پی ایم انڈیا

وزیر اعظم جناب نریندر مودی نے آج مسقط میں عزت مآب سلطان ہیثم بن طارق کے ساتھ دو طرفہ ملاقات کی ۔  شاہی محل پہنچنے پر وزیر اعظم کا عزت مآب نے پرتپاک استقبال کیا اور رسمی خیرمقدم  کیا ۔

دونوں رہنماؤں نے بلمشافہ اور وفود کی سطح کی  ملاقات کی ۔  انہوں نے کثیر جہتی بھارت-عمان کلیدی شراکت داری کا جامع جائزہ لیا اور دو طرفہ تعلقات میں پیش رفت کو سراہا ۔  انہوں نے کہا کہ یہ دورہ بھارت اور عمان کے تعلقات کے لیے خصوصی   اہمیت  کا حامل ہے کیونکہ دونوں ممالک اس سال سفارتی تعلقات کے قیام کے 70 سال پورے ہونے کا جشن منا رہے ہیں ۔

انہوں نے دو طرفہ تعلقات میں ایک تاریخی پیش رفت کے طور پر جامع اقتصادی شراکت داری معاہدے (سی ای پی اے) پر دستخط کا خیرمقدم کیا اور کہا کہ اس سے کلیدی شراکت داری کو بڑا فروغ ملے گا ۔  دو طرفہ تجارت 10 ارب امریکی ڈالر سے تجاوز کرنے اور آگے بڑھتے ہوئے دو طرفہ سرمایہ کاری پر اطمینان کا اظہار کرتے ہوئے ، وزیر اعظم نے اس بات پر زور دیا کہ سی ای پی اے دو طرفہ تجارت اور سرمایہ کاری کو نمایاں طور پر فروغ دے گا ، روزگار پیدا کرے گا اور دونوں ممالک میں بہت سے  امکانات پیدا کرے گا۔

رہنماؤں نے طویل مدتی توانائی کے انتظامات ، قابل تجدید توانائی کے منصوبوں اور گرین ہائیڈروجن اور گرین امونیا منصوبوں کے ذریعے توانائی کے اشتراک کو نئی رفتار دینے پر بھی تبادلہ خیال کیا ۔  وزیر اعظم نے عمان کی بین الاقوامی شمسی اتحاد میں شمولیت کو سراہا اور انہیں کولیشن فار ڈیزاسٹر ریزیلینٹ انفراسٹرکچر اور گلوبل بائیو فیول الائنس میں شامل ہونے کی دعوت دی ۔

وزیر اعظم نے کہا کہ دونوں ممالک زرعی سائنس ، مویشی پروری ، ایکوا کلچر اور موٹے اناج  کی کاشت کے شعبوں میں تعاون سمیت زرعی تعاون سے فائدہ حاصل کر  سکتے ہیں ۔

تعلیم کے شعبے میں تعاون کی اہمیت کو تسلیم کرتے ہوئے ، دونوں رہنماؤں نے کہا کہ اساتذہ اور محققین کا تبادلہ باہمی   طور پرسودمند ہوگا ۔

دونوں رہنماؤں نے خوراک کی یقینی فراہمی  ، مینوفیکچرنگ ، ڈیجیٹل ٹیکنالوجیز ، اہم معدنیات ، لاجسٹکس ،  افرادی قوت کا فروغ اور خلائی اشتراک  کے شعبوں میں تعاون پر بھی تبادلہ خیال کیا ۔

مالیاتی خدمات پر ، انہوں نے یو پی آئی اور عمانی ڈیجیٹل ادائیگی کے نظام ، روپئے کارڈ کو اپنانے اور مقامی کرنسیوں میں تجارت کے درمیان تعاون پر تبادلہ خیال کیا ۔

وزیر اعظم نے کہا کہ کھاد اور زرعی تحقیق دونوں فریقوں کے لیے فائدہ مند ہیں اور انہیں مشترکہ سرمایہ کاری سمیت ان شعبوں میں زیادہ سے زیادہ تعاون کے لیے کام کرنا چاہیے ۔

دونوں رہنماؤں نے بحری شعبے سمیت دفاع اور سلامتی کے شعبے میں اشتراک  کو مزید بڑھانے کے عزم کا اعادہ کیا ۔

وزیر اعظم نے عمان میں ہندوستانی برادری کی فلاح و بہبود کے لیے ان کے تعاون پر عزت مآب کا شکریہ ادا کیا ۔  انہوں نے کہا کہ سمندری ورثے ، زبان کے فروغ ، نوجوانوں کے تبادلے اور کھیلوں کے تعلقات کے شعبوں میں کئی نئے دو طرفہ اقدامات عوام سے عوام   کے درمیان تعلقات کو مزید مضبوط کریں گے ۔  انہوں نے دونوں ممالک کے مشترکہ بھرپور ثقافتی ورثے پر بھی تبادلہ خیال کیا اور سمندری عجائب میوزیم کے درمیان تعاون اور نوادرات اور مہارت کے تبادلے کی اہمیت کو اجاگر کیا۔

رہنماؤں نے عمان ویژن 2040 اور 2047 تک ایک ترقی یافتہ ملک یا وکست بھارت بننے کے ہندوستان کے ہدف کے درمیان ہم آہنگی کا خیرمقدم کیا اور اپنے عوام  کی امنگوں کو پورا کرنے کے لیے ایک دوسرے  کے لیے  اپنی مدد  کا اظہار کیا ۔

رہنماؤں نے علاقائی اور عالمی پیش رفت پر بھی نظریات  کا تبادلہ کیا اور علاقائی امن و استحکام کے لیے اپنے عزم کا اعادہ کیا ۔

دورے کے موقع پر دونوں فریقوں نے سی ای پی اے کے علاوہ سمندری ورثے ، تعلیم ، زراعت اور موٹے اناج  کی کاشت کے شعبوں میں مفاہمت ناموں/انتظامات پر بھی دستخط کیے ۔

********

ش ح ۔اع خ۔ خ م

U. No.3506