પીએમઇન્ડિયા

મહામહિમ,

મહાનુભવો

નમસ્કાર!

17મી બ્રિક્સ સમિટનું ભવ્ય આયોજન કરવા બદલ હું રાષ્ટ્રપતિ લુલાનો હૃદયપૂર્વક આભાર માનું છું. બ્રાઝિલના અધ્યક્ષતા હેઠળ બ્રિક્સ હેઠળના અમારા સહયોગને નવી ગતિ અને ઉર્જા મળી છે. નવી ઉર્જા એસ્પ્રેસો નહીં, પરંતુ ડબલ એસ્પ્રેસો શોટ છે! આ માટે હું રાષ્ટ્રપતિ લુલાની દૂરંદેશી અને તેમની અતૂટ પ્રતિબદ્ધતાની પ્રશંસા કરું છું. ભારત વતી હું મારા મિત્ર રાષ્ટ્રપતિ પ્રબોવોને ઇન્ડોનેશિયાના બ્રિક્સ પરિવારમાં જોડાવા બદલ હાર્દિક અભિનંદન અને શુભેચ્છાઓ પાઠવું છું.

મિત્રો,

ગ્લોબલ સાઉથ ઘણીવાર બેવડા ધોરણોનો ભોગ બન્યું છે. પછી ભલે તે વિકાસ હોય, સંસાધનોનું વિતરણ હોય કે સુરક્ષા સંબંધિત મુદ્દાઓ હોય, ગ્લોબલ સાઉથના હિતોને પ્રાથમિકતા આપવામાં આવી નથી. ક્લાઇમેટ ફાઇનાન્સ, ટકાઉ વિકાસ અને ટેકનોલોજી ઍક્સેસ જેવા મુદ્દાઓ પર, ગ્લોબલ સાઉથને ઘણીવાર પ્રતીકાત્મક સંકેતો સિવાય કંઈ મળ્યું નથી.

મિત્રો,

20મી સદીમાં રચાયેલી વૈશ્વિક સંસ્થાઓમાં બે તૃતીયાંશ માનવતાનું પૂરતું પ્રતિનિધિત્વ કરવામાં આવ્યું નથી. આજના વૈશ્વિક અર્થતંત્રમાં મુખ્ય યોગદાન આપનારા દેશોને નિર્ણય લેવાના ટેબલ પર સ્થાન આપવામાં આવ્યું નથી. આ ફક્ત પ્રતિનિધિત્વનો પ્રશ્ન નથી, પરંતુ વિશ્વસનીયતા અને અસરકારકતાનો પણ પ્રશ્ન છે. ગ્લોબલ સાઉથ વિના, આ સંસ્થાઓ સિમ કાર્ડવાળા મોબાઇલ જેવી લાગે છે પણ નેટવર્ક નથી. આ સંસ્થાઓ 21મી સદીના પડકારોનો સામનો કરવામાં અસમર્થ છે. ભલે તે વિશ્વના વિવિધ ભાગોમાં ચાલી રહેલા સંઘર્ષો હોય, રોગચાળો હોય, આર્થિક કટોકટી હોય કે સાયબર અને અવકાશમાં નવા ઉભરતા પડકારો હોય, આ સંસ્થાઓ પાસે કોઈ ઉકેલ નથી.

મિત્રો,

આજે વિશ્વને એક નવા બહુધ્રુવીય અને સમાવિષ્ટ વિશ્વ વ્યવસ્થાની જરૂર છે. આની શરૂઆત વૈશ્વિક સંસ્થાઓમાં વ્યાપક સુધારાઓથી કરવી પડશે. સુધારાઓ ફક્ત પ્રતીકાત્મક ન હોવા જોઈએ, પરંતુ તેમની વાસ્તવિક અસર પણ દૃશ્યમાન હોવી જોઈએ. શાસન માળખા, મતદાન અધિકારો અને નેતૃત્વની સ્થિતિમાં પરિવર્તન આવવું જોઈએ. નીતિ–નિર્માણમાં ગ્લોબલ સાઉથના દેશોના પડકારોને પ્રાથમિકતા આપવી જોઈએ.

મિત્રો,

બ્રિક્સનું વિસ્તરણ અને નવા મિત્રોનું જોડાણ એ વાતનો પુરાવો છે કે બ્રિક્સ એક એવું સંગઠન છે જે સમય અનુસાર પોતાને બદલવાની ક્ષમતા ધરાવે છે. હવે આપણે યુએન સુરક્ષા પરિષદ, ડબલ્યુટીઓ અને બહુપક્ષીય વિકાસ બેંકો જેવી સંસ્થાઓમાં સુધારા માટે સમાન ઇચ્છાશક્તિ દર્શાવવી પડશે. એઆઈના યુગમાં, જ્યાં ટેકનોલોજી દર અઠવાડિયે અપડેટ થાય છે, તે સ્વીકાર્ય નથી કે કોઈ વૈશ્વિક સંસ્થા દર એંસી વર્ષમાં એકવાર પણ અપડેટ ન થાય. એકવીસમી સદીનું સોફ્ટવેર વીસમી સદીના ટાઇપરાઇટર દ્વારા ચલાવી શકાતું નથી!

મિત્રો,

ભારતે હંમેશા પોતાના હિતોથી ઉપર ઉઠીને માનવતાના હિતમાં કામ કરવાનું પોતાનું કર્તવ્ય માન્યું છે. અમે બ્રિક્સ દેશો સાથે મળીને તમામ વિષયો પર રચનાત્મક યોગદાન આપવા માટે સંપૂર્ણપણે પ્રતિબદ્ધ છીએ. ખૂબ ખૂબ આભાર.

AP/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964@gmail.com [ 0KB ]