പിഎം ഇന്ത്യ

കേന്ദ്ര വിദ്യാഭ്യാസ മന്ത്രി പ്രള്ഹാദ് ജോഷി ജി, എന്റെ സുഹൃത്ത് ഹരീഷ് സാൽവേ ജി, പ്രൊഫസർ അഭയ് കരന്ദികർ, ഐഐടി ഡൽഹി ഡയറക്ടർ പ്രൊഫസർ രംഗൻ ബാനർജി,   പ്രൊഫസർമാരേ, വിശിഷ്ടാതിഥികളേ, വിദ്യാർത്ഥി സഹപ്രവർത്തകരേ

ഇന്ന്, രാജ്യത്തെ എല്ലാ പ്രതിഭാധനരായ യുവാക്കളുടെയും ജീവിതത്തിൽ ഒരു പുതിയ യാത്ര ആരംഭിക്കുകയാണ്. ഉത്സാഹം, ആവേശം, സ്വപ്നങ്ങൾ, വികാരങ്ങൾ എന്നിവയാൽ നിറഞ്ഞ ജീവിതത്തിലെ ഒരു അവിസ്മരണീയ നിമിഷങ്ങളിലാണ് നിങ്ങൾ ജീവിക്കുന്നത്. ഈ നിമിഷത്തിന്റെ ഭാഗമാകാനും, ഐഐടി ഡൽഹി കാമ്പസിൽ വരാനും, ഈ അനുഭവം നിങ്ങളുമായി പങ്കിടാനും കഴിയുന്നത് എനിക്കും വളരെ പ്രത്യേകമാണ്. ഞാൻ അവസാനമായി ഇവിടെ ഒരു ബിരുദദാനത്തിൽ പങ്കെടുത്തപ്പോൾ, രാജ്യം മുഴുവൻ കോവിഡ് കാലഘട്ടത്തിലൂടെ കടന്നുപോകുകയായിരുന്നു. അപ്പോൾ ഞാൻ വെർച്വലായാണ് ബന്ധപ്പെട്ടത്. എന്നാൽ ഇന്ന്, ഞാൻ നിങ്ങളുടെ ഇടയിൽ സന്നിഹിതനാണ്, അത് എന്നെ വളരെയധികം സന്തോഷിപ്പിക്കുന്നു.

സുഹൃത്തുക്കളേ,

നിങ്ങളുടെ കുടുംബങ്ങൾക്ക് ഇന്ന് അഭിമാനം തോന്നുന്നതുപോലെ, എനിക്കും നിങ്ങളെക്കുറിച്ച് അഭിമാനം തോന്നുന്നു. കാരണം നിങ്ങൾ ഒരു ബിരുദം നേടുക മാത്രമല്ല – രാജ്യത്തിനായി മഹത്തായ കാര്യങ്ങൾ ചെയ്യാനുള്ള സ്വപ്നങ്ങളുമായി നിങ്ങൾ ചുവടുവെക്കുകയാണ്. നിരവധി വിദ്യാർത്ഥികൾക്ക് അവരുടെ നേട്ടങ്ങൾക്ക് മെഡലുകൾ ലഭിച്ചിട്ടുണ്ട്, നിങ്ങളെയെല്ലാം ഞാൻ അഭിനന്ദിക്കുന്നു. പക്ഷേ ഒന്നോ രണ്ടോ പെൺമക്കൾ ഉണ്ടായിരുന്നെങ്കിൽ, അത് ഇതിലും മികച്ചതാകുമായിരുന്നു. ക്ഷമിക്കണം – ഒന്നോ രണ്ടോ പെൺമക്കളല്ല, കൂടുതൽ ഉണ്ടാകേണ്ടതായിരുന്നു. ഇന്ന്, ഐഐടി ഡൽഹിയിൽ AI യുമായി ബന്ധപ്പെട്ട ചില പുതിയ സംരംഭങ്ങളും ആരംഭിച്ചിട്ടുണ്ട്, അവർക്കായി ഞാൻ നിങ്ങൾക്കെല്ലാവർക്കും എന്റെ ആശംസകൾ നേരുന്നു.

സുഹൃത്തുക്കളേ,

നിങ്ങൾ എല്ലാവരും, എല്ലാ വിദ്യാർത്ഥികളും, ഇന്ന് ഈ പരിപാടിയിൽ സന്നിഹിതരാണ്, പക്ഷേ നിങ്ങളുടെ മനസ്സിന്റെ ഏതോ കോണിൽ, മറ്റെന്തോ നടക്കുന്നുണ്ടാകണം. ഞാൻ ബാബ ബാഗേശ്വർ അല്ല, പക്ഷേ തീർച്ചയായും നിങ്ങളുടെ മനസ്സിൽ എന്തോ ഒന്ന് ഓടിയെത്തുന്നുണ്ട്. ഓരോ വിദ്യാർത്ഥിക്കും നാളെയുടെ സ്വന്തം ചിത്രമുണ്ട്. ചിലർ അവരുടെ ആദ്യ ശമ്പളത്തിനായി കാത്തിരിക്കുകയാണ്. ചിലർ പുതിയ നഗരത്തിൽ ഒരു പുതിയ തുടക്കത്തിനായി തയ്യാറെടുക്കുകയാണ്. ചില കൂട്ടാളികൾ അവരുടെ ആദ്യ സ്റ്റാർട്ടപ്പിനെക്കുറിച്ച് സ്വപ്നം കാണുന്നു. ചിലർ അടുത്ത മത്സര പരീക്ഷകളിൽ അവരുടെ ലക്ഷ്യങ്ങൾ വെച്ചിരിക്കുന്നു. എല്ലാവരുടെയും പാത വ്യത്യസ്തമാണ്, എല്ലാവരുടെയും സ്വപ്നം വ്യത്യസ്തമാണ്. എന്നിരുന്നാലും നിങ്ങളുടെ എല്ലാവരുടെയും മനസ്സിൽ ഒരു പൊതു വികാരമുണ്ട് – നിങ്ങൾ ഐഐടി ഡൽഹിയിൽ നിങ്ങളുടെ ആദ്യ ദിവസം ആഘോഷിച്ച ദിവസം ഓർക്കുക, ഇപ്പോൾ ഈ ബിരുദദാന ദിനം വന്നിരിക്കുന്നു. നിങ്ങൾ ചിന്തിക്കുന്നുണ്ടാകും, ഓറിയന്റേഷൻ ഇന്നലെ നടന്നതല്ലേ, ഇപ്പോൾ കോൺവൊക്കേഷൻ വന്നിരിക്കുന്നു എന്ന്? ഓറിയന്റേഷനിൽ നിന്ന് കോൺവൊക്കേഷനിലേക്കുള്ള ഈ യാത്ര നിങ്ങൾക്ക് വളരെയധികം സംതൃപ്തി നൽകണം. അതേ സമയം, ജീവിതത്തിലെ ഒരു പുതിയ അധ്യായത്തിന്റെ തുടക്കത്തിനായി നിങ്ങൾ ആവേശഭരിതരായിരിക്കണം. അതുകൊണ്ടാണ് ഞാൻ പറയുന്നത് – ഈ നിമിഷം പൂർണ്ണമായും ജീവിക്കുക. ഭാവിയിൽ, വലിയ ഉത്തരവാദിത്തങ്ങൾ നിങ്ങളുടെ മേൽ വരുമ്പോൾ, ഈ പഴയ ഓർമ്മകൾ തീർച്ചയായും നിങ്ങളെ ആ കാലത്തേക്ക് കൊണ്ടുപോകും. അവ നിങ്ങളെ ഊർജ്ജസ്വലമാക്കും. എല്ലാ ഹോസ്റ്റലുകൾക്കും അതിന്റേതായ ഓർമ്മകളുണ്ട് – കൂമയോൺ, ആരവലി, കാരക്കോറം, വിന്ധ്യാചൽ, നീലഗിരി, കൈലാഷ്, ഹിമാദ്രി – ഇന്റർ-ഹോസ്റ്റൽ മത്സരങ്ങളുടെ കഥകൾ, പഴയ വഴക്കുകൾ, പോകുന്നതിനുമുമ്പ് ഒരിക്കൽ കൂടി ഓർമ്മിക്കാൻ ഒരുപാടുണ്ടാകും

സുഹൃത്തുക്കളേ,

ഇത് പഠനത്തെക്കുറിച്ച് മാത്രമല്ല. ഒരുപക്ഷേ ജിയ സരായിയുടെ പോഹ ഇന്ന് നിങ്ങളിൽ ചിലരെ വിളിക്കുന്നുണ്ടാകാം. സത്പുര മെസിലെ പറോട്ടകൾ നിങ്ങളുടെ മനസ്സിലുണ്ടാകാം. നിങ്ങളിൽ ചിലർക്ക് വിൻഡ് ടിയിൽ (വിൻഡ് ടണൽ) കുറച്ച് നിമിഷങ്ങൾ കൂടി ചെലവഴിക്കാൻ ആഗ്രഹമുണ്ടാകാം. നിങ്ങൾ അവിടെ പോയാൽ എന്നെയും ഓർക്കുക. ചിലർക്ക് ഒരിക്കൽ കൂടി അവരുടെ ഡിപ്പാർട്ട്‌മെന്റ് സന്ദർശിക്കാൻ ആഗ്രഹമുണ്ടാകാം. ചിലർക്ക് അവരുടെ പ്രിയപ്പെട്ട ലാവണത്തിൽ വീണ്ടും ഇരിക്കാൻ ആഗ്രഹമുണ്ടാകാം.

സുഹൃത്തുക്കളേ,

ഈ വൈകാരിക നിമിഷങ്ങളിൽ, – ജീവിതം നിങ്ങൾക്ക് തിരിഞ്ഞുനോക്കാൻ അവസരം നൽകുമ്പോഴെല്ലാം, നിങ്ങൾ ഈ ക്യാമ്പസ് ജീവിതത്തെയും, നിങ്ങളുടെ സുഹൃത്തുക്കളെയും, അധ്യാപകരെയും, ഉപദേഷ്ടാക്കളെയും, നിങ്ങളുടെ കുടുംബമായി മാറിയ സപ്പോർട്ട് സ്റ്റാഫിനെയും, നിങ്ങളെപ്പോലുള്ള കഴിവുകളെ രൂപപ്പെടുത്താൻ ഉത്തരവാദിത്തം ഏറ്റെടുത്ത നിങ്ങളുടെ പ്രൊഫസർമാരെയും, ക്രമേണ നിങ്ങളുടെ വീടായി മാറിയ ഈ “ഇൻസ്റ്റി”യെയും ഓർക്കും എന്ന് ഞാൻ നിങ്ങളോട് പറ‍ഞ്ഞേ തീരൂ. ഓരോ വിജയത്തിലും, നിങ്ങൾ അവരെ ഓർക്കും. നിങ്ങൾ അവരോട് നന്ദിയുള്ളവരായിരിക്കും. അതിനാൽ, നിങ്ങൾ പോകുമ്പോൾ അവരെ ഒരു നിങ്ങൾക്കൊപ്പം സ്വത്തായി കൊണ്ടുപോകുക. അവരെ മറക്കരുത്, അവരെ പിന്നിൽ ഉപേക്ഷിക്കരുത് – അവരെ നിങ്ങളോടൊപ്പം കൊണ്ടുപോകുക. പോകുന്നതിനുമുമ്പ്, ഇവിടെ ഓരോ അംഗത്തെയും ഒരിക്കൽ കൂടി കണ്ടുമുട്ടുക എന്നതാണ് എന്റെ നിർദ്ദേശം. നിങ്ങൾ എവിടെ പോയാലും, ഈ ബന്ധം എന്നെന്നേക്കുമായി പുതുമയോടെ നിലനിർത്താൻ ശ്രമിക്കുക.

സുഹൃത്തുക്കളേ,

ലോകം വളരെ വേഗത്തിൽ മാറിക്കൊണ്ടിരിക്കുന്ന ഒരു കാലഘട്ടത്തിലാണ് നിങ്ങൾ കാലെടുത്തുവയ്ക്കുന്നത്. തന്ത്രപരമായ സമവാക്യങ്ങൾ അതിവേഗം മാറിക്കൊണ്ടിരിക്കുന്നു. ആഗോള ശക്തി സന്തുലിതാവസ്ഥ ഓരോ നിമിഷവും മാറിക്കൊണ്ടിരിക്കുന്നു. ഇതിനു പിന്നിലെ ഏറ്റവും വലിയ ശക്തി സാങ്കേതികവിദ്യയുടെ വേഗതയാണ്. അടുത്ത 20-30 വർഷത്തിനുള്ളിൽ ലോകം എങ്ങനെയായിരിക്കുമെന്ന് ആർക്കും കൃത്യമായി പറയാൻ കഴിയില്ല.

പക്ഷേ സുഹൃത്തുക്കളേ,

മാറ്റത്തിന്റെ കാലങ്ങൾ വരുമ്പോഴെല്ലാം വെല്ലുവിളികളും വരുന്നു, പുതിയ അവസരങ്ങൾ സൃഷ്ടിക്കപ്പെടുന്നു. ലോകം മാറും, സാങ്കേതികവിദ്യ മാറും, വ്യവസായങ്ങൾ മാറും, തൊഴിലുകൾ മാറും. എന്നാൽ ഇതിനിടയിലും, എന്റെ വാക്കുകൾ ഓർക്കുക – പഠിച്ചുകൊണ്ടിരിക്കുന്നവർ വിജയിച്ചുകൊണ്ടിരിക്കും. പുതിയ വെല്ലുവിളികൾക്ക് പുതിയ പരിഹാരങ്ങൾ കണ്ടെത്താൻ ധൈര്യപ്പെടുന്നവർ വെല്ലുവിളികളെ അവസരങ്ങളാക്കി മാറ്റും. ഐഐടി ഡൽഹിയിൽ നിന്ന് നിങ്ങൾ പഠിച്ചത് ഇതാണ്. എല്ലാത്തിനുമുപരി, നിങ്ങളുടെ ബിരുദം എന്താണ് പറയുന്നത്? നിങ്ങൾ പരീക്ഷകളിൽ വിജയിച്ചുവെന്നോ, നല്ല സിജിപിഎ നേടിയെന്നോ, നല്ല സ്ഥാനം നേടിയെന്നോ ഉള്ളതിന്റെ തെളിവ് മാത്രമാണോ ഇത്? തീർച്ചയായും, ഇവയ്‌ക്കെല്ലാം അതിന്റേതായ പ്രാധാന്യമുണ്ട്. എന്നാൽ ബുദ്ധിമുട്ടുള്ള പ്രശ്നങ്ങൾ എങ്ങനെ പരിഹരിക്കാമെന്ന് നിങ്ങൾക്കറിയാമെന്ന് നിങ്ങളുടെ ബിരുദം ലോകത്തോട് പറയുന്നുവെന്ന് ഞാൻ വിശ്വസിക്കുന്നു. നിങ്ങളുടെ ഐഐടി ഡൽഹി യാത്രയെക്കുറിച്ച് ചിന്തിക്കുക – ഇവിടെ എത്തുക എളുപ്പമായിരുന്നില്ല, പഠനം എളുപ്പമായിരുന്നില്ല. പക്ഷേ നിങ്ങൾ ഉപേക്ഷിച്ചില്ല. ഈ ബിരുദം ഒരു ദിവസം കൊണ്ട് നേടിയതല്ല. ഓരോ വിഷയവും, ഓരോ പ്രോജക്ടും, മിഡ്-സെമും, അവസാന-സെമും – ഈ ചെറിയ ചുവടുകൾ നിങ്ങളെ ഇവിടെ എത്തിച്ചു. ജീവിതവും ഈ തത്വത്തിലാണ് പ്രവർത്തിക്കുന്നത്. ഒരു വെല്ലുവിളി വളരെ വലുതായി തോന്നുമ്പോഴെല്ലാം, ഭയപ്പെടരുത് – അതിനെ ചെറിയ ഭാഗങ്ങളായി വിഭജിക്കുക. പ്രശ്നങ്ങൾ എങ്ങനെ അവസാന ഘട്ടങ്ങളായി തോന്നി, സിമുലേഷനുകൾക്ക് മണിക്കൂറുകളോ ദിവസങ്ങളോ എടുത്തതെങ്ങനെയെന്ന് നിങ്ങൾ ലാബുകളിൽ കണ്ടിട്ടുണ്ട്, പക്ഷേ ഒടുവിൽ നിങ്ങൾ അവ പരിഹരിച്ച് പുതിയ എന്തെങ്കിലും സൃഷ്ടിച്ചു. ജീവിതത്തിലും ബുദ്ധിമുട്ടുകൾ വരും. എന്നാൽ ബുദ്ധിമുട്ടുകളുടെ സ്വഭാവം അവ ഒരിക്കലും ഒറ്റയ്ക്ക് വരുന്നില്ല എന്നതാണ് – അവ അവസരങ്ങൾ കൊണ്ടുവരുന്നു. എല്ലാവരും ജാ​ഗരൂ​കരാകണം, അവബോധമുള്ളവരായിരിക്കണം, ഈ സ്ഥാപനം നിങ്ങളെ പഠിപ്പിച്ച കാര്യങ്ങൾ ഓർമ്മിച്ചുകൊണ്ടിരിക്കണം.

സുഹൃത്തുക്കളേ,

ജീവിതത്തിന്റെ ചില പ്രായോഗിക വശങ്ങൾ നിങ്ങളുമായി പങ്കിടാൻ ഞാൻ ആഗ്രഹിക്കുന്നു. ക്യാമ്പസ് ജീവിതവും ക്യാമ്പസിന് പുറത്തുള്ള ജീവിതവും വളരെ വ്യത്യസ്തമാണ്. ഐഐടി പരീക്ഷകളിൽ ഒരു സിലബസ് ഉണ്ട്. എന്നാൽ ജീവിത പരീക്ഷയിൽ എല്ലാം സിലബസിന് പുറത്താണ്. ഓർമ്മിക്കുക, ക്യാമ്പസ് ജീവിതത്തിൽ എല്ലാം വ്യക്തമായിരുന്നു – എന്ത് പഠിക്കണം, ഏത് അസൈൻമെന്റ് പൂർത്തിയാക്കണം, ഏത് പരീക്ഷ എഴുതണം. എന്നാൽ ജീവിതം വ്യത്യസ്തമായി പോകുന്നു. ഒരു നിശ്ചിത കോഴ്സോ ചോദ്യപേപ്പറോ ഇല്ല. പലപ്പോഴും, യഥാർത്ഥ ചോദ്യം എന്താണെന്ന് ആരും നിങ്ങളോട് പറയാറില്ല – നിങ്ങൾ അത് സ്വയം തിരിച്ചറിയണം. നിരവധി ഐഐടി പൂർവ്വ വിദ്യാർത്ഥികളുടെ യാത്രകൾ ഞാൻ കണ്ടിട്ടുണ്ട്. അവരുടെ വിജയം അവർ ശരിയായ ഉത്തരങ്ങൾ നൽകിയതുകൊണ്ടു മാത്രമല്ല, ലോകം ചോദിക്കുന്നത് നിർത്തിയ ചോദ്യങ്ങളെ തിരിച്ചറിഞ്ഞതുകൊണ്ടുമാണ്. പരിഹരിക്കാനാവില്ലെന്ന് മറ്റുള്ളവർ കരുതിയിരുന്ന പ്രശ്നങ്ങൾ അവർ പരിഹരിച്ചു. അതുകൊണ്ടാണ്, ജിജ്ഞാസയെ സജീവമായി നിലനിർത്തുക, നിങ്ങളുടെ പഠന സഹജാവബോധം ഉണർന്നിരിക്കുക, നിങ്ങളുടെ അവബോധം മൂർച്ചയുള്ളതാക്കുക. അന്ധമായി അംഗീകരിക്കപ്പെടുന്നതിനെ ചോദ്യം ചെയ്യുക, പരിഹാരങ്ങൾ കണ്ടെത്താനുള്ള ധൈര്യം കാണിക്കുക. ഈ ചിന്ത നിങ്ങൾക്ക് ഒരു സവിശേഷ വ്യക്തിത്വം നൽകും.

സുഹൃത്തുക്കളേ,

ഓരോ തലമുറയും അതിന്റേതായ കാലഘട്ടത്തിൽ അതിന്റേതായ വെല്ലുവിളികൾ നേരിടുന്നുണ്ടെന്നും ഓരോ തലമുറയ്ക്കും അതിന്റേതായ ദേശീയ ഉത്തരവാദിത്തമുണ്ടെന്നും നിങ്ങൾക്കെല്ലാവർക്കും അറിയാം. അടിമത്തത്തിന്റെ ഒരു യുഗം നമ്മുടെ രാജ്യം കണ്ടു, ആ തലമുറയുടെ ഏക ലക്ഷ്യം ഇന്ത്യയുടെ സ്വാതന്ത്ര്യമായിരുന്നു. അവർ ത്യാഗങ്ങൾ ചെയ്തു, വർഷങ്ങളോളം പോരാടി. ഇന്ന്, അവരുടെ തപസ്സും ത്യാഗവും സമർപ്പണവും കൊണ്ടാണ് നാം സ്വതന്ത്ര ഇന്ത്യയിൽ ശ്വസിക്കുന്നത്.

സുഹൃത്തുക്കളേ,

ഇന്നത്തെ കാലഘട്ടത്തിൽ, നമ്മുടെ വെല്ലുവിളികൾ വ്യത്യസ്തമാണ്, അതുപോലെ തന്നെയാണ് നമ്മുടെ ഉത്തരവാദിത്തങ്ങളും. അടുത്ത 30-35 വർഷങ്ങളിൽ, നിങ്ങൾ ചെയ്യുന്നതെന്തും ഒരു വികസിത ഭാരതത്തിന്റെ യാത്രയെ രൂപപ്പെടുത്തും. അതിനാൽ, നിങ്ങളുടെ ഓരോ തീരുമാനവും അത് രാജ്യത്തിന് എങ്ങനെ പ്രയോജനം ചെയ്യുന്നു, രാജ്യത്തിന്റെ ആവശ്യം അത് നിറവേറ്റുന്നു എന്നതിനെ അടിസ്ഥാനമാക്കിയുള്ളതായിരിക്കണം. ഇന്ന്, ഇന്ത്യ സാമ്പത്തിക സ്വാശ്രയത്വം, സാങ്കേതിക സ്വാശ്രയത്വം, വ്യാവസായിക സ്വാശ്രയത്വം – വികസിത് ഭാരതത്തിന്റെ ശക്തമായ അടിത്തറ കെട്ടിപ്പടുക്കുക എന്നിവയ്ക്കായി പ്രവർത്തിക്കുന്നു. ഈ അടിത്തറയിൽ, നിങ്ങൾ ഒരു ഗംഭീരവും മനോഹരവുമായ വികസിത ഭാരതം നിർമ്മിക്കണം.

സുഹൃത്തുക്കളേ,

ഈ യാത്രയിൽ നിങ്ങളുടെ പങ്ക് വളരെ വലുതാണ്. യുവാക്കൾ ശക്തരാകുന്തോറും രാഷ്ട്രം ശക്തമാകും. ഈ ദർശനത്തോടെ, ഒരുകാലത്ത് യുവാക്കൾക്ക് അടച്ചിട്ടിരുന്ന നിരവധി മേഖലകൾ ഞങ്ങൾ തുറന്നുകൊടുത്തു. ആധുനിക നയങ്ങൾ കാരണം, യുവാക്കൾക്കായി പുതിയ മേഖലകൾ ഉയർന്നുവരുന്നു.

സുഹൃത്തുക്കളേ,

കഴിഞ്ഞ തവണ, ഞാൻ നിങ്ങളുടെ സീനിയേഴ്‌സ് കോൺവൊക്കേഷനിൽ വെർച്വലായി ചേർന്നപ്പോൾ, ബഹിരാകാശ മേഖലയിലെ പരിഷ്കാരങ്ങളെക്കുറിച്ച് ഞാൻ സംസാരിച്ചു. അന്ന്, ഈ മേഖലയിലെ മിക്കവാറും എല്ലാ ജോലികളും സർക്കാരാണ് ചെയ്തത്. എന്നാൽ ഇന്ന്, അതേ ബഹിരാകാശ മേഖല ആയിരക്കണക്കിന് യുവാക്കൾക്ക് അവസരങ്ങളുടെ ആകാശമായി മാറിയിരിക്കുന്നു. നമ്മുടെ യുവാക്കൾ വിക്ഷേപണ വാഹനങ്ങൾ നിർമ്മിക്കുന്നു, റോക്കറ്റുകൾ വിക്ഷേപിക്കുന്നു, ലോകത്തിലെ ചുരുക്കം ചില രാജ്യങ്ങൾ മാത്രം നേടിയ നേട്ടങ്ങൾ കൈവരിക്കുന്നു. എവിടെയോ, ഒരു യുവ എഞ്ചിനീയർ അഭിമാനത്തോടെ പറയുന്നു: “എന്റെ വംസപരമ്പരയിൽ ആദ്യമായാണ് റോക്കറ്റ് നിർമ്മിക്കുന്നത്.” സെമികണ്ടക്ടർ മേഖല മറ്റൊരു ഉദാഹരണമാണ്. ഈ ദിശയിലേക്ക് ഞങ്ങൾ ചുവടുവെച്ചപ്പോൾ, ചിലർ ഇന്ത്യയുടെ കഴിവിനെ സംശയിച്ചു. ഇന്ത്യയ്ക്ക് ഇത് ചെയ്യാൻ കഴിയില്ലെന്ന് അവർ പറഞ്ഞു. എന്നാൽ ഇന്ന്, ആദ്യത്തെ സെമികണ്ടക്ടർ യൂണിറ്റുകളിൽ ഉത്പാദനം ആരംഭിച്ചു. ഞാൻ ഉറച്ചു വിശ്വസിക്കുന്നു – ചിപ്പ് മുതൽ ഷിപ്പ് വരെ, എല്ലാം ഇവിടെ നിർമ്മിക്കപ്പെടും, നിങ്ങളുടെ കൈകളാൽ. എവിടെയോ, ഒരു യുവാവ് ആത്മവിശ്വാസത്തോടെ പറയുന്നു: “എന്റെ വംശപരമ്പരയിൽ ആദ്യം ഇന്ത്യയിൽ ഒരു ചിപ്പ് നിർമ്മിക്കും.” 

സുഹൃത്തുക്കളേ,

നമ്മുടെ ഡ്രോൺ മേഖലയെ നോക്കൂ. യുവാക്കൾ പുതിയ സാധ്യതകൾ സൃഷ്ടിക്കുന്നു. കൃഷിയിൽ ഡ്രോണുകൾ ഉപയോഗിക്കുന്നു, മരുന്നുകൾ എത്തിക്കുന്നു, പ്രതിരോധത്തിലും സുരക്ഷയിലും സഹായിക്കുന്നു. “എന്റെ വംശപരമ്പരയിൽ ആദ്യം ഡ്രോൺ നിർമ്മിക്കുന്നു.” എന്ന് എവിടെയോ നിന്ന്, ഒരു യുവ നവീനാശയക്കാരൻ പറയുന്നു: 

സുഹൃത്തുക്കളേ,

ഇന്ത്യയുടെ സ്റ്റാർട്ടപ്പ് വിപ്ലവം രൂപപ്പെടുത്തിയതും ശക്തിപ്പെടുത്തിയതും നിങ്ങളെപ്പോലുള്ള യുവാക്കളാണ്. ഈ സ്ഥാപനത്തിൽ നിന്നാണ് നിരവധി സ്ഥാപകർ ഉയർന്നുവന്നത്. ഒരു സ്ഥാപനത്തിന് ഇത്രയധികം നേട്ടങ്ങൾ കൈവരിക്കാൻ കഴിയുമെങ്കിൽ, രാജ്യത്തുടനീളം കെട്ടിപ്പടുക്കപ്പെടുന്ന ശക്തിയെക്കുറിച്ച് സങ്കൽപ്പിക്കുക. യൂണികോണുകൾ, ഡിജിറ്റൽ പേയ്‌മെന്റുകൾ, ഫിൻടെക് – ഇവയെല്ലാം ദശലക്ഷക്കണക്കിന് യുവാക്കൾക്ക് ആദ്യമായി പുതിയ എന്തെങ്കിലും ചെയ്യാൻ അവസരം നൽകിയിട്ടുണ്ട്.

സുഹൃത്തുക്കളേ,

ഇന്ത്യ ഒരു പുതിയ യാത്ര ആരംഭിക്കുന്ന നിരവധി മേഖലകളുണ്ട്, രാഷ്ട്രം ഉത്തരവാദിത്തത്തോടെയും പ്രതീക്ഷയോടെയും നിങ്ങളെ നോക്കുന്നു. കൃത്രിമബുദ്ധി, ഡാറ്റാ സെന്ററുകൾ, നിർണായക ധാതുക്കൾ, ആഴക്കടൽ പര്യവേക്ഷണം, ബാറ്ററികൾ, വൈദ്യുതി സംഭരണം, ഊർജ്ജ സുരക്ഷ, വൈദ്യുത മൊബിലിറ്റി, ക്വാണ്ടം കമ്പ്യൂട്ടിംഗ് – ഈ മേഖലകളെല്ലാം നിങ്ങളുടെ കഴിവുകൾ, നവീകരണം, നേതൃത്വം എന്നിവയ്ക്കായി കാത്തിരിക്കുന്നു. ഞാനും കാത്തിരിക്കുന്നു.

സുഹൃത്തുക്കളേ,

നിങ്ങളുടെ മുന്നിലുള്ള മറ്റൊരു മികച്ച അവസരം ഗവേഷണമാണ്. രാജ്യത്തിന് പുതിയ ഗവേഷണം ആവശ്യമാണ്, നാമും അതിൽ തുല്യ ശ്രദ്ധ കേന്ദ്രീകരിക്കുന്നു. പ്രധാനമന്ത്രിയുടെ ഗവേഷണ ഫെലോഷിപ്പ് കഴിവുള്ള യുവാക്കൾക്ക് അവസരങ്ങൾ നൽകുന്നു. ആശയങ്ങളെ പിന്തുണയ്ക്കുന്നതിനായി ഗവേഷണ വികസന-നവീകരണ പദ്ധതി ആരംഭിച്ചു. ശാസ്ത്രവും ഗവേഷണവും ശക്തിപ്പെടുത്തുന്നതിനായി നാഷണൽ റിസർച്ച് ഫൗണ്ടേഷൻ സ്ഥാപിച്ചിട്ടുണ്ട്. ഗവേഷണ മേഖലയ്ക്ക് ഒരു ലക്ഷം കോടി രൂപ വരെ – ഒരു ലക്ഷം കോടി – ധനസഹായം ക്രമീകരിച്ചിരിക്കുന്നു. ഞാൻ ഇത് ഇംഗ്ലീഷിലും പറയുന്നു: ഒരു ലക്ഷം കോടി. 

അതുപോലെ, സുഹൃത്തുക്കളേ, 

അക്കാദമിക് വിഭവങ്ങളിലേക്കുള്ള പ്രവേശനം എളുപ്പമാക്കി. വൺ നേഷൻ വൺ സബ്‌സ്‌ക്രിപ്‌ഷൻ വഴി, അഭിമാനകരമായ ഗവേഷണ ജേണലുകൾ ഇപ്പോൾ ചെറിയ പട്ടണങ്ങളിൽ പോലും അധിക ചെലവില്ലാതെ ലഭ്യമാണ്.

സുഹൃത്തുക്കളേ,

ഈ ദിശയിൽ നമുക്ക് ഇനിയും ഒരുപാട് ദൂരം സഞ്ചരിക്കാനുണ്ടെന്ന് എനിക്കറിയാം, ഗവേഷണത്തോടുള്ള നിങ്ങളുടെ പ്രതിബദ്ധതയോടെ മാത്രമേ അത് സാധ്യമാകൂ. രാഷ്ട്രം നിങ്ങളിൽ നിന്ന് അത് പ്രതീക്ഷിക്കുന്നു, ഏറ്റവും പ്രധാനമായി, നിങ്ങളെ വിശ്വാസത്തിലെടുക്കുന്നു.

സുഹൃത്തുക്കളേ,

ഇനി ഞാൻ ശ്രദ്ധ വ്യതിചലനത്തെക്കുറിച്ച് സംസാരിക്കട്ടെ. വലിയ ലക്ഷ്യങ്ങൾ കൈവരിക്കാൻ നമ്മൾ പുറപ്പെടുമ്പോൾ, ഒരു പ്രധാന ശ്രദ്ധ വ്യതിചലനം വരുന്നു – താരതമ്യം. ആർക്കാണ് എന്ത് പാക്കേജ് ലഭിച്ചത്, ഏത് കമ്പനി, ഏത് നഗരം, ഏത് രാജ്യം, ആരാണ് ഒരു സ്റ്റാർട്ടപ്പ് ആരംഭിച്ചത്. ഇന്നത്തെ സോഷ്യൽ മീഡിയ യുഗത്തിൽ, ഈ താരതമ്യം ഒരിക്കലും അവസാനിക്കുന്നില്ല. എന്നാൽ ഓർക്കുക, ജീവിതം ഒരു ലീഡർബോർഡല്ല. നിങ്ങളുടെ യഥാർത്ഥ മത്സരം മറ്റുള്ളവരോടല്ല, നിങ്ങളോടാണ്. എല്ലാ ദിവസവും, ഇന്നലത്തെക്കാൾ മികച്ചവരാകാൻ ശ്രമിക്കുക. നിങ്ങളുടെ ശാരീരിക ആരോഗ്യവും മാനസികാരോഗ്യവും ശ്രദ്ധിക്കുക. 

സുഹൃത്തുക്കളേ, 

ഒരിക്കൽ കൂടി, എല്ലാ വിദ്യാർത്ഥികളെയും ഞാൻ അഭിനന്ദിക്കുന്നു. നിങ്ങളുടെ മാതാപിതാക്കൾക്കും കുടുംബങ്ങൾക്കും, നിങ്ങളുടെ അധ്യാപകർക്കും, ഈ യാത്രയുടെ ഓരോ ഘട്ടത്തിലും നിങ്ങളോടൊപ്പം നിന്ന എല്ലാവർക്കും ഞാൻ പ്രത്യേക അഭിനന്ദനങ്ങൾ നേരുന്നു. നിങ്ങളുടെ ഭാവി ശോഭനമാകട്ടെ, നിങ്ങൾ പുതിയ ഉയരങ്ങളിലെത്തുന്നത് തുടരട്ടെ, എന്ന ആശംസകളോടെ – വളരെ നന്ദി. 

നമസ്‌കാരം!

***

SK