পি এম ইণ্ডিয়া

জোহাৰ!

দেশৰ বিভিন্ন স্থানৰ পৰা আহি এই অনুষ্ঠানত সমবেত হোৱা আপোনালোক সকলোকে জনজাতীয় গৌৰৱ দিৱসৰ আন্তৰিক শুভেচ্ছা জনাইছোঁ।ধৰতী আবা ভগৱান বীৰছা মুণ্ডাৰ জয়ন্তীত মই তেওঁক গভীৰ শ্ৰদ্ধাৰে প্ৰণাম জনাইছোঁ।জনজাতীয় গৌৰৱ দিৱস হৈছে দেশৰ এনে এটা উৎসৱ, যাৰ সৈতে জনজাতীয় সমাজৰ গৌৰৱ আৰু ভগৱান বীৰছা মুণ্ডাৰ আদৰ্শ তথা প্ৰেৰণাৰ সম্পৰ্ক জড়িত হৈ আছে।

এই একেই উদ্যম আৰু প্ৰেৰণাৰে আজি সমগ্ৰ দেশতে জনজাতীয় গৌৰৱ দিৱসৰ কাৰ্যসূচী অনুষ্ঠিত হৈছে।দেশে আজি গৌৰৱেৰে নিজৰ জনজাতীয় বীৰ-বীৰাংগনাসকলক স্মৰণ কৰিছে।

বিশেষকৈ মহাৰাষ্ট্ৰৰ গড়চিৰোলীত ইমান বৃহৎ পৰিসৰত এই অনুষ্ঠান অনুষ্ঠিত হৈছে যে মই দেখিবলৈ পোৱা সকলো দিশতে কেৱল মানুহৰ সমাগম দেখিবলৈ পাইছোঁ।গড়চিৰোলীৰ জনজাতীয় সমাজৰ সমৃদ্ধিশালী সংস্কৃতি আছে।ৰাঘোজী ভাংগ্ৰে, ভাগোজী নাইক আৰু বীৰ বাবুৰাও শেডমাকেৰ দৰে বীৰসকলৰ বীৰত্বগাথা এই ভূমিৰ সৈতে জড়িত হৈ আছে।এই উপলক্ষে মই সকলো জনজাতীয় বীৰক গভীৰ শ্ৰদ্ধাৰে প্ৰণাম জনাইছোঁ।

এই অনুষ্ঠানত দেশৰ বিভিন্ন প্ৰান্তৰ পৰা অংশগ্ৰহণ কৰা সকলো ৰাজ্যপাল, সন্মানীয় মুখ্যমন্ত্ৰী, উপ-মুখ্যমন্ত্ৰী আৰু প্ৰতিগৰাকী জনপ্ৰতিনিধিকো মই আন্তৰিক অভিনন্দন জনাইছোঁ।

বন্ধুসকল,

২০২১ চনৰ ১৫ নৱেম্বৰৰ পৰা জনজাতীয় গৌৰৱ দিৱস উদযাপনৰ যি পৰম্পৰা আৰম্ভ হৈছিল, আজি সেয়া এটা ৰাষ্ট্ৰীয় উৎসৱত পৰিণত হৈছে।যোৱা বছৰ ভগৱান বীৰছা মুণ্ডাৰ ১৫০সংখ্যক জয়ন্তী উপলক্ষে সমগ্ৰ দেশতে দুই লাখতকৈও অধিক কাৰ্যসূচী অনুষ্ঠিত হৈছিল।কোটি কোটি দেশবাসীয়ে এই কাৰ্যসূচীসমূহত অংশগ্ৰহণ কৰিছিল।এটা সময় আছিল, যেতিয়া আমাৰ দেশত বহু দিৱস আৰু উৎসৱ বিদেশী দৃষ্টিভংগীৰে নিৰ্ধাৰণ কৰা হৈছিল।কিন্তু আজি ভাৰতে নিজৰ ঐতিহ্য, ইতিহাস আৰু মহান ব্যক্তিসকলক স্বদেশী আত্মগৌৰৱৰ মনোভাৱেৰে সন্মানসহকাৰে স্মৰণ কৰিছে।এয়া আমাৰ ৰাষ্ট্ৰীয় চেতনাত হোৱা  বৃহৎ পৰিৱৰ্তনৰ প্ৰতীক।

বন্ধুসকল,

স্বাধীনতা সংগ্ৰামৰ সময়ত খাছি পাহাৰত তিৰোত সিঙৰ সংগ্ৰামেই হওক, ছোটনাগপুৰৰ কোল বিদ্ৰোহেই হওক অথবা সিদ্ধু-কানহুৰ নেতৃত্বত হোৱা চাওতাল বিদ্ৰোহেই হওক, জনজাতীয় সমাজে সদায় অন্যায়ৰ বিৰুদ্ধে নিজৰ কণ্ঠ উচ্চাৰণ কৰি আহিছে।মানগড়ৰ ভূমিত গোবিন্দ গুৰুৰ অনুগামীসকলে দেশৰ বাবে আত্মবলিদান দিছিল।ৰাণী গাইদিনলিউ, তান্তিয়া ভীলৰ দৰে অসংখ্য বীৰ-বীৰাংগনাই নিজৰ সাহস আৰু বীৰত্বৰে দেশবাসীক অনুপ্ৰাণিত কৰিছিল।আল্লুৰী সীতাৰাম ৰাজু আৰু ৰাণী দুৰ্গাৱতীৰ দৰে মহান ব্যক্তিত্বয়েও জনজাতীয় আন্দোলনসমূহক নতুন শক্তি আৰু প্ৰেৰণা যোগাইছিল।এই সকলো বীৰত্বগাথাৰ লগতে ভগৱান বীৰছা মুণ্ডাৰ উলগুলান আৰু অতি কম বয়সতে তেওঁ কৰা সংগ্ৰাম আজিও কোটি কোটি দেশবাসীৰ বাবে বৃহৎ প্ৰেৰণাৰ উৎস হৈ আছে।

বন্ধুসকল,

আজি জনজাতীয় গৌৰৱ দিৱসৰ এই পৱিত্ৰ উপলক্ষত দেশৰ বিভিন্ন ৰাজ্যত জনজাতীয় উন্নয়নৰ সৈতে জড়িত ১৭০টাতকৈও অধিক প্ৰকল্প উদ্বোধন কৰা হৈছে আৰু ৭০টাতকৈও অধিক প্ৰকল্পৰ আধাৰশিলা স্থাপন কৰা হৈছে।মিজোৰামত মহান স্বাধীনতা সংগ্ৰামী ৰোপু-ইলিয়ানিৰ নামত উৎসৰ্গিত সংগ্ৰহালয় উদ্বোধন কৰা হৈছে।অৰুণাচল প্ৰদেশত জনজাতীয় গৱেষণা প্ৰতিষ্ঠানৰ নতুন ভৱনো উদ্বোধন কৰা হৈছে।ইয়াৰ উপৰি উদ্বোধন আৰু আধাৰশিলা স্থাপন কৰা প্ৰকল্পসমূহৰ ভিতৰত শিক্ষাৰ সৈতে জড়িত প্ৰতিষ্ঠান, স্বাস্থ্যসেৱা, জনজাতীয় সামগ্ৰীৰ বিপণনৰ বাবে কেন্দ্ৰ আৰু গাঁওসমূহৰ মৌলিক আন্তঃগাঁথনিৰ সম্প্ৰসাৰণৰ সৈতে জড়িত বহুতো কাম অন্তৰ্ভুক্ত হৈ আছে।দেশৰ বিভিন্ন ৰাজ্যত প্ৰায় ৩০ হাজাৰ কোটি টকা ব্যয়সাপেক্ষ প্ৰকল্পসমূহ উদ্বোধন আৰু আধাৰশিলা স্থাপন কৰা হৈছে।এই সকলো প্ৰকল্পৰ বাবে মই আপোনালোক সকলোকে আৰু সমগ্ৰ দেশবাসীক আন্তৰিক অভিনন্দন জনাইছোঁ।

বন্ধুসকল,

আজিৰ এই অনুষ্ঠান এনে এটা সময়ত অনুষ্ঠিত হৈছে, যেতিয়া দেশৰ দুটা বৃহৎ সফলতাক লৈ সকলোতে চৰ্চা চলিছে।প্ৰথমটো সফলতা হৈছে—দেশৰ প্ৰায় ৫০ কোটি লোকে ভয়াৱহ দৰিদ্ৰতাক পৰাস্ত কৰি দৰিদ্ৰতাৰ পৰা মুক্তি লাভ কৰা।আৰু দ্বিতীয়টো সফলতা হৈছে—দেশৰ পৰা নক্সালবাদ আৰু মাওবাদী সন্ত্ৰাসৰ অৱসান তথা মাওবাদী সন্ত্ৰাসৰ কবলৰ পৰা মুক্তি লাভ।এই দুয়োটা সফলতা আমাৰ জনজাতীয় ভাই-ভনীসকলৰ জীৱনৰ সৈতে গভীৰভাৱে জড়িত।সেইবাবেই কেইসপ্তাহমান পূৰ্বে বিশ্ব বেংকৰ এখন প্ৰতিবেদন প্ৰকাশ পাইছিল। সেই প্ৰতিবেদনত কোৱা হৈছে যে যোৱা ১২-১৩ বছৰত ভাৰতৰ প্ৰায় ৫০ কোটি লোকে দৰিদ্ৰতাৰ ভয়াৱহ অৱস্থাৰ পৰা মুক্তি লাভ কৰিছে।এই সংখ্যাটো অতি বৃহৎ।মই ইয়াক স্বাধীনতাৰ পিছত দেশৰ অন্যতম বৃহৎ সফলতা হিচাপে গণ্য কৰোঁ।এয়া সমগ্ৰ দেশৰ সফলতা। ইয়াৰ কৃতিত্ব কোনো এখন চৰকাৰৰ নহয়।ইয়াৰ আঁৰত আছে সমাজৰ সামূহিক শক্তি আৰু দেশৰ প্ৰতিগৰাকী নাগৰিকৰ প্ৰচেষ্টা তথা কঠোৰ পৰিশ্ৰম।যোৱা বছৰসমূহত কেন্দ্ৰীয় চৰকাৰে জনজাতীয় কল্যাণৰ বাবে গ্ৰহণ কৰা সিদ্ধান্ত আৰু ৰূপায়ণ কৰা আঁচনিসমূহেও এই সফলতাত গুৰুত্বপূৰ্ণ ভূমিকা পালন কৰিছে।এই সফলতাৰ বাবে মই সকলো দেশবাসীক, বিশেষকৈ মোৰ জনজাতীয় ভাই-ভনীসকলক আন্তৰিক অভিনন্দন জনাইছোঁ।

বন্ধুসকল,

ইমান বৃহৎ সংখ্যক লোকৰ দৰিদ্ৰতাৰ পৰা মুক্তি লাভ কৰাটো নিজেই এটা বৃহৎ পৰিৱৰ্তন।এই পৰিৱৰ্তন হৈছে বৃহৎ সংকল্প বাস্তৱায়িত কৰাৰ দীৰ্ঘ যাত্ৰাৰ কাহিনী।এটা সংকল্প কেনেদৰে বাস্তৱায়িত কৰিব পাৰি, সেয়া আজি ভাৰতে কৰি দেখুৱাব পাৰে, প্ৰতিগৰাকী ভাৰতীয়ই কৰি দেখুৱাব পাৰে—এই আত্মবিশ্বাস আমাৰ মাজত সৃষ্টি হৈছে।আমি এটা সংকল্প গ্ৰহণ কৰিছিলোঁ যে দশক দশক ধৰি উন্নয়নৰ সুবিধাৰ পৰা বঞ্চিত হৈ থকা লোকসকলক অগ্ৰাধিকাৰ দিব লাগিব।আমাৰ সংকল্পসমূহ যিমানেই বাস্তৱ ৰূপত মাটিত নামি আহিবলৈ ধৰিলে, সিমানেই ইতিবাচক পৰিৱৰ্তনৰ ধাৰা সৃষ্টি হ’বলৈ ধৰিলে।দেশৰ যিবোৰ জনজাতীয় অঞ্চল পিছপৰা অঞ্চলসমূহৰ ভিতৰতো অধিক পিছপৰা আছিল, য’ত জীৱনৰ মৌলিক সা-সুবিধাসমূহো উপস্থিত হোৱা নাছিল, সেই অঞ্চলসমূহৰ উন্নয়নৰ বাবে আমাৰ চৰকাৰে নিজৰ সম্পূৰ্ণ সামৰ্থ্য নিয়োগ কৰিছে।প্ৰধানমন্ত্ৰী-জনমন আঁচনি আৰু ধৰতী আবা জনজাতীয় গ্ৰাম উৎকৰ্ষ অভিযান—এই দুয়োখন আঁচনিৰ বাবে আমি এক লাখ কোটি টকাতকৈও অধিক ধনৰ বাজেট নিৰ্ধাৰণ কৰিছোঁ।আমাৰ প্ৰচেষ্টা হৈছে, স্বাধীনতাৰ পিছত যিসকল পৰিয়ালৰ ওচৰলৈ আটাইতকৈ পলমকৈ সা-সুবিধাসমূহ গৈছিল, এতিয়া সেই পৰিয়ালসমূহৰ ওচৰলৈ আটাইতকৈ ক্ষিপ্ৰতাৰে সকলো সা-সুবিধা পঠিয়াব লাগে।

বন্ধুসকল,

বঞ্চিতসকলক অগ্ৰাধিকাৰ, বঞ্চিতসকলক অগ্ৰাধিকাৰ—এয়াই হৈছে আমাৰ প্ৰধান লক্ষ্য।দেশৰ দৰিদ্ৰ পৰিয়ালসমূহৰ বাবে আমি চাৰি কোটিতকৈও অধিক পকী ঘৰ নিৰ্মাণ কৰিছোঁ।দেশৰ ১৮ হাজাৰখন গাঁৱলৈ বিদ্যুৎ সংযোগ প্ৰদান কৰিছোঁ, যিবোৰ গাঁৱত স্বাধীনতাৰ ইমান দশক পাৰ হৈ যোৱাৰ পিছতো বিদ্যুতৰ ব্যৱস্থা নাছিল।আয়ুষ্মান ভাৰত আঁচনিৰ জৰিয়তে পাঁচ লাখ টকা পৰ্যন্ত বিনামূলীয়া চিকিৎসাৰ সুবিধা প্ৰদান কৰা হৈছে।সমগ্ৰ দেশতে এক লাখ ৭৫ হাজাৰতকৈও অধিক আয়ুষ্মান আৰোগ্য মন্দিৰ স্থাপন কৰা হৈছে। ইয়াৰ ফলত দূৰ-দূৰণিৰ জনজাতীয় অঞ্চলসমূহৰ লোকসকলেও স্বাস্থ্যসেৱাৰ সুবিধা লাভ কৰিছে।যেতিয়া দৰিদ্ৰ পৰিয়ালসমূহে শৌচাগাৰৰ সুবিধা লাভ কৰিলে আৰু পৰিষ্কাৰ-পৰিচ্ছন্নতাৰ ব্যৱস্থা উন্নত হ’ল, তেতিয়া বহুতো ৰোগৰ আশংকাও হ্ৰাস পালে।

বন্ধুসকল,

দৰিদ্ৰতাক পৰাস্ত কৰিবলৈ দৰিদ্ৰ পৰিয়ালসমূহৰ উপাৰ্জনৰ সুযোগ বৃদ্ধি কৰাটোও সমানেই প্ৰয়োজনীয় আছিল।আমি মুদ্ৰা আঁচনিৰ জৰিয়তে কোনো ধৰণৰ জামিন অবিহনে ঋণ লাভৰ সুবিধা প্ৰদান কৰিছোঁ।এই আঁচনিৰ অধীনত লাখ লাখ কোটি টকাৰ আৰ্থিক সাহায্য প্ৰদান কৰা হৈছে।এই ধৰণৰ সকলো আঁচনিৰ সুবিধা দৰিদ্ৰ লোকসকলে লাভ কৰিছে, অনুসূচিত জাতিৰ লোকসকলে লাভ কৰিছে, পিছপৰা শ্ৰেণীৰ লোকসকলে লাভ কৰিছে আৰু আমাৰ জনজাতীয় ভাই-ভনীসকলেও লাভ কৰিছে।ইয়াৰ ফলত তেওঁলোকৰ মাজত জীৱনত আগবাঢ়ি যোৱাৰ  নতুন আত্মবিশ্বাসৰ সৃষ্টি হৈছে।

বন্ধুসকল,

আমি সেই অঞ্চলসমূহৰ প্ৰতিও বিশেষ গুৰুত্ব আৰোপ কৰিছোঁ, যিবোৰ অঞ্চল দীৰ্ঘদিন ধৰি উন্নয়নৰ ক্ষেত্ৰত পিছপৰি আছিল।দেশৰ ১০০খনতকৈও অধিক আকাংক্ষী জিলা আৰু ৫০০খনতকৈও অধিক আকাংক্ষী উন্নয়ন খণ্ডত উন্নয়ন, সা-সুবিধা প্ৰদান আৰু নাগৰিকৰ অধিকাৰ সুৰক্ষিত কৰাৰ বাবে বিশেষ অভিযান চলোৱা হৈছে।এই অঞ্চলসমূহৰ ভিতৰত বৃহৎ সংখ্যক জনজাতীয় লোক বসবাস কৰা অঞ্চলসমূহো অন্তৰ্ভুক্ত হৈ আছে।এতিয়া প্ৰধানমন্ত্ৰী কৃষি ধন-ধান্য আঁচনিৰ অধীনত কৃষিক্ষেত্ৰত পিছপৰি থকা ১০০খন জিলাৰ প্ৰতিও বিশেষ গুৰুত্ব প্ৰদান কৰা হৈছে।আমাৰ প্ৰচেষ্টা হৈছে, সেই অঞ্চলসমূহৰ কৃষক, দৰিদ্ৰ পৰিয়াল আৰু জনজাতীয় সমাজৰ লোকসকলে যাতে আগবাঢ়ি যোৱাৰ নতুন সুযোগ লাভ কৰে।এই সামূহিক প্ৰচেষ্টা আৰু ‘সবকা সাথ, সবকা বিকাশ’ৰ মন্ত্ৰই দেশৰ দৰিদ্ৰ লোকসকলৰ মাজত নতুন আত্মবিশ্বাসৰ সৃষ্টি কৰিছে। ইয়াৰ ফলতেই কোটি কোটি দৰিদ্ৰ লোকে দৰিদ্ৰতাক পৰাস্ত কৰি দেখুৱাবলৈ সক্ষম হৈছে।

বন্ধুসকল,

দেশৰ দ্বিতীয়টো সফলতাৰ কথা মই আগতেই উল্লেখ কৰিছিলোঁ। সেয়া হৈছে—নক্সালবাদ আৰু মাওবাদৰ পৰা মুক্তি।আমাৰ গড়চিৰোলীকে ধৰি দেশৰ সকলো নক্সাল প্ৰভাৱিত জনজাতীয় অঞ্চলৰ লোকসকলে জানে যে নক্সালবাদী হিংসাই আটাইতকৈ বেছি ক্ষতিগ্ৰস্ত কৰিছে আমাৰ জনজাতীয় সমাজক।২০১৪ চনত দেশৰ প্ৰায় ১২৫খন জিলা মাওবাদ আৰু নক্সালবাদৰ দ্বাৰা প্ৰভাৱান্বিত আছিল।প্ৰতিবছৰে হিংসাৰ শ শ ঘটনা সংঘটিত হৈছিল।এই ঘটনাসমূহত হাজাৰ হাজাৰ নিৰীহ লোকে প্ৰাণ হেৰুৱাবলগীয়া হৈছিল।এই নিহত লোকসকলৰ ভিতৰত আমাৰ জনজাতীয় ভাই-ভনীসকলৰ সংখ্যা আছিল বহুত বেছি।

বন্ধুসকল,

মাওবাদ আৰু নক্সালবাদৰ দ্বাৰা প্ৰভাৱিত অঞ্চলসমূহৰ লোকসকলক সেই সময়ৰ চৰকাৰসমূহে নিজৰ ভাগ্যৰ ওপৰত এৰি দিছিল।তেওঁলোকৰ অধিকাৰ কাঢ়ি লোৱা হৈছিল।আনহাতে, সকলোৱে মুখত তলা মাৰি নীৰৱ হৈ বহি আছিল।আপোনালোকে জানি আচৰিত হ’ব যে মোৰ এই জনজাতীয় সমাজৰ ভাই-ভনীসকলক ভোটদান কৰিবলৈকো দিয়া হোৱা নাছিল।সেই সময়ৰ চৰকাৰসমূহে কেৱল নীৰৱ দৰ্শকৰ ভূমিকা পালন কৰিছিল। সকলো দেখিও চকু মুদি বহি আছিল।দৰিদ্ৰ মাতৃৰ চকুৰ সন্মুখৰ পৰাই তেওঁৰ সৰু সৰু সন্তানক মাওবাদী আৰু নক্সালবাদীসকলে কাঢ়ি লৈ গৈছিল, কিন্তু কোনেও একো কৰিব পৰা নাছিল।নক্সালবাদীসকলে আমাৰ ঘৰৰ জীয়ৰীসকলকো বলপূৰ্বকভাৱে লৈ গৈছিল আৰু পৰিয়ালৰ লোকসকলে অসহায়ভাৱে যন্ত্ৰণাত ভুগি থাকিবলগীয়া হৈছিল।

বন্ধুসকল,

আজি যেতিয়া মাওবাদ আৰু নক্সালবাদৰ অৱসান ঘটিছে, তেতিয়া সেই মাতৃসকল, মোৰ জনজাতীয় সমাজৰ মাতৃ আৰু ভগ্নীসকলে আমাক অসংখ্য আশীৰ্বাদ প্ৰদান কৰিছে।আজি নিজকে সুৰক্ষিত অনুভৱ কৰা সেই ভগ্নীগৰাকীয়ে আমাক আশীৰ্বাদ দিছে।যাৰ শৈশৱ কাঢ়ি নিয়া হৈছিল, তেওঁ আজি যুৱক হিচাপে আমাৰ সৈতে সংযুক্ত হৈছে। তেওঁ এতিয়া শিক্ষাৰ সুযোগ লাভ কৰিছে, কৰ্মসংস্থাপনৰ সুযোগ লাভ কৰিছে।ছত্তীশগড়ৰ বাস্তাৰৰ দৰে অঞ্চল, য’লৈ এসময়ত মানুহ যাবলৈ ভয় কৰিছিল, তেনে অঞ্চললৈ মই মাত্ৰ কেইদিনমান পূৰ্বে গৈছিলোঁ।সেই অঞ্চলৰ কেন্দ্ৰবিন্দুত আমাৰ নিৰাপত্তা বাহিনীৰ জোৱানসকলৰ সৈতে মই দীপাৱলী উদযাপন কৰিছিলোঁ।গড়চিৰোলীকে ধৰি পূৰ্বতে নক্সালবাদৰ দ্বাৰা প্ৰভাৱিত সকলো অঞ্চলতে এইবাৰ দীপাৱলীত চাকি-বন্তিৰ পোহৰৰ লগতে আশাৰ নতুন পোহৰো জনসাধাৰণৰ মাজলৈ বিয়পি পৰিছে।

বন্ধুসকল,

আজি আমাৰ আদিবাসী সমাজ, আমাৰ জনজাতীয় সমাজে দেশৰ প্ৰগতিৰ ক্ষেত্ৰত যথেষ্ট উৎসাহেৰে অৱদান আগবঢ়াইছে।আজি দেশৰ সৰ্বোচ্চ সাংবিধানিক পদত অধিষ্ঠিত হৈ দেশৰ নেতৃত্বও এগৰাকী জনজাতীয় সমাজৰ কন্যাই বহন কৰিছে।আমাৰ সকলোৰে বাবে ৰাষ্ট্ৰপতি দ্ৰৌপদী মুৰ্মু ডাঙৰীয়ানীৰ বাবে গৌৰৱ অনুভৱ কৰাৰ এয়া এটা বিশেষ মুহূৰ্ত।

বন্ধুসকল,

আজি সময় আহি পৰিছে যে আমি ভগৱান বীৰছা মুণ্ডাৰ পৰা প্ৰেৰণা লৈ বিকশিত ভাৰতৰ সপোন বাস্তৱায়িত কৰাৰ বাবে নিজৰ সম্পূৰ্ণ শক্তি নিয়োগ কৰোঁ।এই আহ্বানৰ সৈতে ভগৱান বীৰছা মুণ্ডাক প্ৰণাম জনাই পুনৰ এবাৰ আপোনালোক সকলোকে জনজাতীয় গৌৰৱ দিৱসৰ আন্তৰিক শুভেচ্ছা জনাইছোঁ।লগতে আপোনালোকৰ প্ৰতি মোৰ এটা বিশেষ আহ্বান আছে—প্ৰতিবছৰে ১৫ নৱেম্বৰ তাৰিখটোলৈ আমি আগ্ৰহেৰে অপেক্ষা কৰা উচিত।ভগৱান বীৰছা মুণ্ডাৰ জয়ন্তী, ইয়াতকৈও অধিক অৰ্থত জনজাতীয় গৌৰৱ দিৱস সমগ্ৰ দেশৰ গৌৰৱ আৰু সমগ্ৰ দেশৰ আত্মসন্মানৰ প্ৰতীক।প্ৰতিবছৰে ১৫ নৱেম্বৰত আমি পূৰ্বতকৈ অধিক শক্তি, অধিক উৎসাহ আৰু অধিক ব্যাপকতাৰে এই দিৱস উদযাপন কৰি যাব লাগে।জনজাতীয় গৌৰৱ দিৱসত আমি নতুন নতুন সংকল্প গ্ৰহণ কৰিব লাগে আৰু সেই সংকল্পসমূহ নিৰ্ধাৰিত সময়সীমাৰ ভিতৰত বাস্তৱায়িত কৰাৰ বাবে সকলোৱে সম্পূৰ্ণ শক্তিৰে আগবাঢ়ি যাব লাগে।স্বাধীনতাৰ ইমান বছৰৰ পিছতো যিবোৰ কাম হোৱা নাই, সেইবোৰ আমি অতি কম সময়ৰ ভিতৰতে কৰি দেখুৱাব লাগিব।মই পুনৰ এবাৰ ক’ব বিচাৰিছোঁ যে স্ক্ৰীনত মই আপোনালোকক দেখিবলৈ পাইছোঁ। বিভিন্ন স্থানত কিমান মানুহ বহি আছে, সেয়া মই লক্ষ্য কৰিছোঁ।আৰু মই দেখিছোঁ যে আপোনালোক সকলো উৎসাহ আৰু উদ্দীপনাৰে ভৰি আছে।এই দৃশ্যই জনজাতীয় গৌৰৱ দিৱসৰ মৰ্যাদা, গৌৰৱ আৰু সন্মান বৃদ্ধি কৰিছে।এই সফল আয়োজনৰ বাবেও জনজাতীয় সমাজৰ আপোনালোক সকলো লোক অভিনন্দনৰ যোগ্য।মই আপোনালোক সকলোকে আন্তৰিক অভিনন্দন জনাইছোঁ।আপোনালোক সকলোকে অশেষ ধন্যবাদ জনাইছোঁ।

জোহাৰ।

***

MJPS/SS/ST/DM