പിഎം ഇന്ത്യ

ഫ്രാൻസിലെ എവിയാനിൽ വെച്ച് നടന്ന ജി7 ഉച്ചകോടിയിൽ “എല്ലാവർക്കും സമതുലിതവും പങ്കിട്ടതും സുസ്ഥിരവുമായ സാമ്പത്തിക വളർച്ച വീണ്ടെടുക്കൽ” എന്ന വിഷയത്തെക്കുറിച്ചുള്ള ഔട്ട്റീച്ച് സമ്മേളനത്തെ പ്രധാനമന്ത്രി ശ്രീ നരേന്ദ്ര മോദി ഇന്ന് അഭിസംബോധന ചെയ്തു.

പങ്കിട്ടതും സുസ്ഥിരവുമായ വളർച്ചയ്ക്ക് ഉച്ചകോടി നൽകിയ ഊന്നലിനെ അഭിനന്ദിച്ച പ്രധാനമന്ത്രി, ലോകം അനിശ്ചിതാവസ്ഥകളാൽ ബാധിക്കപ്പെട്ട ഒരു സമയത്ത് സുസ്ഥിര വളർച്ചയെക്കുറിച്ചുള്ള ഈ സന്ദേശം ലോകമെമ്പാടും അർത്ഥവത്തായി സ്വീകരിക്കപ്പെടുമെന്ന് ചൂണ്ടിക്കാട്ടി. വളർച്ചയെന്നത് കേവലം ജിഡിപി അല്ലെങ്കിൽ വ്യാപാര കണക്കുകൾ മാത്രമാകരുതെന്നും മറിച്ച് അത് എല്ലാവരെയും ഉൾക്കൊള്ളുന്നതിലും ജനക്ഷേമത്തിലും ഉണ്ടാക്കുന്ന യഥാർത്ഥ സ്വാധീനമായിരിക്കണം മാനദണ്ഡമെന്നും അദ്ദേഹം പ്രസ്താവിച്ചു. ഇക്കാര്യത്തിൽ “സബ്കാ സാഥ്, സബ്കാ വികാസ്, സബ്കാ വിശ്വാസ്, സബ്കാ പ്രയാസ്” (എല്ലാവർക്കുമൊപ്പം, എല്ലാവരുടെയും വികസനം, എല്ലാവരുടെയും വിശ്വാസം, എല്ലാവരുടെയും പ്രയത്നം) എന്ന തത്ത്വങ്ങളെ അടിസ്ഥാനമാക്കിയുള്ള ഇന്ത്യയുടെ എല്ലാവരെയും ഉൾക്കൊള്ളുന്ന വികസന മാതൃക അദ്ദേഹം എടുത്തുപറഞ്ഞു.

“ഒറ്റ ഭൂമി, ഒറ്റ കുടുംബം, ഒറ്റ ഭാവി” എന്ന മുദ്രാവാക്യത്തോടെയുള്ള ഇന്ത്യയുടെ ജി20 അധ്യക്ഷപദവിയിൽ കൃത്യമായി പ്രതിഫലിച്ചതുപോലെ ഇന്ത്യയുടെ എല്ലാവരെയും ഉൾക്കൊള്ളുന്ന വളർച്ചയെന്ന മന്ത്രം അതിന്റെ അന്താരാഷ്ട്ര ഇടപെടലുകൾക്കും വഴികാട്ടിയായിട്ടുണ്ടെന്ന് പ്രധാനമന്ത്രി ചൂണ്ടിക്കാട്ടി. വിതരണ ശൃംഖലകൾ ശക്തിപ്പെടുത്തുന്നതിനും നിക്ഷേപ-തൊഴിൽ അവസരങ്ങൾ സൃഷ്ടിക്കുന്നതിനും നൂതനാശയങ്ങളെ പ്രോത്സാഹിപ്പിക്കുന്നതിനുമായി രൂപകൽപ്പന ചെയ്ത ഇന്ത്യ-മിഡിൽ ഈസ്റ്റ്-യൂറോപ്പ് സാമ്പത്തിക ഇടനാഴിയുടെ (IMEC) ആശയ രൂപീകരണത്തിന് പിന്നിലും സമാനമായ സമീപനമാണുള്ളതെന്ന് അദ്ദേഹം കൂട്ടിച്ചേർത്തു. പ്രതിസന്ധികളും സംഘർഷങ്ങളും ഗ്ലോബൽ സൗത്തിനെ (ആഗോള ദക്ഷിണ രാജ്യങ്ങളെ) തളർത്തുന്ന രീതിയിലുള്ള ആഘാതം സൃഷ്ടിച്ചിട്ടുണ്ടെന്ന് എടുത്തുപറഞ്ഞ അദ്ദേഹം, അവരുടെ ഭാരങ്ങൾ ലഘൂകരിക്കുന്നതിനായി അന്താരാഷ്ട്ര ഐക്യദാർഢ്യത്തിന് ആഹ്വാനം ചെയ്തു. വികസ്വര രാജ്യങ്ങൾക്ക് സാമ്പത്തിക പ്രതിരോധശേഷി നൽകാൻ കഴിയുന്ന തരത്തിലുള്ള പിന്തുണാ സംവിധാനങ്ങൾ അന്താരാഷ്ട്ര ധനകാര്യ സ്ഥാപനങ്ങൾ വികസിപ്പിക്കണമെന്ന് അദ്ദേഹം നിർദ്ദേശിച്ചു. IMEC മാതൃകയിൽ ആഫ്രിക്ക, ലാറ്റിൻ അമേരിക്ക, പസഫിക് ദ്വീപ് രാജ്യങ്ങളെ ബന്ധിപ്പിക്കുന്ന കണക്റ്റിവിറ്റി പ്രോജക്ടുകൾ പരിഗണിക്കുന്നതിനും അദ്ദേഹം ആഹ്വാനം ചെയ്തു. ഈ കാഴ്ചപ്പാട് യാഥാർത്ഥ്യമാക്കുന്നതിന് ജി7-ന്റെ മൂലധനവും ഇന്ത്യയുടെ പ്രതിഭയും ഗ്ലോബൽ സൗത്തിന്റെ പങ്കാളിത്തവും സംയോജിപ്പിക്കാൻ കഴിയുന്ന ‘ഇന്റർനാഷണൽ മൊബിലൈസേഷൻ പാർട്ണർഷിപ്പ് ഫോർ ആക്സിലറേറ്റിംഗ് കണക്റ്റിവിറ്റി ആൻഡ് ട്രേഡ്’ അല്ലെങ്കിൽ ‘ഇംപാക്ട്’ (IMPACT) രൂപീകരിക്കാൻ പ്രധാനമന്ത്രി നിർദ്ദേശിച്ചു.

ഏകീകരണം, പങ്കാളിത്തം, പങ്കിട്ട പുരോഗതി എന്നിവയിലുള്ള ഇന്ത്യയുടെ വിശ്വാസമാണ് ജി7 അംഗങ്ങളുമായും മറ്റ് നിരവധി രാജ്യങ്ങളുമായും വ്യാപാര കരാറുകളിൽ ഏർപ്പെടാൻ ഇന്ത്യയെ പ്രചോദിപ്പിച്ചതെന്ന് ചൂണ്ടിക്കാട്ടിയ പ്രധാനമന്ത്രി, സുസ്ഥിരവും വിശ്വസനീയവും സമൃദ്ധവുമായ ഒരു ആഗോള സമ്പദ്‌വ്യവസ്ഥയോടുള്ള ഇന്ത്യയുടെ പ്രതിബദ്ധത വീണ്ടും ഉറപ്പിച്ചു.

***

SK