பி.எம்.இந்தியா

பிரதமர் திரு நரேந்திர மோடி, இன்று (01.10.2026) புதுதில்லியில் உள்ள பாரத் மண்டபத்தில் நடைபெற்ற மத்திய அரசுப் பணியாளர் தேர்வாணையமான யுபிஎஸ்சி-யின் (UPSC) நூற்றாண்டு விழாவில் கலந்துகொண்டார். தமது உரையில், யுபிஎஸ்சி-யின் பாரம்பரியத்தை எடுத்துரைத்த பிரதமர், இந்த நூற்றாண்டு விழாவானது, கோடிக்கணக்கான இளைஞர்களின் அளவற்ற லட்சியங்களின் திருவிழாவாகவும், யுபிஎஸ்சி மீது ஒவ்வொரு இந்தியரும் வைத்துள்ள அசைக்க முடியாத நம்பிக்கையின் கொண்டாட்டமாகவும் திகழ்கிறது என்று குறிப்பிட்டார்.

சுதந்திரத்திற்குப் பிறகு சந்தித்த மாபெரும் சவால்களை நினைவு கூர்ந்த பிரதமர், நாட்டை சுதந்திரமாக வைத்திருப்பதற்கு மட்டுமல்லாமல், தேசத்தை முனைப்புடன் ஆள்வதற்கும் தேவைப்பட்ட இன்றியமையாத உறுதியான கட்டமைப்பை நிறுவிய சர்தார் வல்லபாய் பட்டேலுக்கு அவர் புகழஞ்சலி செலுத்தினார். யுபிஎஸ்சி-யை சுதந்திர இந்தியாவின் ஒரு முதன்மைத் தூணாக மாற்றி, அதற்கு வலுவூட்டியதற்காக அவர் சர்தார் பட்டேலைப் பாராட்டினார்.

1926-ம் ஆண்டில் பிரிட்டிஷ் ஆட்சியின் கீழ் யுபிஎஸ்சி உருவானதையும், சுதந்திரத்திற்குப் பிந்தைய அதன் பரிணாம வளர்ச்சியையும் குறிப்பிட்டுப் பேசிய பிரதமர், ஒரு சுதந்திர தேசத்தின் கனவுகளை இந்த அமைப்பு நிறைவேற்றியுள்ளது என்று கூறினார். யுபிஎஸ்சி தனது பணிகளை மிகச் சிறப்பாக நிறைவேற்றியிருந்தாலும், வரவிருக்கும் முக்கியமான அடுத்த 25 ஆண்டுகளை நோக்கி இப்போது கவனம் இருக்க வேண்டும் என்று அவர் கூறினார்.

வளர்ச்சியடைந்த பாரதம் என்ற இலக்கை அடைவதில் தேர்வு அமைப்புகளின் முக்கியப் பங்கை விவரித்த பிரதமர், இன்று தேர்ந்தெடுக்கப்படும் இளைஞர்கள் தேசத்தின் எதிர்காலத்தின் முதன்மைச் சிற்பிகளாகத் திகழ்வார்கள் என்று கூறினார்.

அரசுப் பணிகளுக்கு, சரியான உள்ளார்ந்த உந்துதல் கொண்ட நபர்களைத் தேர்ந்தெடுப்பது, வேகமாக மாறிவரும் பொதுமக்களின் விருப்பங்களுக்கு ஏற்ப, நிர்வாகம் தன்னை மாற்றியமைத்துக் கொள்வதை கணிசமாக எளிதாக்கும் என்று அவர் எடுத்துரைத்தார். எனவே, எதிர்காலத் தேவைகளுக்கு ஏற்ப நமது தேர்வு அளவுகோல்களையும் ஆட்சேர்ப்பு செயல்முறையையும் நாம் மாற்றியமைக்க வேண்டியிருக்கும் என்று திரு நரேந்திர மோடி கூறினார்.

புதிய சகாப்தத்தின் அடிப்படைக் கொள்கைகள் மூன்று முக்கியத் தூண்களை முழுமையாகச் சார்ந்துள்ளன என்று அவர் கூறினார். அந்த அடிப்படைக் கொள்கைகள் மக்கள் நலன், முன்முயற்சி, நல்லாட்சி என்று அவர் தெரிவித்தார். இந்த அடிப்படை ஆளுகைக் கொள்கைகளை விரிவாக விளக்கிய பிரதமர், தேர்வு செயல்முறைகள் மிக நுணுக்கமாக வடிவமைக்கப்பட வேண்டும் என்று வலியுறுத்தினார்.

நிர்வாக சீர்திருத்தங்களின் அவசியத்தை எடுத்துரைத்த பிரதமர், தரத்தைக் குறைக்காமல் தேர்வு காலங்களைக் குறைப்பதற்கான கொள்கையை ஏற்றுக்கொண்டு, தேர்வு முகமைகள் நாட்டின் பரந்த சீர்திருத்த வேகத்துடன் விரைவாக வேண்டும் என்று வலியுறுத்தினார்.

குடிமைப் பணிகளில் பெண்களின் எண்ணிக்கை 1952-ல் வெறும் 3 சதவீதத்திலிருந்து தற்போது 30 சதவீதத்திற்கும் மேலாக வியத்தகு அளவில் உயர்ந்திருப்பதை அவர் சுட்டிக் காட்டினார். 2014-க்குப் பிறகு யுபிஎஸ்சி தலைவர்கள் நான்கு பேரில் மூன்று பேர் பெண்களாக வரலாற்றுச் சிறப்புமிக்க வகையில் நியமிக்கப்பட்டிருப்பதையும் அவர் பெருமையுடன் குறிப்பிட்டார்.

இந்த மாற்றங்கள் வெறும் புள்ளிவிவரங்கள் மட்டுமல்ல எனவும் நாட்டில் வாய்ப்புகள் எவ்வளவு விரிவடைந்துள்ளது என்பதை இவை காட்டுகின்றன என்றும் திரு நரேந்திர மோடி கூறினார்.

யுபிஎஸ்சி புதிய நூற்றாண்டில் தொடர்ந்து செழித்து வளர்ந்து, வெற்றிகரமாகத் தன்னைத் தகவமைத்துக்கொள்ளும் என்ற நம்பிக்கையை வெளிப்படுத்தி பிரதமர் திரு நரேந்திர மோடி தமது உரையை நிறைவு செய்தார்.

மேலும் விவரங்களுக்கு இந்த ஆங்கிலச் செய்திக் குறிப்பைக் காணவும்: https://www.pib.gov.in/PressReleaseDetail.aspx?PRID=2317531&reg=3&lang=1

***

TV/PLM/GS