പിഎം ഇന്ത്യ

ആദരണീയനായ എന്റെ സുഹൃത്ത്, പ്രസിഡന്റ് പുടിൻ, 
ഇരു രാജ്യങ്ങളിലേയും പ്രതിനിധികളേ,
മാധ്യമ സുഹൃത്തുക്കളേ,

നമസ്‌കാരം!

ഡോബ്രി ഡെൻ!

ഇന്ന് 23-ാമത് ഇന്ത്യ-റഷ്യ ഉച്ചകോടിയിലേക്ക് പ്രസിഡന്റ് പുടിനെ സ്വാഗതം ചെയ്യുന്നതിൽ എനിക്ക് സന്തോഷമുണ്ട്. നമ്മുടെ ഉഭയകക്ഷി ബന്ധം നിരവധി ചരിത്ര നാഴികക്കല്ലുകളിലൂടെ കടന്നുപോകുന്ന സമയത്താണ് അദ്ദേഹത്തിന്റെ സന്ദർശനം. കൃത്യം 25 വർഷം മുമ്പ്, പ്രസിഡന്റ് പുടിൻ നമ്മുടെ തന്ത്രപരമായ പങ്കാളിത്തത്തിന് അടിത്തറയിട്ടു. പതിനഞ്ച് വർഷങ്ങൾക്ക് മുമ്പ്, 2010 ൽ, നമ്മുടെ പങ്കാളിത്തം “പ്രത്യേകവും സവിശേഷ പദവിയുള്ളതുമായ തന്ത്രപരമായ പങ്കാളിത്തം” എന്ന തലത്തിലേക്ക് ഉയർത്തപ്പെട്ടു.

കഴിഞ്ഞ രണ്ടര പതിറ്റാണ്ടുകളായി, അദ്ദേഹം തന്റെ നേതൃത്വവും കാഴ്ചപ്പാടും ഉപയോഗിച്ച് ഈ ബന്ധത്തെ നിരന്തരം പരിപോഷിപ്പിച്ചു. അദ്ദേഹത്തിന്റെ നേതൃത്വം എല്ലാ സാഹചര്യങ്ങളിലും നമ്മുടെ പരസ്പര ബന്ധങ്ങളെ പുതിയ ഉയരങ്ങളിലേക്ക് ഉയർത്തി. ഇന്ത്യയുമായുള്ള ആഴത്തിലുള്ള സൗഹൃദത്തിനും അചഞ്ചലമായ പ്രതിബദ്ധതയ്ക്കും എന്റെ സുഹൃത്ത് പ്രസിഡന്റ് പുടിന് ഞാൻ ആത്മാർത്ഥമായി നന്ദി പറയുന്നു.

സുഹൃത്തുക്കളേ,

കഴിഞ്ഞ എട്ട് പതിറ്റാണ്ടുകളായി, ലോകം നിരവധി ഉയർച്ച താഴ്ചകൾക്ക് സാക്ഷ്യം വഹിച്ചിട്ടുണ്ട്. മാനവികത നിരവധി വെല്ലുവിളികളും പ്രതിസന്ധികളും നേരിട്ടിട്ടുണ്ട്. എന്നാൽ, ഈ സാഹര്യത്തിലെല്ലാം, ഇന്ത്യ-റഷ്യ സൗഹൃദം വഴികാട്ടുന്ന ഒരു നക്ഷത്രം പോലെ സ്ഥിരത പുലർത്തുന്നു. പരസ്പര ബഹുമാനത്തിലും ആഴത്തിലുള്ള വിശ്വാസത്തിലും പടുത്തുയർത്തിയ നമ്മുടെ ബന്ധം കാലത്തിന്റെ പരീക്ഷണത്തെ അതിജീവിച്ചു.

ഇന്ന്, ഈ അടിത്തറ കൂടുതൽ ശക്തിപ്പെടുത്തുന്നതിനായി നമ്മുടെ സഹകരണത്തിന്റെ എല്ലാ വശങ്ങളും ഞങ്ങൾ ചർച്ച ചെയ്തു. നമ്മുടെ സാമ്പത്തിക സഹകരണം പുതിയ ഉയരങ്ങളിലേക്ക് ഉയർത്തുക എന്നത് ഒരു പരസ്പര മുൻഗണനയാണ്. ഇത് സാക്ഷാത്കരിക്കുന്നതിനായി, 2030 വരെ ഒരു സാമ്പത്തിക സഹകരണ പരിപാടിയിൽ ഇരു കൂട്ടരും പരസ്പര സമ്മതം നടത്തിയിട്ടുണ്ട്. ഇത് നമ്മുടെ വ്യാപാരത്തെയും നിക്ഷേപത്തെയും കൂടുതൽ വൈവിധ്യപൂർണ്ണവും സന്തുലിതവും സുസ്ഥിരവുമാക്കും; കൂടാതെ ഇത് നമ്മുടെ സഹകരണ മേഖലകൾക്ക് പുതിയ മാനങ്ങൾ നൽകുകയും ചെയ്യും.

ഇന്ന്, പ്രസിഡന്റ് പുടിനും എനിക്കും ഇന്ത്യ-റഷ്യ ബിസിനസ് ഫോറത്തിൽ പങ്കെടുക്കാൻ അവസരം ലഭിക്കും. ഈ പ്ലാറ്റ്‌ഫോം നമ്മുടെ ബിസിനസ്സ് ബന്ധങ്ങൾക്ക് പുതിയ പ്രചോദനം നൽകുമെന്ന് എനിക്ക് ഉറപ്പുണ്ട്. കയറ്റുമതി, സഹ-ഉൽപ്പാദനം, സഹ-നവീകരണം എന്നിവയ്‌ക്കുള്ള പുതിയ വഴികൾ ഇത് തുറക്കും.

യുറേഷ്യൻ ഇക്കണോമിക് യൂണിയനുമായുള്ള സ്വതന്ത്ര വ്യാപാര കരാർ എത്രയും വേഗം പൂർത്തിയാക്കുന്നതിനായി ഇരുപക്ഷവും സജീവമായി പ്രവർത്തിക്കുന്നു. കൃഷി, വളം എന്നീ മേഖലകളിലെ നമ്മുടെ അടുത്ത സഹകരണം ഭക്ഷ്യസുരക്ഷയ്ക്കും കർഷക ക്ഷേമത്തിനും അത്യന്താപേക്ഷിതമാണ്. ഈ സഹകരണം മുന്നോട്ട് കൊണ്ടുപോകുന്നതിലൂടെ, ഇരുപക്ഷവും ഇപ്പോൾ യൂറിയ ഉൽപാദനത്തിൽ ഒരുമിച്ച് പ്രവർത്തിക്കുന്നതിൽ എനിക്ക് സന്തോഷമുണ്ട്.

സുഹൃത്തുക്കളേ,

നമ്മുടെ ഇരു രാജ്യങ്ങളും തമ്മിലുള്ള കണക്ടിവിറ്റി മെച്ചപ്പെടുത്തുക എന്നത് ഞങ്ങളുടെ ഒരു പ്രധാന മുൻഗണനയാണ്. INSTC, വടക്കൻ സമുദ്ര പാത, ചെന്നൈ-വ്‌ളാഡിവോസ്റ്റോക്ക് ഇടനാഴികൾ എന്നിവയിൽ പുതുക്കിയ ഊർജ്ജവുമായി ഞങ്ങൾ മുന്നോട്ട് പോകും. ധ്രുവ ജല മേഖലകളിലെ പ്രവർത്തനങ്ങൾക്കായി ഇന്ത്യയിലെ നാവികർക്ക് പരിശീലനം നൽകുന്നതിനായി നമ്മൾ ഇപ്പോൾ സഹകരിക്കുമെന്നതിൽ എനിക്ക് സന്തോഷമുണ്ട്. ഇത് ആർട്ടിക് മേഖലയിലെ നമ്മുടെ സഹകരണത്തെ ശക്തിപ്പെടുത്തുക മാത്രമല്ല, ഇന്ത്യയിലെ യുവാക്കൾക്ക് പുതിയ തൊഴിലവസരങ്ങൾ സൃഷ്ടിക്കുകയും ചെയ്യും.

അതുപോലെ, കപ്പൽ നിർമ്മാണത്തിലെ ഞങ്ങളുടെ ശക്തമായ സഹകരണത്തിന് മെയ്ക്ക് ഇൻ ഇന്ത്യയെ കൂടുതൽ ശക്തിപ്പെടുത്താനുള്ള കഴിവുണ്ട്. തൊഴിലവസരങ്ങൾ, കഴിവുകൾ, പ്രാദേശിക ബന്ധം എന്നിവ വർദ്ധിപ്പിക്കുന്ന ഞങ്ങളുടെ വിജയകരമായ പങ്കാളിത്തത്തിന്റെ മറ്റൊരു മികച്ച ഉദാഹരണമാണിത്.

ഇന്ത്യ-റഷ്യ പങ്കാളിത്തത്തിന്റെ ശക്തവും സുപ്രധാനവുമായ ഒരു സ്തംഭമാണ് ഊർജ്ജ സുരക്ഷ. സിവിൽ ആണവോർജ്ജ മേഖലയിലെ ഞങ്ങളുടെ പതിറ്റാണ്ടുകളായി നിലനിൽക്കുന്ന സഹകരണം ഞങ്ങളുടെ പങ്കിട്ട ശുദ്ധ-ഊർജ്ജ മുൻഗണനകൾ മുന്നോട്ട് കൊണ്ടുപോകുന്നതിൽ ഒരു പ്രധാന പങ്ക് വഹിച്ചിട്ടുണ്ട്. ഈ വിജയകരമായ സഹകരണം ഞങ്ങൾ മുന്നോട്ട് കൊണ്ടുപോകുന്നത് തുടരും.

ലോകമെമ്പാടുമുള്ള സുരക്ഷിതവും വൈവിധ്യപൂർണ്ണവുമായ വിതരണ ശൃംഖലകൾ ഉറപ്പാക്കുന്നതിന് നിർണായക ധാതുക്കളിലെ ഞങ്ങളുടെ സഹകരണം അത്യന്താപേക്ഷിതമാണ്. ശുദ്ധമായ ഊർജ്ജം, ഹൈടെക് നിർമ്മാണം, നവയുഗ വ്യവസായങ്ങൾ എന്നിവയിലെ നമ്മുടെ പങ്കാളിത്തത്തിന് ഇത് ശക്തമായ പിന്തുണ നൽകും.

സുഹൃത്തുക്കളേ,

ഇന്ത്യ-റഷ്യ ബന്ധങ്ങളിൽ സാംസ്കാരിക സഹകരണവും ജനങ്ങൾ തമ്മിലുള്ള ബന്ധവും ഒരു പ്രത്യേക സ്ഥാനം വഹിക്കുന്നു. പതിറ്റാണ്ടുകളായി, ഇരു രാജ്യങ്ങളിലെയും ജനങ്ങൾ പരസ്പരം ആഴത്തിലുള്ള വാത്സല്യവും ബഹുമാനവും ഊഷ്മളതയും പങ്കിട്ടു. ഈ ബന്ധങ്ങൾ കൂടുതൽ ശക്തിപ്പെടുത്തുന്നതിന് ഞങ്ങൾ നിരവധി പുതിയ നടപടികൾ സ്വീകരിച്ചിട്ടുണ്ട്.

അടുത്തിടെ, റഷ്യയിൽ രണ്ട് പുതിയ ഇന്ത്യൻ കോൺസുലേറ്റുകൾ തുറന്നു. ഇത് നമ്മുടെ പൗരന്മാർ തമ്മിലുള്ള ഇടപഴകലിനെ കൂടുതൽ സുഗമമാക്കുകയും അവരുടെ പരസ്പര ബന്ധങ്ങൾ കൂടുതൽ ആഴത്തിലാക്കുകയും ചെയ്യും. ഈ വർഷം ഒക്ടോബറിൽ, ‘കൽമീകിയ’യിലെ അന്താരാഷ്ട്ര ബുദ്ധിസ്റ്റ് ഫോറത്തിൽ ദശലക്ഷക്കണക്കിന് ഭക്തർക്ക് ഭഗവാൻ ബുദ്ധന്റെ വിശുദ്ധ അവശേഷിപ്പുകളുടെ അനുഗ്രഹം ലഭിച്ചു.

റഷ്യൻ പൗരന്മാർക്ക് 30 ദിവസത്തെ സൗജന്യ ഇ-ടൂറിസ്റ്റ് വിസയും 30 ദിവസത്തെ ഗ്രൂപ്പ് ടൂറിസ്റ്റ് വിസയും ഞങ്ങൾ ഉടൻ അവതരിപ്പിക്കുമെന്നതിൽ എനിക്ക് സന്തോഷമുണ്ട്.

മനുഷ്യശക്തിയുടെ ചലനാത്മകത നമ്മുടെ ആളുകളെ ബന്ധിപ്പിക്കുക മാത്രമല്ല, ഇരു രാജ്യങ്ങൾക്കും പുതിയ ശക്തിയും പുതിയ അവസരങ്ങളും സൃഷ്ടിക്കുകയും ചെയ്യും. ഈ സഹകരണം പ്രോത്സാഹിപ്പിക്കുന്നതിനായി ഇന്ന് രണ്ട് കരാറുകൾ അന്തിമ ധാരണയായതിൽ എനിക്ക് സന്തോഷമുണ്ട്. തൊഴിലധിഷ്ഠിത വിദ്യാഭ്യാസം, നൈപുണ്യം, പരിശീലനം എന്നിവയിൽ ഞങ്ങൾ ഒരുമിച്ച് പ്രവർത്തിക്കും. നമ്മുടെ വിദ്യാർത്ഥികൾ, പണ്ഡിതന്മാർ, കായികതാരങ്ങൾ എന്നിവർ തമ്മിലുള്ള കൈമാറ്റവും ഞങ്ങൾ വർദ്ധിപ്പിക്കും.

സുഹൃത്തുക്കളേ,

ഇന്ന് നമ്മൾ പ്രാദേശിക, ആഗോള വിഷയങ്ങളും ചർച്ച ചെയ്തു. തുടക്കം മുതൽ, ഉക്രെയ്നിലെ സ്ഥിതിഗതികൾ സംബന്ധിച്ച് ഇന്ത്യ സമാധാനത്തിനായി വാദിച്ചു. ഈ വിഷയത്തിൽ സമാധാനപരവും ശാശ്വതവുമായ ഒരു പരിഹാരത്തിനായി നടത്തുന്ന എല്ലാ ശ്രമങ്ങളെയും ഞങ്ങൾ സ്വാഗതം ചെയ്യുന്നു.  ഇതിൽ സംഭാവന നൽകാൻ ഇന്ത്യ എപ്പോഴും തയ്യാറായിട്ടുണ്ട്, എപ്പോഴും തയ്യാറാകും.

ഭീകരതയ്‌ക്കെതിരായ പോരാട്ടത്തിൽ ഇന്ത്യയും റഷ്യയും വളരെക്കാലമായി തോളോട് തോൾ ചേർന്ന് നിലകൊള്ളുന്നു. പഹൽഗാമിലെ ഭീകരാക്രമണമായാലും ക്രോക്കസ് സിറ്റി ഹാളിലെ ഭീരുത്വം നിറഞ്ഞ ആക്രമണമായാലും, അത്തരം എല്ലാ സംഭവങ്ങളുടെയും മൂലകാരണം ഒന്നുതന്നെയാണ്. ഭീകരത മാനവികതയുടെ മൂല്യങ്ങൾക്കു നേരെയുള്ള നേരിട്ടുള്ള ആക്രമണമാണെന്നും അതിനെതിരായ ആഗോള ഐക്യമാണ് നമ്മുടെ ഏറ്റവും വലിയ ശക്തിയെന്നും ഇന്ത്യ ഉറച്ചു വിശ്വസിക്കുന്നു.

ഐക്യരാഷ്ട്രസഭ, ജി20, ബ്രിക്‌സ്, എസ്‌സി‌ഒ, മറ്റ് പ്ലാറ്റ്‌ഫോമുകൾ എന്നിവയിൽ ഇന്ത്യയും റഷ്യയും അടുത്ത സഹകരണം നിലനിർത്തിയിട്ടുണ്ട്. സമാനമായ ഇഴചേർന്ന  ഏകോപനത്തോടെ മുന്നോട്ട് പോകുമ്പോൾ, ഈ ഫോറങ്ങളിലെല്ലാം നമ്മുടെ സംഭാഷണവും സഹകരണവും തുടരും.

ബഹുമാന്യ വ്യക്തിത്വമേ,

വരും കാലങ്ങളിൽ, നമ്മുടെ സൗഹൃദം ആഗോള വെല്ലുവിളികളെ നേരിടാൻ നമ്മെ പ്രാപ്തരാക്കുമെന്നും ഈ ആത്മവിശ്വാസം നാം പങ്കിടുന്ന ഭാവിയെ കൂടുതൽ സമ്പന്നമാക്കുമെന്നും എനിക്ക് ഉറപ്പുണ്ട്.

ഇന്ത്യാ സന്ദർശനത്തിന് താങ്കൾക്കും താങ്കളുടെ മുഴുവൻ പ്രതിനിധി സംഘത്തിനും ഒരിക്കൽ കൂടി ഞാൻ ആത്മാർത്ഥമായി നന്ദി പറയുന്നു.

സ്പാസിബ

****