૃત યાત્રા‘ હાથ ધરી હતી, જે અંતર્ગત તેમણે સમગ્ર દેશમાં 40000 કિલોમીટરથી વધુનો પ્રવાસ કર્યો હતો.
SM/BS/JD
