পি এম ইণ্ডিয়া

ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীয়ে ৩ জুলাইৰ পৰা ৪ জুলাই, ২০২৫লৈ ত্ৰিনিদাদ আৰু ট’বেগোৰ প্ৰধানমন্ত্ৰী কমলা পাৰছাদ-বিচেছৰৰ আমন্ত্ৰণত ত্ৰিনিদাদ আৰু ট’বেগো ভ্ৰমণ কৰে।

২৬ বছৰৰ  পিছত ভাৰতীয় প্ৰধানমন্ত্ৰীৰ এয়া প্ৰথমটো ঐতিহাসিক দ্বিপাক্ষিক ভ্ৰমণ। এই ভ্ৰমণ গভীৰ তাৎপৰ্য্যপূৰ্ণ আছিল, কিয়নো ই ১৮৪৫ চনত ত্ৰিনিদাদ আৰু ট’বেগোলৈ ভাৰতীয় অনুপ্ৰৱেশকাৰীৰ আগমনৰ ১৮০ বছৰীয়া জয়ন্তীৰ সৈতে সংগতি ৰাখি দুয়োখন দেশৰ মাজত দীৰ্ঘদিনীয়া বন্ধুত্বৰ মূল আধাৰ।

প্ৰধানমন্ত্ৰী নৰেন্দ্ৰ মোদীয়ে প্ৰধানমন্ত্ৰী কমলা পাৰছাদ-বিছেছাৰক শেহতীয়া নিৰ্বাচনী বিজয়ৰ বাবে অভিনন্দন জনোৱাৰ লগতে ভাৰত আৰু ত্ৰিনিদাদ আৰু ট’বেগোৰ মাজত দ্বিপাক্ষিক সম্পৰ্ক সুদৃঢ় কৰাৰ ক্ষেত্ৰত তেওঁৰ উজ্জ্বল অৱদানৰ প্ৰশংসা কৰে।

ভাৰত আৰু বিশ্ব মঞ্চত প্ৰধানমন্ত্ৰী নৰেন্দ্ৰ মোদীৰ ব্যতিক্ৰমী নেতৃত্বৰ স্বীকৃতি স্বৰূপে তেওঁক অৰ্ডাৰ অৱ দ্য ৰিপাব্লিক অৱ ত্ৰিনিদাদ এণ্ড ট’বেগো-দেশৰ সৰ্বোচ্চ ৰাষ্ট্ৰীয় সন্মান প্ৰদান কৰা হয়।

দুয়োগৰাকী প্ৰধানমন্ত্ৰীয়ে পাৰস্পৰিক স্বাৰ্থৰ দ্বিপাক্ষিক, আঞ্চলিক আৰু বিশ্ব বিস্তৃত বিষয়সমূহৰ ওপৰত বিস্তৃত আলোচনাত মিলিত হয়। দুয়োগৰাকী নেতাই সম্পৰ্কৰ গভীৰতা আৰু বিস্তৃততাক লৈ সন্তুষ্টি প্ৰকাশ কৰি স্বাস্থ্য, আইচিটি, সংস্কৃতি, ক্ৰীড়া, বাণিজ্য, অৰ্থনৈতিক উন্নয়ন, কৃষি, ন্যায়, আইনী বিষয়, শিক্ষা আৰু দক্ষতা বিকাশৰ দৰে ক্ষেত্ৰত বহল ভিত্তিৰ, সৰ্বাংগীন আৰু আগন্তুক দৃষ্টিকোণৰ অংশীদাৰিত্ব গঢ়ি তোলাৰ সংকল্প পুনৰ দৃঢ় কৰে।

দুয়োগৰাকী নেতাই শান্তি আৰু নিৰাপত্তাৰ প্ৰতি সন্ত্ৰাসবাদে সৃষ্টি কৰা উমৈহতীয়া ভাবুকি স্বীকাৰ কৰে। তেওঁলোকে সন্ত্ৰাসবাদৰ তীব্ৰ নিন্দা আৰু দৃঢ় বিৰোধিতা পুনৰবাৰ প্ৰকাশ কৰে। সীমা অতিক্ৰম কৰি সন্ত্ৰাসবাদকে ধৰি সন্ত্ৰাসবাদী কাৰ্যকলাপৰ কোনো ন্যায্যতা থাকিব নোৱাৰে বুলি ঘোষণা কৰে।

ঔষধ, উন্নয়ন সহযোগিতা, শিক্ষা, সাংস্কৃতিক বিনিময়, কূটনৈতিক প্ৰশিক্ষণ আৰু ক্ৰীড়াকে ধৰি মূল খণ্ডসমূহত গুৰুত্বপূৰ্ণ চুক্তি আৰু বুজাবুজিৰ চুক্তি স্বাক্ষৰিত হোৱাটোক আদৰণি জনায়। নেতাসকলে ২০২৪ চনৰ নৱেম্বৰ মাহত অনুষ্ঠিত দ্বিতীয় ভাৰত–কেৰিকম সন্মিলনৰ ফলাফলৰ কথা মনত পেলাই তাত ঘোষণা কৰা পদক্ষেপসমূহৰ ৰূপায়ণ ত্বৰান্বিত কৰাৰ প্ৰতিশ্ৰুতি দিয়ে।

ডিজিটেল ডমেইনত সহযোগিতা সম্প্ৰসাৰণৰ বাবে দুয়োখন দেশে তীব্ৰ আগ্ৰহ প্ৰকাশ কৰে। প্ৰধানমন্ত্ৰী মোদীয়ে ভাৰতৰ ধ্বজাবাহী ডিজিটেল পেমেণ্ট প্লেটফৰ্ম ইউনিফাইড পেমেণ্টছ ইন্টাৰফেচ (ইউপিআই) গ্ৰহণ কৰা প্ৰথমখন কেৰিবিয়ান দেশ হিচাপে ত্ৰিনিদাদ আৰু ট’বেগোক অভিনন্দন জনায়। তেওঁলোকে ডিজিলকাৰ, ই-চাইন আৰু চৰকাৰী ই-মাৰ্কেটপ্লেচ (জিইএম)কে ধৰি ইণ্ডিয়া ষ্টেক সমাধান ৰূপায়ণৰ ক্ষেত্ৰত অধিক সহযোগিতা অন্বেষণ কৰিবলৈ সন্মত হয়। ত্ৰিনিদাদ আৰু ট’বেগোৱে ৰাজ্যিক ভূমি পঞ্জীয়নৰ বাবে ব্যৱস্থাটো ডিজিটেলাইজেচন আৰু উন্নীতকৰণৰ ক্ষেত্ৰত ভাৰতৰ পৰা সহায় বিচাৰিছিল। ডিজিটেল শাসন আৰু জনসেৱা প্ৰদানে সৰ্বাংগীন উন্নয়ন, উদ্ভাৱন আৰু ৰাষ্ট্ৰীয় প্ৰতিযোগিতামূলক ক্ষমতাৰ সক্ষমকাৰী হিচাপে কাম কৰিব পাৰে বুলিও নেতাসকলে আলোকপাত কৰে।

প্ৰধানমন্ত্ৰী মোদীয়ে প্ৰধানমন্ত্ৰী পাৰছাদ-বিচেছৰৰ শিক্ষাক ডিজিটেলাইজ কৰাৰ অভিলাষী দৃষ্টিভংগীক প্ৰশংসা কৰে আৰু ত্ৰিনিদাদ আৰু ট’বেগোৰ ধ্বজাবাহী শৈক্ষিক কাৰ্যসূচীক সমৰ্থন কৰিবলৈ ২০০০টা লেপটপ উপহাৰ দিয়াৰ কথা ঘোষণা কৰে। প্ৰধানমন্ত্ৰী মোদীয়ে ত্ৰিনিদাদ আৰু ট’বেগোৰ ছাত্ৰ-ছাত্ৰীসকলক ভাৰত চৰকাৰে আগবঢ়োৱা বিভিন্ন বৃত্তি কাৰ্যসূচীৰ অধীনত ভাৰতৰ উচ্চ শিক্ষাৰ সুযোগ বিচাৰি উলিয়াবলৈও উৎসাহিত কৰে।

নেতাসকলে কৃষি আৰু খাদ্য সুৰক্ষাক আন এক অগ্ৰাধিকাৰ ক্ষেত্ৰ হিচাপে চিহ্নিত কৰে। খাদ্য প্ৰক্ৰিয়াকৰণ আৰু সংৰক্ষণৰ বাবে ভাৰতে ১০ লাখ মাৰ্কিন ডলাৰৰ কৃষি যন্ত্ৰৰ উপহাৰ, ত্ৰিনিদাদ আৰু ট’বেগোৰ ৰাষ্ট্ৰীয় কৃষি বিপণন আৰু উন্নয়ন নিগম (নামডেভিচিঅ’)ক প্ৰশংসা কৰা হয়। প্ৰধানমন্ত্ৰী মোদীয়ে এক প্ৰতীকী অনুষ্ঠানৰ সময়ত নামডেভকোৰ বাবে প্ৰথমটো মেচিন অৰ্পণ কৰে। প্ৰধানমন্ত্ৰী মোদীয়ে প্ৰাকৃতিক কৃষি, সাগৰীয় শাক-পাচলি ভিত্তিক সাৰ, বাজৰা খেতিৰ ক্ষেত্ৰতো ভাৰতৰ সহায় আগবঢ়ায়।

স্বাস্থ্যসেৱাৰ সন্দৰ্ভত প্ৰধানমন্ত্ৰী মোদীয়ে ভাৰতীয় ফাৰ্মাকোপিয়াক স্বীকৃতি দিয়াৰ বাবে প্ৰশংসা কৰে যিয়ে ঔষধ খণ্ডত ঘনিষ্ঠ সহযোগিতা নিশ্চিত কৰিব আৰু ভাৰতৰ পৰা ত্ৰিনিদাদ আৰু ট’বেগোৰ জনসাধাৰণৰ বাবে গুণগত আৰু সুলভ মূল্যৰ জেনেৰিক ঔষধৰ সুবিধা লাভ কৰাৰ লগতে ভাৰতত চিকিৎসাৰ ব্যৱস্থাও উন্নত কৰিব। তেওঁ লগতে ঘোষণা কৰে যে পৰৱৰ্তী মাহত ত্ৰিনিদাদ আৰু ট’বেগোত ৮০০ ব্যক্তিৰ বাবে কৃত্ৰিম অংগ ফিটমেণ্ট শিবিৰৰ আয়োজন কৰা হ’ব। প্ৰধানমন্ত্ৰী কমলা পাৰছাদ-বিছেছাৰে প্ৰধানমন্ত্ৰী মোদীক স্বাস্থ্যসেৱাৰ সহায়ৰ বাবে ধন্যবাদ জ্ঞাপন কৰে যিয়ে স্বাস্থ্যসেৱাৰ সহযোগিতাক ঔষধ আৰু সঁজুলি যোগান ধৰিব। তেওঁ ভাৰত চৰকাৰৰ পৰা বিশটা (২০) হিমোডায়েলাইছিছ ইউনিট আৰু দুখন (২) ছি এম্বুলেন্স দান কৰি উন্নতমানৰ স্বাস্থ্যসেৱা প্ৰদানত সহায় কৰাৰ বাবে ত্ৰিনিদাদ আৰু ট’বেগোৰ কৃতজ্ঞতা প্ৰকাশ কৰে।

ত্ৰিনিদাদ আৰু ট’বেগোৱে উন্নয়ন সহযোগিতাৰ মূল্যৰ ওপৰত গুৰুত্ব আৰোপ কৰাৰ লগতে দ্ৰুত প্ৰভাৱ প্ৰকল্পৰ বুজাবুজি চুক্তি স্বাক্ষৰ কৰাটোক আদৰণি জনায়, যিয়ে ভাৰতৰ সহায়ত ত্ৰিনিদাদ আৰু ট’বেগোত সম্প্ৰদায় উন্নয়ন প্ৰকল্পসমূহ সময়োপযোগী আৰু ফলপ্ৰসূভাৱে ৰূপায়ণ কৰিবলৈ সক্ষম কৰিব।

প্ৰধানমন্ত্ৰী পাৰছাদ-বিছেছাৰে ক’ভিড-১৯ মহামাৰীৰ জটিল সময়ত বহুমূলীয়া মানৱ জীৱন ৰক্ষাৰ ক্ষেত্ৰত ভাৰতৰ অগ্ৰণী ভূমিকাক প্ৰশংসা কৰে। ভাৰতৰ ক্ষিপ্ৰ সঁহাৰিৰ শলাগ লৈ তেওঁ ত্ৰিনিদাদ আৰু ট’বেগোলৈ ক’ভিড ভেকচিন আৰু চিকিৎসা সঁজুলিৰ যোগানৰ মূল্য দিয়ে। বিশেষকৈ ১০ লাখ মাৰ্কিন ডলাৰৰ ক’ভিড-১৯ প্ৰকল্পৰ ‘HALT (High and Low Technology)’ৰ অধীনত ভাৰতৰ সহায়ৰ শলাগ লয়, য’ত মোবাইল হেল্থকেয়াৰ ৰবট, টেলিমেডিচিন কিট আৰু হেণ্ড হাইজিন ষ্টেচনৰ যোগান ধৰা হয়।

প্ৰধানমন্ত্ৰী মোদীয়ে ত্ৰিনিদাদ আৰু ট’বেগোৰ ক’লিচন ফৰ ডিজাষ্টাৰ ৰেজিলিয়েণ্ট ইনফ্ৰাষ্ট্ৰাকচাৰ (চিডিআৰআই) আৰু বৈশ্বিক জৈৱ ইন্ধন মৈত্ৰীত যোগদান কৰাৰ সিদ্ধান্তক আদৰণি জনায়, যিয়ে জলবায়ু কাৰ্য্য, সুস্থিৰতা গঢ়ি তোলা আৰু বহনক্ষম উন্নয়নৰ প্ৰতি তেওঁলোকৰ ভাগ-বতৰা দায়বদ্ধতাক প্ৰতিফলিত কৰে। দুৰ্যোগৰ আশংকা হ্ৰাসৰ বাবে ভাৰতে প্ৰস্তুত কৰা আগতীয়া সতৰ্কবাণী ব্যৱস্থাত অধিক সহযোগিতা অন্বেষণ কৰিবলৈ নেতাসকলে সন্মত হয়। ত্ৰিনিদাদ আৰু ট’বেগো চৰকাৰে বৈদেশিক আৰু কেৰিকম পৰিক্ৰমা মন্ত্ৰালয়ৰ মুখ্য কাৰ্যালয়ৰ বাবে ছাদৰ ওপৰত ফটোভল্টিক (পিভি) ব্যৱস্থা প্ৰদানৰ বাবে ভাৰতৰ অনুদানৰ প্ৰস্তাৱকো শলাগ লয়। প্ৰধানমন্ত্ৰী পাৰছাদ-বিছেছাৰে প্ৰধানমন্ত্ৰী মোদীৰ দূৰদৰ্শী ‘মিছন লাইফ’ পদক্ষেপৰ শলাগ লয়, যিয়ে মননশীল উপভোগ আৰু বহনক্ষম জীৱন-যাপনৰ জীৱনশৈলীক প্ৰসাৰিত কৰে। জলবায়ু সচেতন আচৰণৰ দিশত বিশ্ব নাগৰিকক সংগঠিত কৰাৰ ক্ষেত্ৰত ইয়াৰ প্ৰাসংগিকতাক স্বীকাৰ কৰে।

সামৰ্থ্য বিকাশক ত্ৰিনিদাদ আৰু ট’বেগোৰ সৈতে ভাৰতৰ অংশীদাৰিত্বৰ এক গুৰুত্বপূৰ্ণ স্তম্ভ হিচাপে স্বীকৃতি দিয়া হৈছিল। ত্ৰিনিদাদ আৰু ট’বেগো পক্ষই তেওঁলোকৰ যুৱক-যুৱতীসকলৰ সামৰ্থ্য বিকাশৰ বাবে ভাৰতে বছৰি ৮৫টা আইটিইচি স্লট বহুল ক্ষেত্ৰত আগবঢ়োৱাৰ শলাগ লয়। ভাৰতীয় পক্ষই তেওঁলোকৰ বিষয়াসকলৰ বৃহৎ পৰিসৰৰ প্ৰশিক্ষণৰ বাবে ত্ৰিনিদাদ আৰু ট’বেগোলৈ বিশেষজ্ঞ আৰু প্ৰশিক্ষক প্ৰেৰণ কৰিবলৈ ইচ্ছা প্ৰকাশ কৰে।

প্ৰধানমন্ত্ৰী মোদীয়ে ত্ৰিনিদাদ আৰু ট’বেগোৰ বিষয়া-কৰ্মীসকলক ফৰেনছিক বিজ্ঞান আৰু ন্যায় ব্যৱস্থাৰ ক্ষেত্ৰত সামৰ্থ্য গঢ়ি তোলাৰ ক্ষেত্ৰত সহযোগিতা আগবঢ়াবলৈ ইচ্ছা প্ৰকাশ কৰে, য’ত ভাৰতৰ পৰা ত্ৰিনিদাদ আৰু ট’বেগোলৈ প্ৰশিক্ষক আৰু বিশেষজ্ঞক প্ৰেৰণ কৰাকে ধৰি তেওঁলোকক প্ৰশিক্ষণৰ বাবে ভাৰতলৈ প্ৰেৰণ কৰে।

দুয়োগৰাকী নেতাই দুয়োখন দেশৰ ব্যৱসায়িক সহায়ক সংস্থাসমূহৰ মাজত প্ৰত্যক্ষ চেনেলক উৎসাহিত কৰি বৃহত্তৰ দ্বিপাক্ষিক বাণিজ্য আৰু বিনিয়োগ বিনিময়ৰ প্ৰয়োজনীয়তাৰ ওপৰত গুৰুত্ব আৰোপ কৰে।

দুয়োগৰাকী নেতাই দেশসমূহৰ মাজত শক্তিশালী ক্ৰীড়া সম্পৰ্ক, বিশেষকৈ ক্ৰিকেটৰ প্ৰতি থকা উমৈহতীয়া আকৰ্ষণক উদযাপন কৰে। প্ৰশিক্ষণ, প্ৰতিভা বিনিময়, আন্তঃগাঁথনি উন্নয়ন আৰু যৌথ সামৰ্থ্য বিকাশৰ বাবে ক্ৰীড়া সহযোগিতাৰ বুজাবুজি চুক্তি স্বাক্ষৰ কৰাটো তেওঁলোকে আদৰণি জনায়। প্ৰধানমন্ত্ৰী মোদীয়ে ভাৰতৰ ত্ৰিনিদাদ আৰু ট’বেগোৰ উচ্চাকাংক্ষী যুৱতী ক্ৰিকেটাৰক প্ৰশিক্ষণ দিয়াৰ প্ৰস্তাৱো পুনৰবাৰ উল্লেখ কৰে।

সাংস্কৃতিকভাৱে উল্লেখযোগ্য ইংগিতেৰে প্ৰধানমন্ত্ৰী মোদীয়ে ভাৰতৰ ত্ৰিনিদাদ এণ্ড ট’বেগোৰ পণ্ডিতসকলৰ এটা দলৰ বাবে প্ৰশিক্ষণ দিয়াৰ কথা ঘোষণা কৰে। এই পণ্ডিতসকলে ভাৰতৰ ‘গীতা মহোৎসৱ’তো অংশগ্ৰহণ কৰিব। প্ৰধানমন্ত্ৰী কমলা পাৰছাদ-বিছেছাৰে এই ইংগিতৰ বাবে প্ৰশংসা প্ৰকাশ কৰি ভাৰতত উদযাপনৰ লগত সংগতি ৰাখি ত্ৰিনিদাদ আৰু ট’বেগোত গীতা মহোৎসৱ যৌথভাৱে উদযাপন কৰাৰ ভাৰতীয় প্ৰস্তাৱক উৎসাহেৰে সমৰ্থন কৰে।

সাংস্কৃতিক সহযোগিতাৰ সন্দৰ্ভত দুয়োজন নেতাই দ্বিপাক্ষিক ‘সাংস্কৃতিক বিনিময়ৰ কাৰ্যসূচী’ৰ প্ৰগতিশীল ভূমিকাক লক্ষ্য কৰে যাৰ জৰিয়তে ১৯৯৭ চনত মহাত্মা গান্ধী সাংস্কৃতিক সহযোগিতা প্ৰতিষ্ঠান স্থাপন কৰা হৈছিল।২০২৫-২৮ চনৰ বাবে এই কাৰ্যসূচী নবীকৰণৰ বাবে বুজাবুজি চুক্তি স্বাক্ষৰিত হৈছিল। নবীকৃত বুজাবুজি চুক্তিৰ অধীনত ত্ৰিনিদাদ আৰু ট’বেগোৱে দুয়োখন দেশৰ সৈতে সাংস্কৃতিক সম্পৰ্ক বৃদ্ধিৰ বাবে পাৰ্কাচন (ষ্টীল পান) আৰু অন্যান্য ধৰণৰ সাংস্কৃতিক প্ৰকাশৰ শিল্পীক ভাৰতলৈ প্ৰেৰণ কৰিব। প্ৰধানমন্ত্ৰী মোদীয়ে সমগ্ৰ দেশতে যোগ আৰু হিন্দী ভাষাৰ প্ৰসাৰৰ বাবে ত্ৰিনিদাদ আৰু ট’বেগো চৰকাৰক ধন্যবাদ জ্ঞাপন কৰে। তেওঁ ভাৰতৰ পৰা যোগ প্ৰশিক্ষক পঠিয়াবলৈ আৰু ত্ৰিনিদাদ আৰু ট’বেগোৰ ৰাষ্ট্ৰীয় বিদ্যালয়ৰ পাঠ্যক্ৰমত যোগক অন্তৰ্ভুক্ত কৰাৰ সমৰ্থন আগবঢ়ায়।

দুয়োগৰাকী প্ৰধানমন্ত্ৰীয়ে স্মৰণ কৰে যে ২০২৫ চনৰ ৩০ মে’ত ১৮৪৫ চনত ত্ৰিনিদাদ আৰু ট’বেগোলৈ প্ৰথম ভাৰতীয় অনুপ্ৰৱেশকাৰীৰ আগমনৰ ১৮০ বছৰ সম্পূৰ্ণ হ’ল। তেওঁলোকে সাংস্কৃতিক পৰ্যটনৰ স্থান হিচাপে নেলচন দ্বীপৰ গুৰুত্ব আৰু ৰাষ্ট্ৰীয় আৰ্কাইভত ভাৰতীয় আগমন আৰু অন্যান্য ৰেকৰ্ডৰ ডিজিটেলাইজেচনৰ প্ৰয়োজনীয়তাক স্বীকাৰ কৰে। প্ৰধানমন্ত্ৰী মোদীয়ে ভাৰত চৰকাৰৰ ত্ৰিনিদাদ এণ্ড ট’বেগোৰ ভাৰতীয় প্ৰব্ৰজনকাৰীৰ ষষ্ঠ প্ৰজন্মলৈকে ভাৰতৰ বহিঃৰাজ্য নাগৰিকত্ব (OCI) কাৰ্ড প্ৰদানৰ সিদ্ধান্তও ঘোষণা কৰে।

দুয়োগৰাকী প্ৰধানমন্ত্ৰীয়ে ৱেষ্ট ইণ্ডিজ বিশ্ববিদ্যালয়ত হিন্দী আৰু ভাৰতীয় অধ্যয়নৰ একাডেমিক চেয়াৰৰ পুনৰুজ্জীৱিতকৰণক আদৰণি জনায়, যিয়ে ভাৰত আৰু ত্ৰিনিদাদ আৰু ট’বেগোৰ মাজত শৈক্ষিক আৰু সাংস্কৃতিক সংযোগ গভীৰ কৰাত সহায় কৰিব আৰু আয়ুৰ্বেদৰ প্ৰাচীন প্ৰজ্ঞা আৰু ঐতিহ্যৰ প্ৰসাৰক প্ৰসাৰিত কৰিব।

দুয়োজন নেতাই ভাৰত-ত্ৰিনিদাদ আৰু ট’বেগো সংসদীয় বন্ধুত্ব গোটক পুনৰুজ্জীৱিত কৰা; ভাৰতত ত্ৰিনিদাদ আৰু ট’বেগোৰ সাংসদসকলক প্ৰশিক্ষণ দিয়া; আৰু সংসদীয় প্ৰতিনিধি দলসমূহে ইজনে সিখন দেশলৈ নিয়মীয়াকৈ ভ্ৰমণৰ আদান-প্ৰদানৰ প্ৰয়োজনীয়তাৰ ওপৰত গুৰুত্ব আৰোপ কৰে।

দুয়োপক্ষই আঞ্চলিক আৰু আন্তঃৰাষ্ট্ৰীয় উন্নয়নৰ ওপৰতো মত বিনিময় কৰে আৰু শান্তি, জলবায়ু ন্যায়, সৰ্বাংগীন উন্নয়ন, আৰু গ্ল’বেল চাউথৰ কণ্ঠ বৃদ্ধিৰ প্ৰতি তেওঁলোকৰ ভাগ-বতৰা দায়বদ্ধতা পুনৰবাৰ উল্লেখ কৰে। বহুপক্ষীয় মঞ্চসমূহত প্ৰদান কৰা মূল্যৱান পাৰস্পৰিক সমৰ্থনৰ বাবে তেওঁলোকে শলাগ লয়।

নেতাসকলে বৰ্তমানৰ বিশ্ব বাস্তৱতাক ভালদৰে প্ৰতিফলিত কৰিবলৈ ৰাষ্ট্ৰসংঘৰ নিৰাপত্তা পৰিষদৰ সম্প্ৰসাৰণকে ধৰি ৰাষ্ট্ৰসংঘত ব্যাপক সংস্কাৰৰ প্ৰয়োজনীয়তা পুনৰ দৃঢ় কৰে। বৰ্ধিত ভূ-ৰাজনৈতিক উত্তেজনা আৰু বিশ্ব সংঘাতক স্বীকৃতি দি দুয়োজন নেতাই আলোচনা আৰু কূটনীতিক আগুৱাই যোৱাৰ পথ হিচাপে আহ্বান জনায়। ৰাষ্ট্ৰসংঘৰ সম্প্ৰসাৰিত নিৰাপত্তা পৰিষদৰ স্থায়ী সদস্যপদৰ বাবে ভাৰতক পূৰ্ণ সমৰ্থন আগবঢ়াইছে ত্ৰিনিদাদ আৰু ট’বেগোৱে। ইয়াৰ উপৰিও ২০২৭-২৮ চনৰ বাবে ৰাষ্ট্ৰসংঘৰ নিৰাপত্তা পৰিষদৰ অস্থায়ী আসনৰ বাবে ত্ৰিনিদাদ আৰু ট’বেগোৰ প্ৰাৰ্থীত্বক ভাৰতে সমৰ্থন কৰিব বুলিও সহমতত উপনীত হয়; আনহাতে ত্ৰিনিদাদ আৰু ট’বেগোৱে ২০২৮-২৯ চনৰ বাবে ভাৰতৰ প্ৰাৰ্থীত্বক সমৰ্থন কৰিব।

প্ৰধানমন্ত্ৰী মোদীয়ে তেওঁক প্ৰদান কৰা অসাধাৰণ আতিথ্যৰ বাবে ত্ৰিনিদাদ আৰু ট’বেগো চৰকাৰ আৰু জনসাধাৰণৰ প্ৰতি আন্তৰিক ধন্যবাদ জ্ঞাপন কৰে। তেওঁ প্ৰধানমন্ত্ৰী কমলা পাৰছাদ-বিছেছাৰক পাৰস্পৰিক সুবিধাজনক সময়ত ভাৰত ভ্ৰমণৰ বাবে আমন্ত্ৰণ জনায়। প্ৰধানমন্ত্ৰী কমলা পাৰছাদ-বিছেছাৰে প্ৰধানমন্ত্ৰী মোদীকো পাৰস্পৰিক সুবিধাজনক সময়ত পুনৰ ত্ৰিনিদাদ আৰু ট’বেগো ভ্ৰমণলৈ আমন্ত্ৰণ জনায়। ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীৰ ত্ৰিনিদাদ আৰু ট’বেগোলৈ অতি সফল আনুষ্ঠানিক ভ্ৰমণৰ ফলাফলে উভয় ৰাষ্ট্ৰৰ মাজত উন্নীত দ্বিপাক্ষিক সম্পৰ্কৰ নতুন যুগৰ পথ প্ৰশস্ত কৰা বুলি নেতাসকলে একমত প্ৰকাশ কৰে আৰু ভাৰত–ত্ৰিনিদাদ আৰু ট’বেগোৰ এক শক্তিশালী, সৰ্বাংগীন, আৰু আগন্তুক দৃষ্টিভংগীৰ অংশীদাৰিত্বৰ প্ৰতি তেওঁলোকৰ ভাগ-বতৰা দায়বদ্ধতাক পুনৰ দৃঢ় কৰে।

****

MJPS/ST