پی ایم انڈیا

وزیراعظم جناب نریندر مودی نے گوٹنبرگ میں سویڈن کے وزیراعظم جناب اولف کریسٹرسن کے ساتھ دوطرفہ بات چیت کی۔ سویڈن کی ولی عہد شہزادی وکٹوریہ نے بھی اس میٹنگ میں شرکت کی اور شاہ کارل  سولہویں گستاف اور ملکہ سلویا کی جانب سے دلی نیک خواہشات پیش کیں۔ وزیراعظم نریندر مودی نے شاہ کی 80ویں سالگرہ پر اپنی پرتپاک مبارکباد پیش کی۔

دونوں رہنماؤں نے بھارت اور سویڈن کے تعلقات کے مکمل پہلوؤں کا جائزہ لیا اور تجارت و سرمایہ کاری، جدت، ماحول دوست معیشت کی طرف منتقلی، ابھرتی ہوئی ٹیکنالوجیز، دفاع و سلامتی، ڈیجیٹلائزیشن، چھوٹے اور درمیانے درجے کے کاروبار، خلائی تحقیق، سائنسی تحقیق، تعلیم، ثقافت اور عوامی روابط جیسے مختلف شعبوں میں بڑھتی ہوئی پیش رفت کو تسلیم کیا۔ انہوں نے اس عزم کا اعادہ کیا کہ یہ تعلقات مشترکہ جمہوری اقدار پر مبنی ہیں اور جدت، پائیداری اور تحقیق و ترقی کے تعاون سے تقویت پاتے ہیں۔ انہوں نے اس بات پر زور دیا کہ اس تعاون کو مزید مؤثر بنانے کے لیے اعلیٰ سطح کے سیاسی روابط اور ادارہ جاتی بات چیت کو باقاعدگی سے جاری رکھنا ضروری ہے۔

دونوں رہنماؤں نے بھارت اور سویڈن کے تعلقات کو اسٹریٹجک شراکت داری کے درجے تک بلند کرنے پر اتفاق کیا۔ یہ اسٹریٹجک شراکت داری چار بنیادی ستونوں پر مشتمل ہوگی: پائیداری اور سلامتی کے لیے اسٹریٹجک  بات چیت، نئی نسل کی اقتصادی شراکت داری، ابھرتی ہوئی ٹیکنالوجیز اور قابل اعتماد رابطہ، اور مستقبل کی مشترکہ تعمیر-انسان، کرہ ارض، صحت اور لچک۔ اس شراکت داری کے مؤثر نفاذ کے لیے دونوں رہنماؤں نے بھارت-سویڈن مشترکہ ایکشن پلان 2026-2030 کو اختیار کیا، جو سیاسی، اقتصادی، تکنیکی، سلامتی، ماحولیاتی اور عوامی روابط کے شعبوں میں تعاون کے لیے ایک جامع فریم ورک فراہم کرتا ہے۔

دونوں رہنماؤں نے اس بات پر زور دیا کہ حال ہی میں مکمل ہونے والا بھارت-یورپی اتحاد آزاد تجارتی معاہدہ اقتصادی اور تجارتی تعلقات میں ایک نیا باب شروع کر چکا ہے، اور انہوں نے اس بات پر اتفاق کیا کہ وہ تجارت، سرمایہ کاری اور تکنیکی روابط کو مزید مضبوط بنانے کے لیے اس کے جلد نفاذ کی کوششیں جاری رکھیں گے۔

وزیراعظم جناب نریندر مودی نے جدت، صاف توانائی  کی ٹیکنالوجیز، جدید صنعت سازی، پائیدار نقل و حرکت اور ڈیجیٹل تبدیلی سمیت اسٹریٹجک شعبوں میں بھارت کے ساتھ سویڈن کی مسلسل شراکت داری کو سراہا۔ وزیراعظم کرسٹرسن نے ڈیجیٹل تبدیلی اور مصنوعی ذہانت کے شعبے میں بھارت کی پیش رفت کی تعریف کی۔ انہوں نے سویڈن کی معیشت اور جدت کے ماحولیاتی نظام میں بھارتی کمیونٹی کے مثبت کردار کا بھی ذکر کیا۔ وزیراعظم نریندر مودی نے بھارت کی ترقیاتی کہانی میں سویڈن کی مزید شمولیت کی دعوت دی۔

دونوں رہنماؤں نے باہمی دلچسپی کے اہم علاقائی اور عالمی امور پر بھی تبادلہ خیال کیا۔ انہوں نے اقوام متحدہ اور دیگر کثیر جہتی اداروں میں اصلاحات کی ضرورت پر زور دیا۔ وزیراعظم نریندر مودی نے دہشت گردی کے خلاف جنگ میں سویڈن کی مضبوط حمایت پر ان کا شکریہ ادا کیا۔ دونوں رہنماؤں نے امن، استحکام، مضبوط سپلائی چین اور پائیدار اقتصادی ترقی کے فروغ کے لیے اپنے عزم کا اعادہ کیا۔

***

ش ح ۔ع ح۔م ش

U. No.7176