پی ایم انڈیا

وزیراعظم جناب نریندر مودی نے آج گوہاٹی، آسام میں تقریباً 19,4800 کروڑ روپے مالیت کے ترقیاتی منصوبوں کا افتتاح کیا اور ان کا سنگِ بنیاد رکھا۔ اس موقع پر وزیراعظم نے گوہاٹی میں ایک عظیم اجتماع سے خطاب کیا اور شہر کے عوام کو دل کی گہرائیوں سے مبارکباد پیش کی۔ انہوں نے ملک بھر سے اس پروگرام میں شامل ہونے والے کسانوں کے ساتھ ساتھ چائے کے باغات میں کام کرنے والے بھائیوں اور بہنوں کو بھی سلام پیش کیا۔ وزیراعظم نے کہا کہ انہیں ماں کاماکھیا کی مقدس دھرتی پر، نوراتری (نوراترہ) کے آغاز سے قبل حاضری کی سعادت حاصل ہونے پر بے حد خوشی اور شکرگزاری ہے۔ انہوں نے کہا: ’’مجھے یہ سعادت نصیب ہوئی ہے کہ نوراترہ شروع ہونے سے پہلے ماں کاماکھیا کی اس مقدس سرزمین پر آپ سب کے درشن کا موقع ملا۔‘‘

وزیراعظم نے کہا کہ ماں کاماکھیا کی برکت سے تھوڑی ہی دیر پہلے تقریباً 19,500 کروڑ روپے کے ترقیاتی منصوبوں کا افتتاح اور سنگِ بنیاد رکھا گیا ہے۔ انہوں نے بتایا کہ آسام کو متعدد اہم منصوبے ملے ہیں، جن میں توانائی کے شعبے میں آسام کو خود کفیل بنانے والے منصوبوں سے لے کر آسام آنے والے مسافروں کی سہولت بڑھانے والے اقدامات تک شامل ہیں۔ وزیراعظم نے کہا کہ آج کا دن ملک کے کسانوں اور آسام کے چائے کے باغات میں کام کرنے والے مزدوروں کے لیے بھی نہایت اہم ہے۔ انہوں نے حاضرین کو بتایا کہ پی ایم کسان سمان ندھی اسکیم کے تحت 18,000 کروڑ روپے سے زائد کی رقم ملک بھر کے کروڑوں اَنّ داتا کسانوں کے کھاتوں میں براہِ راست منتقل کی گئی ہے۔ وزیراعظم نے یہ بھی بتایا کہ آسام کے چائے کے باغات سے وابستہ متعدد خاندانوں کو زمین کے پٹّے بھی تقسیم کیے گئے ہیں۔ انہوں نے کہا: ’’ میں آسام کے عوام، یہاں کے تمام خاندانوں اور ملک بھر کے کسانوں کو دل کی گہرائیوں سے مبارکباد پیش کرتا ہوں۔‘‘

وزیراعظم نے کہا کہ ملک بھر کے کسان آج ماں کاماکھیا کی مقدس سرزمین سے اس پروگرام کے ساتھ جڑے ہوئے ہیں۔ انہوں نے بتایا کہ کروڑوں کسانوں کو اپنے کھاتوں میں پی ایم کسان ندھی کی رقم جمع ہونے کے پیغامات موصول ہو چکے ہیں۔ وزیراعظم نے اس اسکیم کو واقعی غیر معمولی قرار دیا۔ انہوں نے یاد دلایا کہ یہی وہ کسان بھائی اور بہنیں ہیں جن میں سے اکثریت کے پاس 2014 سے پہلے نہ موبائل فون تھا اور نہ ہی بینک کھاتہ۔ وزیراعظم نے بتایا کہ اب تک ایسے کروڑوں کسانوں کے کھاتوں میں 4.25 لاکھ کروڑ روپے سے زیادہ رقم جمع کرائی جا چکی ہے۔ انہوں نے خاص طور پر ذکر کیا کہ صرف آسام میں تقریباً 19 لاکھ کسانوں کو اب تک تقریباً 8,000 کروڑ روپے مل چکے ہیں۔ انہوں نے زور دیتے ہوئے کہا: ’’ دنیا کے ترقی یافتہ ممالک بھی اس کی مثال پیش نہیں کر سکتے کہ صرف ایک کلک سے کروڑوں کسانوں کے کھاتوں میں براہِ راست رقم پہنچ جائے۔‘‘

وزیراعظم نے کہا: ’’ آج سمّان ندھی اسکیم ملک کے چھوٹے کسانوں کے لیے سماجی تحفظ کا ایک مؤثر ذریعہ بن چکی ہے۔‘‘ انہوں نے کہا کہ موجودہ حکومت کے لیے کسانوں کی فلاح و بہبود سے زیادہ اہم کوئی چیز نہیں۔ وزیراعظم نے بتایا کہ گزشتہ دس برسوں کے دوران کسانوں کو کم از کم امدادی قیمت (ایم ایس پی) کی صورت میں 20 لاکھ کروڑ روپے سے زیادہ کی رقم حاصل ہوئی ہے۔

وزیراعظم جناب نریندر مودی نے کہا کہ گزشتہ 11 برسوں کے دوران موجودہ حکومت نے ملک کے کسانوں کے لیے ایک مضبوط حفاظتی حصار قائم کیا ہے۔ انہوں نے کہا کہ چاہے کم از کم امدادی قیمت (ایم ایس پی) ہو، سستے قرضے ہوں، فصل بیمہ ہو یا پی ایم کسان سمان ندھی جیسی اسکیمیں—یہ سب آج کسانوں کے لیے ایک مضبوط سہارا اور معاون نظام بن چکی ہیں۔ وزیراعظم نے مزید کہا کہ حکومت نے اس بات کا خاص خیال رکھا ہے کہ عالمی سطح پر پیدا ہونے والے بحرانوں کے اثرات زراعت اور کسانوں تک نہ پہنچیں۔

وزیراعظم نے یاد دلایا کہ کووڈ۔19 وبا اور اس کے بعد ہونے والی جنگوں کے باعث عالمی منڈی میں کھاد کی قیمتیں کئی گنا بڑھ گئی تھیں اور بیرونِ ملک سے کھاد کی فراہمی انتہائی مشکل ہو گئی تھی۔ انہوں نے کہا کہ اس مشکل صورتحال میں مرکزی حکومت نے ہر ممکن کوشش کی کہ اس بحران کا بوجھ کسانوں پر نہ پڑے۔ وزیراعظم نے بتایا کہ عالمی منڈی میں جس یوریا کی ایک بوری تقریباً 3,000 روپے کی پڑتی ہے، وہی حکومت کی جانب سے ہندوستانی کسانوں کو صرف 300 روپے میں فراہم کی گئی۔ انہوں نے زور دے کر کہا: ’’ حکومت نے عالمی سطح پر کھاد کی قیمتوں میں اضافے کا بوجھ کسانوں پر نہ آنے دینے کے لیے اپنے خزانے سے 12 لاکھ کروڑ روپے سے زیادہ خرچ کیے ہیں۔‘‘

وزیراعظم نے کہا کہ گزشتہ ایک دہائی کے دوران موجودہ حکومت نے خود انحصاری کے لیے ایک بڑے پیمانے پر مہم شروع کی ہے۔ انہوں نے کہا کہ زراعت کو بیرونی بحرانوں سے محفوظ رکھنے کے لیے خود کفالت کو فروغ دیا گیا ہے۔ انہوں نے کہا کہ آزاد ہندوستان کی تاریخ میں بارہا دیکھا گیا کہ دنیا کے دوسرے حصوں میں جنگ یا سپلائی چین میں رکاوٹ آنے سے ہندوستانی کسانوں کو مشکلات پیش آتی تھیں—کبھی کھاد مہنگی ہو جاتی تھی اور کبھی ڈیزل اور توانائی کی قیمتیں بڑھ جاتی تھیں۔

وزیراعظم نے کہا کہ حکومت کا ویژن یہ ہے کہ زراعت کو نئی ٹیکنالوجی سے جوڑا جائے، کسانوں کو جدید آبپاشی کے طریقوں سے مربوط کیا جائے اور اس کے نتیجے میں فصلوں کو بھی فائدہ پہنچے۔ انہوں نے کہا کہ اسی مقصد کے تحت حکومت نے ’’ہر قطرہ زیادہ فصل‘‘ کی پالیسی اپنائی اور کسانوں تک مائیکرو آبپاشی کی ٹیکنالوجی، جیسے ڈرِپ اور اسپرنکلر نظام، پہنچایا۔ انہوں نے بتایا کہ اس سے نہ صرف آبپاشی بہتر ہوئی بلکہ لاگت میں بھی کمی آئی۔

وزیراعظم نے مزید کہا کہ حکومت اب کھیتوں کو سولر پمپ سے جوڑنے پر کام کر رہی ہے تاکہ کسانوں کے ڈیزل پر ہونے والے اخراجات کم کیے جا سکیں۔ انہوں نے بتایا کہ اسی مقصد کے لیے مرکز کی جانب سے کُسُم یوجنا شروع کی گئی ہے۔ انہوں نے کہا:
’’آج بہت سے کسان سولر پمپ کے ذریعے نہ صرف آبپاشی کر رہے ہیں بلکہ بجلی پیدا کر کے اس سے آمدنی بھی حاصل کر رہے ہیں۔‘‘

وزیراعظم نے کہا کہ حکومت کسانوں کی کھاد اور کیڑے مار ادویات پر انحصار کم کرنے کے لیے مسلسل کوششیں کر رہی ہے۔ انہوں نے بتایا کہ موجودہ حکومت نے کئی کھاد کے کارخانے دوبارہ فعال کیے ہیں اور کسانوں کو نینو یوریا سے جوڑنے کے لیے متعدد اقدامات کیے گئے ہیں، جن سے آج ملک کے کسان فائدہ اٹھا رہے ہیں۔ انہوں نے مزید کہا کہ اب حکومت کسانوں کو قدرتی کھیتی اختیار کرنے کی ترغیب دے رہی ہے۔

وزیراعظم نے زور دیتے ہوئے کہا: ’’جب بڑے پیمانے پر کسان قدرتی کھیتی اپنائیں گے تو زمین بھی محفوظ رہے گی اور ہمارے اَنّ داتا بھی عالمی بحرانوں سے محفوظ رہیں گے۔‘‘

وزیراعظم جناب نریندر مودی نے کہا کہ موجودہ حکومت کسانوں کے لیے مسلسل اور انتھک محنت کر رہی ہے اور ملک کو خود کفیل بنانے کے لیے سرگرمِ عمل ہے۔ انہوں نے کہا کہ حکومت نے ہندوستان کی ریفائنریوں کی ترقی اور تیل صاف کرنے کی صلاحیت میں اضافے کے لیے نمایاں کام کیا ہے۔ وزیراعظم نے کہا کہ آج ہندوستان ایک ایسا ملک بن چکا ہے جو نہ صرف اپنی توانائی کی ضروریات پوری کرنے کی صلاحیت رکھتا ہے بلکہ دنیا کی توانائی کی ضروریات میں بھی حصہ ڈال سکتا ہے۔ انہوں نے بتایا کہ گزشتہ برسوں میں آسام کی ریفائنریوں میں بھی توسیع کی گئی ہے۔

وزیراعظم نے کہا کہ آسام اور پورے شمال مشرقی خطے میں گیس پائپ لائن کے بنیادی ڈھانچے میں بے مثال سرمایہ کاری کی جا رہی ہے۔ انہوں نے بتایا کہ نومالی گڑھ–سلی گوڑی پائپ لائن کی اپ گریڈیشن مکمل ہو چکی ہے اور آسام کے گولاگھاٹ میں دنیا کا پہلا دوسری نسل کا بایو ایتھانول پلانٹ قائم کیا گیا ہے۔ انہوں نے زور دے کر کہا کہ یہ تمام منصوبے پورے خطے کے لیے بے حد فائدہ مند ثابت ہوں گے۔

وزیراعظم نے کہا کہ گزشتہ ایک دہائی کے دوران ریلوے کو بیرونی وسائل پر انحصار سے آزاد کرنے اور تیل کی درآمدات کم کرنے کے لیے اہم اقدامات کیے گئے ہیں۔ انہوں نے بتایا کہ آج ملک کا تقریباً پورا ریلوے نیٹ ورک برقی خطوط سے منسلک ہو چکا ہے اور جلد ہی 100 فیصد برقی کاری کا ہدف حاصل کر لیا جائے گا۔ انہوں نے کہا کہ ریلوے کی برقی کاری کی بدولت ملک تقریباً 1.75 ارب لیٹر ڈیزل کی بچت کر رہا ہے، اور آسام کے ریلوے نیٹ ورک کی بھی تیزی سے برقی کاری کی جا رہی ہے۔

وزیراعظم نے کہا کہ آسام قابلِ تجدید توانائی سے متعلق قومی اہداف کی تکمیل میں اہم کردار ادا کر رہا ہے۔ انہوں نے بتایا کہ لوور کوپیلی پن بجلی پروجیکٹ نہ صرف آسام بلکہ پورے شمال مشرقی خطے کو فائدہ پہنچائے گا۔ انہوں نے کہا کہ ہزاروں کروڑ روپے کے یہ منصوبے آسام کے نوجوانوں کے لیے روزگار کے نئے مواقع پیدا کر رہے ہیں اور ریاست کی خوشحالی میں اضافہ کر رہے ہیں۔

وزیراعظم نے کہا کہ موجودہ ڈبل انجن حکومت کی پہچان اس کی حساسیت اور بہتر حکمرانی ہے۔ انہوں نے زور دے کر کہا کہ ملک کے ہر خطے اور معاشرے کے ہر طبقے کی ترقی حکومت کی ترجیح ہے۔ انہوں نے بتایا کہ اسی جذبے کے تحت آج آسام کے چائے کے باغات کے مزدوروں کے لیے ایک بڑا قدم اٹھایا گیا ہے۔ وزیراعظم نے کہا کہ انہی محنت کشوں کی محنت نے آسام کی عالمی شناخت کو مضبوط بنایا ہے اور ان کے اگائے ہوئے چائے کی خوشبو نے دنیا بھر میں ہندوستان کی پہچان بنائی ہے۔

وزیراعظم نے کہا کہ آج موجودہ حکومت ان محنت کشوں کو عزت بھی دے رہی ہے اور سہارا بھی فراہم کر رہی ہے۔ انہوں نے آسام کے وزیر اعلیٰ ہمنتا بسوا سرما اور ان کی پوری ٹیم کو چائے کے باغات سے وابستہ خاندانوں کے لیے شاندار کام کرنے پر مبارکباد دی۔ وزیراعظم نے کہا کہ آسام حکومت اس تاریخی ناانصافی کو ختم کرنے کے لیے کام کر رہی ہے اور اب ان خاندانوں کو اپنی زمین مل رہی ہے، جس کے بعد انہیں پکے مکانات فراہم کرنے کی راہ بھی ہموار ہو گئی ہے۔

وزیراعظم نے کہا کہ اس اقدام سے خاص طور پر چائے کے باغات میں رہنے والی خواتین کو بہت فائدہ ہوگا۔ انہوں نے اپنی خواہش کا اظہار کرتے ہوئے کہا کہ چائے کے باغات کے مزدور خاندانوں کے بچے اچھی تعلیم حاصل کریں اور زندگی میں آگے بڑھیں۔ انہوں نے مزید کہا کہ موجودہ حکومت نے اس مقصد کے لیے تمام ضروری سہولیات فراہم کی ہیں۔

وزیراعظم جناب نریندر مودی نے اعلان کیا کہ آج سے مشہور نیماتی گھاٹ اور بشوناتھ گھاٹ پر جدید کروز ٹرمینلز کی تعمیر کا کام بھی شروع کر دیا گیا ہے۔ انہوں نے زور دے کر کہا کہ یہ صرف ایک بنیادی ڈھانچے کا منصوبہ نہیں بلکہ ایسا قدم ہے جو آسام میں سیاحت اور مقامی معیشت کو نئی سمت دے گا۔

وزیراعظم نے کہا کہ موجودہ حکومت نے سیاحت کو صرف سیر و سیاحت تک محدود نہیں رکھا بلکہ اسے روزگار اور ترقی کے ایک بڑے موقع کے طور پر دیکھا ہے۔ انہوں نے بتایا کہ اسی ویژن کے تحت دریائے برہم پتر پر آبی سیاحت کے امکانات کو وسیع کیا جا رہا ہے۔

وزیراعظم نے کہا کہ جب یہ کروز ٹرمینلز مکمل ہو جائیں گے تو برہم پتر پر کروز سروس مزید ترقی کرے گی اور ہندوستان سمیت دنیا بھر کے سیاحوں کے لیے آسام تک پہنچنا اور بھی آسان ہو جائے گا۔ انہوں نے کہا کہ جیسے جیسے کروز سیاحت بڑھے گی ویسے ویسے مقامی نوجوانوں کے لیے روزگار کے نئے مواقع پیدا ہوں گے، دستکاروں اور ہنرمندوں کو اپنی مصنوعات کے لیے نئی منڈیاں ملیں گی، اور چھوٹے دکانداروں، کشتی بانوں اور ہوٹل و ٹرانسپورٹ سے وابستہ افراد کی آمدنی میں بھی اضافہ ہوگا۔

وزیراعظم نے زور دیتے ہوئے کہا: ’’ آسام میں سیاحت اب صرف سفر اور تفریح تک محدود نہیں رہی بلکہ یہ مقامی ترقی اور عوامی خوشحالی کا ایک نیا محرک بنتی جا رہی ہے۔‘‘ وزیراعظم نے کہا کہ آج آسام ہندوستان کے شمال مشرقی خطے ’اشٹ لکشمی‘ کے نئے مستقبل کے لیے ایک نمونہ بنتا جا رہا ہے۔ انہوں نے کہا کہ آسام کی ترقی پورے شمال مشرقی خطے کو نئی رفتار دے رہی ہے۔ انہوں نے ہر نوجوان اور ہر خاندان سے اپیل کرتے ہوئے کہا: ’’ہم سب کو ایک ترقی یافتہ آسام کے لیے مل کر کام کرنا ہوگا تاکہ آسام پورے ملک کے لیے ایک مثالی ریاست بن کر ابھرے۔‘‘

A range of important welfare and infrastructure initiatives are being launched from Guwahati, which will boost Assam’s growth and benefit people across the state.
https://t.co/Bod2BIgvqY

— Narendra Modi (@narendramodi) March 13, 2026

पीएम किसान सम्मान निधि योजना देश के छोटे किसानों के लिए, सामाजिक सुरक्षा का एक माध्यम बन गई है: PM @narendramodi in Guwahati

— PMO India (@PMOIndia) March 13, 2026

MSP हो, सस्ता ऋण हो, फसल बीमा हो, पीएम किसान सम्मान निधि हो… ये योजनाएं किसानों का बहुत बड़ा संबल बनी हैं।

इतना ही नहीं, हमने इस बात का ध्यान रखा है कि अंतरराष्ट्रीय स्तर पर संकट का असर खेती-किसानी पर ना पड़े: PM @narendramodi

— PMO India (@PMOIndia) March 13, 2026

असम, देश में रीन्यूएबल एनर्जी से जुड़े संकल्पों की सिद्धि में भी बड़ी भूमिका निभा रहा है।

लोअर कोपिली हाइड्रो पावर प्रोजेक्ट से असम सहित पूरे नॉर्थ ईस्ट को फायदा होगा: PM @narendramodi

— PMO India (@PMOIndia) March 13, 2026

देश के हर क्षेत्र, हर वर्ग का विकास हमारी प्राथमिकता है।

इसी भाव के साथ… आज असम के टी-गार्डन में काम करने वाले साथियों के लिए बहुत बड़ी पहल हुई है: PM @narendramodi

— PMO India (@PMOIndia) March 13, 2026

असम, आज हमारे नॉर्थ ईस्ट यानि अष्टलक्ष्मी के नए भविष्य का एक मॉडल बन रहा है।

यहां की प्रगति पूरे नॉर्थ ईस्ट को नई गति दे रही है: PM @narendramodi

— PMO India (@PMOIndia) March 13, 2026

******

ش ح۔ ش ا ر۔ ول

Uno- 4053