പിഎം ഇന്ത്യ

ആദരണീയ പ്രസിഡന്റ് ഖുറെൽസുഖ്,
ഇരു രാജ്യങ്ങളിലെയും പ്രതിനിധികളേ,
മാധ്യമങ്ങളിൽ നിന്നുള്ള സുഹൃത്തുക്കളേ

നമസ്‌കാരം!

സൈൻ ബൈൻ ഉ

പ്രസിഡന്റ് ഖുറെൽസുഖിനെയും അദ്ദേഹത്തിന്റെ പ്രതിനിധി സംഘത്തെയും ഇന്ത്യയിലേക്ക് സ്വാഗതം ചെയ്യുന്നതിൽ എനിക്ക് അതിയായ സന്തോഷം തോന്നുന്നു.

ആറ് വർഷത്തിന് ശേഷമാണ് മംഗോളിയൻ പ്രസിഡന്റ് ഇന്ത്യ സന്ദർശിക്കുന്നത് എന്നത്  ഈ സന്ദർശനത്തെ വളരെ സവിശേഷമായ ഒരു അവസരമാക്കി മാറ്റുന്നു. ഇന്ത്യയും മംഗോളിയയും തമ്മിലുള്ള നയതന്ത്ര ബന്ധത്തിന്റെ 70-ാം വാർഷികവും തന്ത്രപരമായ പങ്കാളിത്തത്തിന്റെ 10-ാം വാർഷികവും ആഘോഷിക്കുന്ന വേളയിലാണ് ഈ സന്ദർശനം. ഇതിന്റെ സ്മരണയ്ക്കായി, നമ്മുടെ പരസ്പര പൈതൃകം, വൈവിധ്യം, ശക്തമായ നാഗരിക ബന്ധങ്ങൾ എന്നിവ എടുത്തുകാണിക്കുന്ന ഒരു സംയുക്ത തപാൽ സ്റ്റാമ്പ് ഞങ്ങൾ പുറത്തിറക്കി.

സുഹൃത്തുക്കളേ,

ഇന്ന്, “ഏക് പേഡ് മാ കേ നാം” കാമ്പെയ്‌നിന് കീഴിൽ ഒരു വൃക്ഷത്തൈ നടൽ ചടങ്ങോടെയാണ് ഞങ്ങളുടെ യോഗം ആരംഭിച്ചത്. പ്രസിഡന്റ് ഖുറെൽസുഖ് തന്റെ പരേതയായ അമ്മയുടെ സ്മരണയ്ക്കായി ഒരു ആൽമരം നട്ടു, അത് വരും തലമുറകൾക്കായി നമ്മുടെ ആഴത്തിലുള്ള സൗഹൃദത്തിന്റെയും പരിസ്ഥിതിയോടുള്ള നമ്മുടെ പങ്കിട്ട പ്രതിബദ്ധതയുടെയും പ്രതീകമായി നിലകൊള്ളും.

സുഹൃത്തുക്കളേ,

പത്ത് വർഷങ്ങൾക്ക് മുമ്പ്, മംഗോളിയയിലേക്കുള്ള എന്റെ സന്ദർശന വേളയിൽ, ഞങ്ങൾ ഞങ്ങളുടെ പങ്കാളിത്തത്തെ ഒരു തന്ത്രപരമായ തലത്തിലേക്ക് ഉയർത്തി. കഴിഞ്ഞ ദശകത്തിൽ, എല്ലാ തലങ്ങളിലും ഈ പങ്കാളിത്തം കൂടുതൽ ശക്തവും ആഴമേറിയതുമായി വളർന്നു.

ഞങ്ങളുടെ പ്രതിരോധ, സുരക്ഷാ സഹകരണവും ക്രമാനുഗതമായി ശക്തിപ്പെട്ടുകൊണ്ടിരിക്കുന്നു. പരിശീലന പരിപാടികൾ മുതൽ എംബസിയിൽ ഒരു പ്രതിരോധ അറ്റാഷെയെ നിയമിക്കുന്നത് വരെ ഞങ്ങൾ നിരവധി പുതിയ സംരംഭങ്ങൾ ആരംഭിച്ചിട്ടുണ്ട്. മംഗോളിയയുടെ അതിർത്തി സുരക്ഷാ സേനയ്ക്കായി ഇന്ത്യ ഒരു പുതിയ ശേഷി വർദ്ധിപ്പിക്കൽ പരിപാടിയും ആരംഭിക്കും.

സുഹൃത്തുക്കളേ,

ആഗോള പ്രശ്‌നങ്ങളോടുള്ള ഞങ്ങളുടെ സമീപനം ഞങ്ങളുടെ പങ്കിട്ട മൂല്യങ്ങളെ അടിസ്ഥാനമാക്കിയുള്ളതാണ്. സ്വതന്ത്രവും തുറന്നതും ഉൾക്കൊള്ളുന്നതും നിയമങ്ങളെ അടിസ്ഥാനമാക്കിയുള്ളതുമായ ഒരു ഇന്തോ-പസഫിക്കിനെ പിന്തുണയ്ക്കുന്ന അന്താരാഷ്ട്ര ഫോറങ്ങളിൽ ഞങ്ങൾ അടുത്ത പങ്കാളികളായി നിലകൊള്ളുന്നു. ​ഗ്ലോബൽ സൗത്തിന്റെ ശബ്ദം ഉയർത്തുന്നതിനായി ഞങ്ങൾ ഒരുമിച്ച് പ്രവർത്തിക്കുന്നു.

ബുദ്ധമത ഗ്രന്ഥങ്ങളുടെ ആഴത്തിലുള്ള പഠനത്തിനും പുരാതന വിജ്ഞാന പാരമ്പര്യം തുടരുന്നതിനും വേണ്ടി ഒരു സംസ്കൃത അധ്യാപകനെയും ഞങ്ങൾ ഗന്ധൻ ആശ്രമത്തിലേക്ക് അയയ്ക്കും. പത്ത് ലക്ഷം പുരാതന കൈയെഴുത്തുപ്രതികൾ ഡിജിറ്റൽവത്ക്കരിക്കുന്നതിനുള്ള ഒരു പദ്ധതി ഉടൻ ആരംഭിക്കാൻ ഞങ്ങൾ തീരുമാനിച്ചിട്ടുണ്ട്. മംഗോളിയയിലെ ബുദ്ധമതത്തിൽ നളന്ദ സർവകലാശാല നിർണായക പങ്ക് വഹിച്ചിട്ടുണ്ട്, ഇന്ന് നളന്ദയെ ഗന്ധൻ ആശ്രമവുമായി ബന്ധിപ്പിച്ചുകൊണ്ട് ഈ ചരിത്രപരമായ ബന്ധം ശക്തിപ്പെടുത്താൻ ഞങ്ങൾ സമ്മതിച്ചിട്ടുണ്ട്.

കേന്ദ്ര ​ഗവൺമെന്റുകൾക്കപ്പുറത്തേക്ക് വളരുന്നതാണ് ഞങ്ങളുടെ ബന്ധം. ലഡാക്ക് ഓട്ടോണമസ് ഹിൽ ഡെവലപ്‌മെന്റ് കൗൺസിലും മംഗോളിയയിലെ അർഖൻഗായ് പ്രവിശ്യയും തമ്മിൽ ഇന്ന് ഒപ്പുവച്ച ധാരണാപത്രം നമ്മുടെ സാംസ്കാരിക ബന്ധങ്ങൾക്ക് പുതിയൊരു ഉത്തേജനം നൽകും.

സുഹൃത്തുക്കളേ,

നാം അതിർത്തി പങ്കിടുന്നില്ലെങ്കിലും, ഇന്ത്യ എല്ലായ്പ്പോഴും മംഗോളിയയെ ഒരു അടുത്ത അയൽക്കാരനായാണ് കണക്കാക്കിയിട്ടുള്ളത്. ജനങ്ങൾ തമ്മിലുള്ള ബന്ധം ശക്തിപ്പെടുത്തുന്നത് ഞങ്ങൾ തുടരും. മംഗോളിയൻ പൗരന്മാർക്ക് സൗജന്യ ഇ-വിസ നൽകാൻ ഞങ്ങൾ തീരുമാനിച്ചു. മംഗോളിയയിൽ നിന്നുള്ള യുവ സാംസ്കാരിക അംബാസഡർമാരുടെ ഇന്ത്യയിലേക്കുള്ള വാർഷിക സന്ദർശനം ഞങ്ങൾ സ്പോൺസർ ചെയ്യും.

സുഹൃത്തുക്കളേ,

മംഗോളിയയുടെ വികസനത്തിൽ ശക്തവും വിശ്വസ്ത പങ്കാളിയുമാണ് ഇന്ത്യ.

ഇന്ത്യയുടെ 1.7 ബില്യൺ ഡോളർ വായ്പാ ലൈൻ പിന്തുണയ്ക്കുന്ന എണ്ണ ശുദ്ധീകരണ പദ്ധതി, മംഗോളിയയുടെ ഊർജ്ജ സുരക്ഷയെ ശക്തിപ്പെടുത്തും. ആഗോളതലത്തിൽ ഇന്ത്യയുടെ ഏറ്റവും വലിയ വികസന പങ്കാളിത്ത പദ്ധതിയാണിത്, 2,500-ലധികം ഇന്ത്യൻ പ്രൊഫഷണലുകൾ മംഗോളിയൻ സഹപ്രവർത്തകരോടൊപ്പം ഇത് യാഥാർത്ഥ്യമാക്കാൻ പ്രവർത്തിക്കുന്നു.

നൈപുണ്യ വികസനത്തിലും ഞങ്ങൾ ഞങ്ങളുടെ സഹകരണം ശക്തിപ്പെടുത്തിയിട്ടുണ്ട്. അടൽ ബിഹാരി വാജ്‌പേയി സെന്റർ ഓഫ് എക്‌സലൻസ് ഫോർ ഐടി, ഇന്ത്യ-മംഗോളിയ ഫ്രണ്ട്‌ഷിപ്പ് സ്‌കൂൾ എന്നിവയിലൂടെ, മംഗോളിയയിലെ യുവാക്കളുടെ അഭിലാഷങ്ങൾ പുതിയ ഉയരങ്ങളിലെത്തുന്നു. ഈ പദ്ധതികൾ ഞങ്ങളുടെ സൗഹൃദത്തിന്റെ ആഴത്തിന് തെളിവാണ്.

ഇന്ന്, സാധാരണക്കാരുടെ ജീവിതം മെച്ചപ്പെടുത്താൻ ലക്ഷ്യമിട്ടുള്ള നിരവധി പദ്ധതികളും ഞങ്ങൾ പ്രഖ്യാപിക്കുന്നു. മംഗോളിയയിലെ ജനങ്ങളുടെ ആവശ്യങ്ങൾ മുൻപന്തിയിൽ നിർത്തിക്കൊണ്ടാണ് ഞങ്ങൾ ഈ ശ്രമങ്ങൾ തുടരുക.

ഊർജ്ജം, നിർണായക ധാതുക്കൾ, റെയർ-എർത്തുകൾ, ഡിജിറ്റൽ, ഖനനം, കൃഷി, ക്ഷീരപഥം, സഹകരണ സ്ഥാപനങ്ങൾ തുടങ്ങിയ മേഖലകളിൽ സഹകരണത്തിന്റെ പുതിയ സാധ്യതകൾ ഞങ്ങളുടെ സ്വകാര്യ മേഖലയും പര്യവേക്ഷണം ചെയ്യുന്നതിൽ എനിക്ക് സന്തോഷമുണ്ട്.

ആദരണീയ വ്യക്തിത്വമേ,

രണ്ട് പുരാതന നാഗരികതകൾ തമ്മിലുള്ള വിശ്വാസത്തിന്റെയും സൗഹൃദത്തിന്റെയും ഉറച്ച അടിത്തറയിലാണ് നമ്മുടെ ബന്ധങ്ങൾ കെട്ടിപ്പടുത്തിരിക്കുന്നത്. പൊതുവായ സാംസ്കാരിക പൈതൃകം, ജനാധിപത്യ മൂല്യങ്ങൾ, വികസനത്തോടുള്ള പൊതുവായ പ്രതിബദ്ധത എന്നിവയാൽ അവ പരിപോഷിപ്പിക്കപ്പെടുന്നു. ഈ തന്ത്രപരമായ പങ്കാളിത്തത്തെ നമ്മൾ ഒരുമിച്ച് പുതിയ ഉയരങ്ങളിലേക്ക് കൊണ്ടുപോകുമെന്ന് എനിക്ക് ഉറപ്പുണ്ട്.

ഒരിക്കൽ കൂടി, ഈ ചരിത്ര സന്ദർശനത്തിനും ഇന്ത്യയോടുള്ള നിങ്ങളുടെ അചഞ്ചലമായ സൗഹൃദത്തിനും പ്രതിബദ്ധതയ്ക്കും ഞാൻ നന്ദി പറയുന്നു.

ബയാർല

വളരെ നന്ദി.

-SK-