പിഎം ഇന്ത്യ

പ്രധാനമന്ത്രി ശ്രീ നരേന്ദ്ര മോദി ഇന്ന് ന്യൂഡൽഹിയിലെ ഭാരത് മണ്ഡപത്തിൽ , ചിന്മയ അമൃത മഹോത്സവ് ആഗോള  സമ്മേളനം ഉദ്ഘാടനം ചെയ്തു. ചടങ്ങിനെ അഭിസംബോധന ചെയ്തുകൊണ്ട്, തന്റെ പങ്കാളിത്തം സന്യാസിമാരുടെ സ്‌നേഹത്തിൽ നിന്നും അനുഗ്രഹങ്ങളിൽ നിന്നും ഉയർന്നുവന്ന ആഴമേറിയ ആത്മീയ അനുഭവമാണെന്ന് പ്രധാനമന്ത്രി വിശേഷിപ്പിച്ചു. ചിന്മയ മിഷൻ വെറുമൊരു സ്ഥാപനമല്ലെന്നും, ഒരു മുനി സ്ഥാപിച്ചതും പതിറ്റാണ്ടുകൾ നീണ്ട പവിത്രമായ നിശ്ചയദാർഢ്യങ്ങളാൽ നയിക്കപ്പെടുന്നതുമായ ഒരു അമര ചൈതന്യമാണെന്നും ഊന്നിപ്പറഞ്ഞ അദ്ദേഹം, ഈ ആഘോഷത്തിന്റെ പേര് ഏറ്റവും അനുയോജ്യമാണെന്നും ചൂണ്ടിക്കാണിച്ചു.

ആദരണീയനായ ഗുരുദേവ് സ്വാമി ചിന്മയാനന്ദനുമായുള്ള ഹോളോബോട്ട് (Holobot) ആശയവിനിമയത്തിലൂടെ ആധുനിക സാങ്കേതികവിദ്യ ഈ ചടങ്ങിന്റെ വൈകാരിക തലങ്ങളെ എങ്ങനെ ഉണർത്തിയെന്ന് അനുസ്മരിച്ചുകൊണ്ട്, 1993-ൽ വഡോദരയിൽ വെച്ച് ആ ആത്മീയ നേതാവുമായി നടത്തിയ കൂടിക്കാഴ്ചയിലേക്ക്, അതായത് 33 വർഷം പുറകിലേക്ക് ഈ അനുഭവം തന്നെ കൂട്ടിക്കൊണ്ടുപോയെന്ന് പ്രധാനമന്ത്രി പങ്കുവെച്ചു. ഗുരുദേവന്റെ സ്‌നേഹവും സംഭാഷണങ്ങളും അനുഗ്രഹങ്ങളും വീണ്ടും അവിടുത്തെ നേരിട്ടുള്ള സാന്നിധ്യത്തിൽ നിൽക്കുന്നത് പോലെ ഓർത്തെടുത്ത അദ്ദേഹം, ഇത്രയും സ്പർശിയായ ഒരു ആദരവ് ഒരുക്കിയതിന് മിഷനിലെ അംഗങ്ങൾക്ക് ഹൃദയം നിറഞ്ഞ നന്ദി അറിയിച്ചു. “എന്നെ സംബന്ധിച്ചിടത്തോളം ഇതൊരു വളരെ വൈകാരികമായ അനുഭവമാണ്,” പ്രധാനമന്ത്രി നരേന്ദ്ര മോദി പറഞ്ഞു.

സ്വാമി വിവേകാനന്ദന്റെ ചരിത്രപ്രസിദ്ധമായ പ്രസംഗത്തിന്റെ 100 വർഷം തികയുന്ന വേളയിൽ, ലോകമത പാർലമെന്റിന്റെ ശതാബ്ദി ആഘോഷങ്ങൾക്കായി സ്വാമി ചിന്മയാനന്ദനെ ചിക്കാഗോയിലേക്ക് ക്ഷണിക്കാൻ 1993 ഫെബ്രുവരി-മാർച്ച് മാസങ്ങളിൽ നടത്തിയ സന്ദർശനം ഓർത്തെടുത്ത പ്രധാനമന്ത്രി, ഓഗസ്റ്റ് 3-ന് സാൻ ഡിയേഗോയിൽ വെച്ച് അന്തരിക്കുന്നതിന് മുൻപ്, ഈ പരിപാടിക്കായി ഗുരുദേവ് അമേരിക്കയിലുടനീളം ആളുകളെ തളരാതെ സംഘടിപ്പിച്ചത് എങ്ങനെയെന്ന് ചൂണ്ടിക്കാണിച്ചു. സെപ്റ്റംബർ 11-ന് നടന്ന ചിക്കാഗോ സമ്മേളനത്തിൽ ഗുരുദേവന്റെ അഭാവം എത്രത്തോളം അനുഭവപ്പെട്ടുവെന്ന് സ്മരിച്ച അദ്ദേഹം, യുവശക്തിയെ വളർത്തിയെടുക്കുന്നതിൽ കേന്ദ്രീകരിച്ചുള്ള തങ്ങളുടെ അവസാന കൂടിക്കാഴ്ചയും  ഓർത്തെടുത്തു. “യുവശക്തി നിർമ്മിതിയും യുവശക്തിയിലൂടെ ശക്തവും പ്രാപ്തവുമായ ഒരു ഭാരതം പടുത്തുയർത്തലുമായിരുന്നു അതിന്റെ പ്രധാന സാരാംശം!” ശ്രീ മോദി വ്യക്തമാക്കി.

ആ കൂടിക്കാഴ്ചയ്ക്ക് ഏതാനും വർഷങ്ങൾക്ക് ശേഷം ഗുജറാത്ത് മുഖ്യമന്ത്രിയായത് മുതൽ ഗവൺമെൻ്റിൻ്റെ തലവനെന്ന നിലയിൽ 25 വർഷം നീണ്ട തന്റെ നിരന്തരമായ സേവന പാതയെക്കുറിച്ച് പരാമർശിക്കവെ, തന്റെ നയങ്ങളുടെ കേന്ദ്രബിന്ദുവായി രാജ്യത്തെ യുവാക്കൾ എപ്പോഴും നിലകൊണ്ടിട്ടുണ്ടെന്ന് പ്രധാനമന്ത്രി പ്രസ്താവിച്ചു. വലിയ ഉത്തരവാദിത്തങ്ങൾ ഏറ്റെടുക്കുകയും ഒരു ലക്ഷത്തിലധികം യുവപൗരന്മാരുമായി സംവദിക്കുന്നതിനായി 300 ദിവസങ്ങളിലായി 40,000 കിലോമീറ്റർ സഞ്ചരിക്കുകയും ചെയ്ത ചിന്മയ അമൃത മഹോത്സവത്തിലെ യുവ സന്നദ്ധപ്രവർത്തകരെ അദ്ദേഹം പ്രശംസിച്ചു. “ഈ മികച്ച പരിശ്രമത്തിന് മുഴുവൻ ടീമിനെയും ഞാൻ അഭിനന്ദിക്കുന്നു,” പ്രധാനമന്ത്രി മോദി പ്രശംസിച്ചു.

“വയം അമൃതസ്യ പുത്രാഃ” (നാം അമൃതത്വത്തിന്റെ പുത്രന്മാരാണ്) എന്ന ഉപനിഷത്ത് വചനം ഉദ്ധരിച്ചുകൊണ്ട്, അറിവിന്റെയും വെളിച്ചത്തിന്റെയും അന്വേഷകയായി ഇന്ത്യ ആയിരക്കണക്കിന് വർഷങ്ങളായി നിലനിൽക്കുന്നത് അതിൻ്റെ ചൈതന്യവും ജ്ഞാനവും അമരമായതുകൊണ്ടാണെന്ന് പ്രധാനമന്ത്രി വിശദീകരിച്ചു. സ്വാതന്ത്ര്യത്തിന്റെ 75-ാം വാർഷികത്തിൽ ഒരു ‘അമൃത മഹോത്സവ’ത്തിന് ആഹ്വാനം ചെയ്യാൻ അദ്ദേഹത്തെ പ്രേരിപ്പിച്ചതും ഇതാണ്. ഈ അമൃത മഹോത്സവം ഒരു ‘വികസിത് ഭാരത’ത്തിനുള്ള അടിത്തറയായും മനുഷ്യരാശിയോടുള്ള ഇന്ത്യയുടെ ആയിരക്കണക്കിന് വർഷങ്ങൾ പഴക്കമുള്ള കരുതലിന്റെ പുനരുജ്ജീവനമായും നിലകൊള്ളുന്നു. അന്നുമുതൽ നിരവധി ആത്മീയ, സാംസ്‌കാരിക, സാമൂഹിക സംഘടനകൾ നിർണ്ണായക വേളകളിൽ  പവിത്രമായ പ്രതിജ്ഞകൾ എടുത്തിട്ടുണ്ടെന്ന് ചൂണ്ടിക്കാട്ടിയ അദ്ദേഹം, രാജ്യത്തിന്റെ ‘അമൃത കാൽ’ പ്രചാരണത്തിൽ ചിന്മയ മിഷൻ പങ്കാളിയായതിനെ പ്രശംസിച്ചു. “തീർച്ചയായും നാം ‘അമൃതസ്യ പുത്രാഃ’ എന്നതിന്റെ യഥാർത്ഥ തെളിവാണിത്,” ശ്രീ മോദി കൂട്ടിച്ചേർത്തു.

“വയം രാഷ്ട്രേ ജാഗ്രിയാമ പുരോഹിതാഃ” എന്ന വേദ വാക്യം ഉദ്ധരിച്ചുകൊണ്ട് രാഷ്ട്രത്തെ ഉണർത്താനും ഉയർത്താനും ആഹ്വാനം ചെയ്ത പ്രധാനമന്ത്രി, സ്വാമി ചിന്മയാനന്ദൻ ആത്മീയതയെക്കുറിച്ച് സംസാരിച്ചതുപോലെ തന്നെ ദേശീയ മുൻഗണനകളെക്കുറിച്ചും എത്രത്തോളം വാചാലനായി സംസാരിച്ചിരുന്നുവെന്ന് ചൂണ്ടിക്കാട്ടി. രാജ്യം നമ്മുടെ സംസ്‌കാരത്തിന്റെയും നിലനിൽപ്പിന്റെയും തൊട്ടിലായതിനാൽ ആത്മീയ വളർച്ച വ്യക്തിഗത വളർച്ചയ്ക്കും ദേശീയ പുരോഗതിക്കും കരുത്തേകണമെന്ന് അദ്ദേഹം പഠിപ്പിച്ചു. ദേശീയ ആത്മാഭിമാനം വളർത്തുന്നതിനായി, ഉപനിഷത്തുകളും വേദാന്തവും വിശുദ്ധ ഗ്രന്ഥങ്ങളും സാധാരണക്കാരിലെത്തിക്കാൻ സ്വാമിജി ഗീതാ ജ്ഞാന യജ്ഞത്തിന് തുടക്കമിട്ടു. ഇതിന്റെ ഫലമായി ഇന്ന് ലക്ഷക്കണക്കിന് ചിന്മയ മിഷൻ യുവാക്കൾ സാംസ്‌കാരിക ബ്രാൻഡ് അംബാസഡർമാരായി ഭാരതീയ മൂല്യങ്ങൾ കൈമാറി വരുന്നു. “ആദരണീയനായ ഗുരുദേവന്റെ ഈ സംഭാവന ഇന്ത്യയുടെ സാംസ്‌കാരികവും ആത്മീയവുമായ നവോത്ഥാനത്തിലെ പ്രധാനപ്പെട്ട ഒരു അധ്യായമാണ്,” പ്രധാനമന്ത്രി മോദി ഉറപ്പിച്ചു പറഞ്ഞു.

2015-ൽ ഗുരുദേവന്റെ ജന്മശതാബ്ദി വേളയിൽ സ്മരണിക നാണയം പുറത്തിറക്കിയത് ഓർത്തെടുത്ത പ്രധാനമന്ത്രി, സ്വാമിജിയുടെ ജീവിതം ജ്ഞാനം, കർമ്മം, ഭക്തി എന്നിവയുടെ അപൂർവ്വമായ ഒരു സംഗമമായിരുന്നുവെന്നും, അത് അദ്ദേഹത്തിന്റെ ഗുരുവായ സ്വാമി ശിവാനന്ദന്റെ “പോകൂ, ഒരു സിംഹത്തെപ്പോലെ ഗർജ്ജിക്കൂ” എന്ന അനുഗ്രഹം പൂർത്തീകരിക്കുന്നതായിരുന്നുവെന്നും വിശേഷിപ്പിച്ചു. സ്വാമിജിയുടെ ഉള്ളിലെ നിശ്ചയദാർഢ്യം കേൾവിക്കാരിൽ മായ്ക്കാൻ കഴിയാത്ത മുദ്ര പതിപ്പിച്ചുവെന്നും, അദ്ദേഹത്തിന്റെ ‘ആർട്ട് ഓഫ് മാൻ മേക്കിംഗ്’ (Art of Man Making) എന്ന റേഡിയോ പരിപാടി എണ്ണമറ്റ ജീവിതങ്ങൾക്ക് വഴികാട്ടിയായെന്നും അദ്ദേഹം ചൂണ്ടിക്കാണിച്ചു. “അദ്ദേഹത്തിന്റെ ശബ്ദത്തിലുണ്ടായിരുന്ന ആത്മവിശ്വാസവും ആന്തരിക കരുത്തും അവിടുത്തെ ചിന്തകളെ എല്ലാവരുടെയും ഹൃദയങ്ങളിൽ പതിപ്പിച്ചിരുന്നു,” ശ്രീ മോദി അഭിപ്രായപ്പെട്ടു.

മഹത് വ്യക്തികളുടെ ദൗത്യം അവരുടെ ജീവിതകാലത്തിനും അപ്പുറത്തേക്ക് നിലനിൽക്കുന്നു എന്ന് നിരീക്ഷിച്ച പ്രധാനമന്ത്രി, ചിന്മയ മിഷൻ സ്ഥാപിച്ച വിപുലമായ വിദ്യാഭ്യാസ ശൃംഖലയെ എടുത്തുപറഞ്ഞു. രാജ്യത്തുടനീളമുള്ള നൂറിലധികം ചിന്മയ വിദ്യാഭ്യാസ സ്ഥാപനങ്ങൾ നിലവിൽ ലക്ഷക്കണക്കിന് വിദ്യാർത്ഥികളുടെ ഭാവി രൂപപ്പെടുത്തുകയാണെന്ന് അദ്ദേഹം ചൂണ്ടിക്കാട്ടി. “ഈ സ്ഥാപനങ്ങളിൽ നിന്ന് അവർക്ക് ആധുനിക വിദ്യാഭ്യാസം ലഭിക്കുന്നതോടൊപ്പം, ഭാരതീയ മൂല്യങ്ങളും അവർ ഉൾക്കൊള്ളുന്നു,” പ്രധാനമന്ത്രി മോദി വ്യക്തമാക്കി.

സ്വാമി ചിന്മയാനന്ദനെപ്പോലുള്ള ചിന്തകരുടെ സ്വാതന്ത്ര്യാനന്തര കാഴ്ചപ്പാടുമായി സമകാലിക ഭരണത്തെ സമന്വയിപ്പിച്ചുകൊണ്ട്, ഒരു ‘നവ ഭാരത’ത്തിനായി വിദ്യാഭ്യാസ മേഖലയെ ആധുനികവൽക്കരിക്കാനുള്ള കടമ രാജ്യം സജീവമായി നിറവേറ്റുകയാണെന്ന് പ്രധാനമന്ത്രി പ്രസ്താവിച്ചു. ഭാരതീയ വിജ്ഞാന പാരമ്പര്യം, മാതൃഭാഷയിലുള്ള വിദ്യാഭ്യാസം, ആധുനിക ശാസ്ത്രം, സാങ്കേതികവിദ്യ എന്നിവയെ സംയോജിപ്പിക്കുന്ന പുതിയ ദേശീയ വിദ്യാഭ്യാസ നയം അവതരിപ്പിച്ചത് അദ്ദേഹം എടുത്തുപറഞ്ഞു. “ഈ പുതിയ വിദ്യാഭ്യാസ നയത്തിൽ ഇവയ്‌ക്കെല്ലാം പ്രാധാന്യം നൽകിയിട്ടുണ്ട്,” ശ്രീ മോദി ഉറപ്പിച്ചു പറഞ്ഞു.

ഭാരതീയ പൈതൃകം സംരക്ഷിക്കുന്നതിനായുള്ള സ്വാമിജിയുടെ ജീവിതകാലം മുഴുവൻ നീണ്ടുനിന്ന സമർപ്പണത്തെ സ്മരിച്ചുകൊണ്ട്, കന്യാകുമാരിയിലെ കടലിൽ വിവേകാനന്ദപ്പാറ സ്മാരകം പടുത്തുയർത്താനുള്ള ഏകനാഥ് റാണഡെയുടെ നിശ്ചയദാർഢ്യത്തിന് ഗുരുദേവ് ഉറച്ച പിന്തുണ നൽകിയതും ആ പദ്ധതിക്കായി ആദ്യത്തെ സാമ്പത്തിക സംഭാവന നൽകിയതും പ്രധാനമന്ത്രി ഓർത്തെടുത്തു. ഈ സ്മാരകം ഇന്ന് ലോകമെമ്പാടുമുള്ള ദശലക്ഷക്കണക്കിന് ആളുകൾക്ക് പ്രചോദനത്തിന്റെ കേന്ദ്രമായി നിലകൊള്ളുന്നുവെന്ന് അദ്ദേഹം ചൂണ്ടിക്കാട്ടി. “സ്വാമിജിയുടെ ജീവിതത്തിലെ മറ്റൊരു ദൗത്യം ഭാരതീയ പൈതൃകത്തിലുള്ള അഭിമാനവും അതിൻ്റെ സംരക്ഷണവുമായിരുന്നു!” പ്രധാനമന്ത്രി മോദി നിരീക്ഷിച്ചു.

വടക്ക് നിന്ന് തെക്കോട്ടും കിഴക്ക് നിന്ന് പടിഞ്ഞാറോട്ടും രാജ്യത്തുടനീളം വീശിയടിക്കുന്ന സമഗ്രമായ സാംസ്‌കാരിക നവോത്ഥാനത്തെക്കുറിച്ച് വിശദീകരിച്ചുകൊണ്ട്, കാശി വിശ്വനാഥ് ധാം, അയോധ്യയിലെ ശ്രീരാമക്ഷേത്രം, ഉജ്ജയിനിയിലെ മഹാകാൽ മഹാലോക്, കേദാർനാഥ്, ബദരീനാഥ് എന്നിവയുടെ ഗംഭീരമായ പുനരുദ്ധാരണവും യുനെസ്കോയുടെ ലോക പൈതൃക പട്ടികയിൽ സാംസ്‌കാരിക കേന്ദ്രങ്ങൾ ഉൾപ്പെടുത്തിയതും പ്രധാനമന്ത്രി ചൂണ്ടിക്കാട്ടി. മോഷ്ടിക്കപ്പെട്ട ഭാരതീയ പുരാവസ്തുക്കൾ യാതൊരു എതിർപ്പുമില്ലാതെ വിദേശത്ത് വിറ്റഴിക്കപ്പെട്ടിരുന്ന മുൻകാലങ്ങളിൽ നിന്ന് വ്യത്യസ്തമായി, കഴിഞ്ഞ പന്ത്രണ്ട് വർഷത്തിനിടയിൽ പൈതൃക വസ്തുക്കൾ തിരികെ കൊണ്ടുവന്നത് അദ്ദേഹം എടുത്തുപറഞ്ഞു. “കഴിഞ്ഞ 12 വർഷത്തിനിടയിൽ ഇത്തരം അറുന്നൂറിലധികം പുരാതന വിഗ്രഹങ്ങൾ നാം തിരികെ കൊണ്ടുവന്നു,” ശ്രീ മോദി ചൂണ്ടിക്കാണിച്ചു.

സ്വാമിജി ഭാരതീയ തത്ത്വചിന്തയെ ലോകമെമ്പാടും എത്തിച്ചതിനെയും, ഇന്ന് അന്താരാഷ്ട്ര യോഗ ദിനം ലോകത്തെ ഭാരതവുമായി ഒന്നിപ്പിക്കുന്നതിനെയും താരതമ്യപ്പെടുത്തിക്കൊണ്ട്, സ്വന്തം പൈതൃകത്തിലുള്ള രാജ്യത്തിന്റെ വീണ്ടെടുത്ത അഭിമാനവും അടിമത്ത മനോഭാവത്തിൽ നിന്നുള്ള മോചനവും പുരാതന മുനിമാരും രാജ്യസ്നേഹികളും വിഭാവനം ചെയ്ത പാതയിലൂടെയാണ് രാജ്യം മുന്നേറുന്നത് എന്നതിന്റെ തെളിവാണെന്ന് പ്രധാനമന്ത്രി ഊന്നിപ്പറഞ്ഞു. ഈ യാത്രയിൽ അവരുടെ ബൗദ്ധിക പാരമ്പര്യമാണ് രാജ്യത്തിന്റെ ഏറ്റവും വലിയ കരുത്തായി നിലകൊള്ളുന്നതെന്ന് അദ്ദേഹം വ്യക്തമാക്കി. “നമ്മുടെ പൈതൃകത്തിലുള്ള ഈ ആത്മാഭിമാനവും അടിമത്ത മനോഭാവത്തിൽ നിന്നുള്ള സ്വാതന്ത്ര്യത്തിന്റെ ഈ ഉറപ്പും രാജ്യം ഇപ്പോൾ ആ പാതയിലാണ് മുന്നേറുന്നത് എന്നതിന്റെ തെളിവാണ്,” പ്രധാനമന്ത്രി മോദി ഉറപ്പിച്ചു പറഞ്ഞു.

വിവിധ സംഘടനകൾ വ്യത്യസ്ത ലക്ഷ്യങ്ങൾ പിന്തുടരുമ്പോഴും, എല്ലാ വഴികളും അന്തിമമായി ദേശീയ വികസനവും മഹത്വവുമെന്ന ഒറ്റ ലക്ഷ്യസ്ഥാനത്തേക്കാണ് എത്തിച്ചേരുന്നതെന്ന് ഊന്നിപ്പറഞ്ഞുകൊണ്ട്, സ്വാമി ചിന്മയാനന്ദൻ തന്റെ കാലഘട്ടത്തിലെ വെല്ലുവിളികൾക്ക് അനുയോജ്യമായ നിശ്ചയദാർഢ്യങ്ങൾ കൈക്കൊണ്ടതുപോലെ, ഇന്നത്തെ തലമുറ ആധുനിക സാമൂഹിക വൈകല്യങ്ങളെയും വെല്ലുവിളികളെയും നേരിടണമെന്ന് പ്രധാനമന്ത്രി ചൂണ്ടിക്കാട്ടി. ഭിന്നിപ്പിക്കുന്ന ശക്തികൾക്കെതിരെ സമൂഹത്തെ ഒന്നിച്ചുനിർത്താനും, സ്വാശ്രയത്വം പ്രോത്സാഹിപ്പിക്കാനും, 2047-ലെ ‘വികസിത  ഭാരതം’ എന്ന ലക്ഷ്യവുമായി ഓരോ പൗരനെയും ബന്ധിപ്പിക്കാനുമുള്ള  സജീവമായ ശ്രമങ്ങൾക്ക്  അദ്ദേഹം ആഹ്വാനം ചെയ്തു. “ഇന്ന്, ഭിന്നിപ്പിക്കുന്ന ശക്തികൾക്കെതിരെ നാം സമൂഹത്തെ ഒന്നിച്ചുനിർത്തണം,” ശ്രീ മോദി ഉറപ്പിച്ചു പറഞ്ഞു.

2047-ൽ ഇന്ത്യയുടെ സ്വാതന്ത്ര്യ ശതാബ്ദിയും ചിന്മയ മിഷന്റെ ശതാബ്ദി കാലഘട്ടവും ഒരുമിച്ച് എത്തുന്ന ചരിത്രപരമായ അപൂർവ്വത ചൂണ്ടിക്കാണിച്ചുകൊണ്ട്, ഇരു യാത്രകളും ഒരേ ലക്ഷ്യങ്ങളാണ് പങ്കിടുന്നതെന്നും കൈകോർത്തു മുന്നേറണമെന്നും പ്രധാനമന്ത്രി പ്രസ്താവിച്ചു. വികസിത ഭാരതം പടുത്തുയർത്താൻ സഹായിക്കുന്നതിനായി മിഷന്റെ ആചാര്യന്മാരും സാധകരും സന്നദ്ധപ്രവർത്തകരും അടങ്ങുന്ന ആഗോള കുടുംബം ഗുരുദേവന്റെ പാരമ്പര്യവും പതിറ്റാണ്ടുകളുടെ അനുഭവസമ്പത്തും പ്രയോജനപ്പെടുത്തുമെന്ന് പൂർണ്ണ വിശ്വാസം പ്രകടിപ്പിച്ച അദ്ദേഹം തന്റെ സുപ്രധാന സന്ദേശവും ആശംസകളും നേർന്നു. “അതായത്, ചിന്മയ മിഷന്റെ ശതാബ്ദി യാത്രയും ഒരു വികസിത ഭാരതത്തിനായുള്ള യാത്രയും ഒന്നിച്ച് മുന്നേറും,” പ്രധാനമന്ത്രി മോദി ഉറപ്പിച്ചു പറഞ്ഞു.

Delighted to join the Chinmaya Amrit Mahotsav Global Sammelan. The Chinmaya Mission has spent decades serving communities and sharing India’s spiritual wisdom with the world. https://t.co/gvALnWbo91

— Narendra Modi (@narendramodi) October 23, 2026

चिन्मय मिशन केवल एक संस्था नहीं है।

ये एक चिन्मय विचार है… जिसकी स्थापना एक चिन्मय ऋषि ने की थी… इतने दशकों की इसकी यात्रा भी, चिन्मय संकल्पों से भरी रही है।

और, जो चिन्मय है… वो स्वाभाविक ही अमर है, अमृतमय है: PM @narendramodi

— PMO India (@PMOIndia) October 23, 2026

हमारा राष्ट्र ही हमारी संस्कृति की जन्मभूमि है।

ये राष्ट्र ही हमारे अस्तित्व का आधार है: PM @narendramodi

— PMO India (@PMOIndia) October 23, 2026

चिन्मय मिशन के प्रयासों से आज लाखों युवा ऐसे हैं… जो भारत के सांस्कृतिक brand ambassador का काम कर रहे हैं।

ये युवा भारतीय मूल्यों को नई पीढ़ी तक पहुंचा रहे हैं: PM @narendramodi

— PMO India (@PMOIndia) October 23, 2026

****