തമിഴ്‌നാട് ഗവർണർ ശ്രീ രാജേന്ദ്ര അർലേകർ ജി, ഡോ. എൽ. മുരുകൻ ജി, തിരു രാജ്‌മോഹൻ ജി, തിരു നൈനാർ നാഗേന്ദ്രൻ ജി, ഡോ. ഗിരിജ ശേഷാദ്രി അമ്മ ജി, തിരു ആർ. ആർ. ഗോപാൽ ജി, എന്റെ യുവ സുഹൃത്തുക്കളെ, അധ്യാപകരേ, രക്ഷിതാക്കളേ, എന്റെ തമിഴ് സഹോദരീസഹോദരന്മാരേ, എല്ലാവർക്കും നമസ്കാരം.

സുഹൃത്തുക്കളേ,

ഇന്ന് നവരാത്രിയുടെ ആദ്യ ദിവസമാണ്. ശിവന്റെയും ശക്തിയുടെയും പുണ്യഭൂമിയായ തമിഴ്‌നാട്ടിലെത്താനും, ദേവി സരസ്വതിയുടെ ഭക്തരെ കാണാനും സാധിച്ചത് എനിക്ക് നവരാത്രിയുടെ അതിമനോഹരമായ തുടക്കമായി മാറി. എന്റെ യുവ സുഹൃത്തുക്കളുടെ ആവേശവും എനിക്ക് കാണാനാകുന്നുണ്ട്. ആ പോസിറ്റീവ് ഊർജ്ജവും ആവേശവും എനിക്ക് അനുഭവപ്പെടുന്നു. നിങ്ങളുടെ കണ്ണുകളിൽ ഇന്ത്യയുടെ ഭാവി എനിക്ക് കാണാം.

തുടങ്ങുന്നതിന് മുൻപ് ഒരു കാര്യം പറയട്ടെ, ഇന്ന് നിശ്ചയിച്ച സമയത്തിന് പത്ത് മിനിറ്റ് മുൻപേ ഞാൻ ചെന്നൈയിൽ എത്തിയിരുന്നു. എന്നാൽ, പരിപാടികൾ ക്രമീകരിച്ച  രീതിയും ഒഴിവാക്കാനാവാത്ത ചില കാലതാമസങ്ങളും കാരണം നിങ്ങളുടെ അടുത്തേക്ക് എത്താൻ  വൈകി. പ്രതീക്ഷിച്ചതിലും വൈകിയാണ് ഞാൻ എത്തിയത്, അത് നിങ്ങൾക്കുണ്ടാക്കിയ ബുദ്ധിമുട്ടിൽ ഞാൻ ആത്മാർത്ഥമായി ക്ഷമ ചോദിക്കുന്നു.

സുഹൃത്തുക്കളേ,

വികസിത ഭാരതം എന്ന കാഴ്ചപ്പാടിന് പിന്നിലെ കരുത്താകാൻ ഇന്നത്തെ യുവതലമുറ ആഗ്രഹിക്കുന്നു. വികസിത ഭാരതത്തിന് ആവശ്യമായ പുതിയ ആശയങ്ങളും പരിഹാരങ്ങളും ഇന്ത്യയുടെ ഭാവി മാത്രമല്ല, ലോകത്തിന്റെ ഭാവി കൂടി നിർണ്ണയിക്കും.

ഇന്ന് ലോകം പരിഹാരങ്ങൾ തേടുകയാണ്. ആ പരിഹാരങ്ങൾ നൽകാനുള്ള കഴിവ് നിങ്ങൾക്കുണ്ട്.

സുഹൃത്തുക്കളേ,

ഇന്ന് ഇന്ത്യ അനന്തമായ അവസരങ്ങളാണ് ഒരുക്കുന്നത്. ഓരോ യുവാവും തങ്ങളുടെ ഭാവി ആ വലിയ കാഴ്ചപ്പാടിൽ കാണണമെന്ന് ഞാൻ ആഗ്രഹിക്കുന്നു. കാരണം, ഇത് നിങ്ങളുടെ സമയമാണ്. ഇത് നിങ്ങളുടെ സമയമാണ്. ഇത് നിങ്ങളുടെ അവസരമാണ്. ഈ സ്വപ്നം നമ്മൾ സാക്ഷാത്കരിക്കുമെന്ന് എനിക്ക് പൂർണ്ണ വിശ്വാസമുണ്ട്. നമുക്ക് ഒന്നിച്ച് അത് സാധ്യമാക്കാം!

നമുക്ക് ഒന്നിച്ച് അത് സാധ്യമാക്കാം!

നമുക്ക് ഒന്നിച്ച് അത് സാധ്യമാക്കാം!

നമുക്ക് ഒന്നിച്ച് അത് സാധ്യമാക്കാം!

സുഹൃത്തുക്കളേ, 

ഇന്ന് ഞാൻ ഇവിടെ എത്തുന്നതിന് പിന്നിൽ രസകരമായ ഒരു പ്രചോദനവുമുണ്ട്. ഏതാനും മാസങ്ങൾക്ക് മുമ്പ്, നാഗർകോവിലിൽ വെച്ച് നമ്മുടെ ഗിരിജ അമ്മ കുറച്ച് കുട്ടികളോടൊപ്പം എന്നെ കാണുകയുണ്ടായി. അവരുടെ അർപ്പണബോധവും ആത്മവിശ്വാസവും രാജ്യത്തിന്റെ ഭാവിയെക്കുറിച്ചുള്ള കരുതലും എന്റെ മനസ്സിൽ വലിയൊരു സ്വാധീനം ചെലുത്തി. ആ കൂടിക്കാഴ്ചയ്ക്കിടെ, ഈ സുവർണ്ണ ജൂബിലി ആഘോഷത്തിൽ പങ്കെടുക്കാൻ അവർ എന്നെ ക്ഷണിച്ചു. ഒന്നാമതായി അവരുടെ സ്നേഹം, രണ്ടാമതായി ഈ ചരിത്രപ്രധാനമായ സ്ഥാപനത്തോടുള്ള എന്റെ ആദരവ് – ഇവ രണ്ടും ചേർന്നപ്പോൾ, ഈ പരിപാടിയിൽ തീർച്ചയായും പങ്കെടുക്കണമെന്ന് ഞാൻ അപ്പോൾത്തന്നെ ഉറപ്പിച്ചു. അമ്പത് വർഷത്തെ ഈ ശ്രദ്ധേയമായ യാത്രയ്ക്ക് ‘വിശ്വ ഹിന്ദു വിദ്യാ കേന്ദ്ര’ത്തെയും മുഴുവൻ ‘ഹിന്ദു വിദ്യാലയ’ കുടുംബത്തെയും ഈ അവസരത്തിൽ ഞാൻ ഹൃദയം നിറഞ്ഞ അഭിനന്ദനങ്ങൾ അറിയിക്കുന്നു.

സുഹൃത്തുക്കളേ,

ഇന്ന് ‘വിശ്വ ഹിന്ദു വിദ്യാ കേന്ദ്രം’ അതിന്റെ സുവർണ്ണ ജൂബിലി ആഘോഷിക്കുകയാണ്. ഇതൊരു വലിയ നാഴികക്കല്ലാണ്; ഒപ്പം ഇതിന്റെ യാത്രയും അത്രതന്നെ പ്രചോദനാത്മകമാണ്. 1975-ൽ ചെന്നൈയിലെ വെസ്റ്റ് മാമ്പലത്ത് ഒരു ചെറിയ സ്കൂളായാണ് ഈ സ്ഥാപനം ആരംഭിച്ചത്. അന്ന് ഏഴ് വിദ്യാർത്ഥികൾ മാത്രമാണ് ഉണ്ടായിരുന്നത്. ഇന്നുള്ളതുപോലെയുള്ള സൗകര്യങ്ങളൊന്നും അന്നുണ്ടായിരുന്നില്ല. സ്ഥിരമായ കെട്ടിടം ഉണ്ടായിരുന്നില്ല. വിഭവങ്ങൾ പരിമിതമായിരുന്നു. എന്നാൽ ഒരു കാര്യമുണ്ടായിരുന്നു: ഉറച്ച നിശ്ചയദാർഢ്യവും അചഞ്ചലമായ സേവനമനോഭാവവും. അതുകൊണ്ടാണ് എല്ലാ വെല്ലുവിളികളെയും അതിജീവിച്ച് ഈ സ്ഥാപനം മുന്നോട്ട് കുതിച്ചത്. കാലക്രമേണ, ഈ ചെറിയ സംരംഭം ഒരു വലിയ വിദ്യാഭ്യാസ പ്രസ്ഥാനമായി വളർന്നു. ഇന്ന് തമിഴ്‌നാടിന്റെ വിവിധ ഭാഗങ്ങളിലായി നിങ്ങൾക്ക് പതിനഞ്ച് സ്ഥാപനങ്ങളുണ്ട്.

സുഹൃത്തുക്കളേ,

ഈ അവസരത്തിൽ, ശ്രീ ജയ്ഗോപാൽ ഗരോഡിയ ജിയുടെ സംഭാവനകളെയും ഞാൻ ആദരവോടെ സ്മരിക്കുന്നു. സ്കൂൾ കെട്ടിടം നിർമ്മിക്കുന്നതിൽ അദ്ദേഹം സുപ്രധാനമായ പങ്കുവഹിച്ചു. ‘ഹിന്ദു വിദ്യാലയ’ത്തിന്റെ ഈ യാത്ര വിജയകരമാക്കിയ എല്ലാ അധ്യാപകരെയും ജീവനക്കാരെയും രക്ഷിതാക്കളെയും പൂർവ്വ വിദ്യാർത്ഥികളെയും ഞാൻ ഇന്ന് അഭിനന്ദിക്കുന്നു. അമ്പത് വർഷത്തെ അർപ്പണബോധം. അമ്പത് വർഷത്തെ പ്രതിബദ്ധത. അമ്പത് വർഷമായി യുവതലമുറയുടെ ജീവിതം രൂപപ്പെടുത്തുന്നു.

സുഹൃത്തുക്കളേ,

വിദ്യാഭ്യാസം നൽകുന്നതിനൊപ്പം തന്നെ രാജ്യസ്നേഹികളായ പൗരന്മാരെയും എങ്ങനെ വാർത്തെടുക്കാം എന്നതിന് ഉദാഹരണമാണ് ഈ സ്ഥാപനം. എന്റെ ‘മൻ കി ബാത്ത്’ പരിപാടിയിലും ഞാൻ ഇക്കാര്യം പരാമർശിച്ചിരുന്നു. ഗിരിജ അമ്മ കുട്ടികൾക്ക് ലളിതമായ ഒരു ആശയം നൽകി: ഓരോ കുട്ടിയും ദിവസവും ഒരു രൂപ വീതം സമ്പാദിച്ച് അത് രാജ്യത്തെ സൈനികർക്കായി സമർപ്പിക്കുക. ആയിരക്കണക്കിന് കുട്ടികൾ ഈ തീരുമാനത്തിൽ പങ്കുചേർന്നപ്പോൾ ഏകദേശം 40 ലക്ഷം രൂപ സമാഹരിക്കാനായി. തീർച്ചയായും, എത്ര പ്രചോദനാത്മകമായ ഒരു മാതൃകയാണിത്!

സുഹൃത്തുക്കളേ,

ചെറിയ സംഭാവനകൾക്ക് വലിയ മാറ്റങ്ങൾ സൃഷ്ടിക്കാൻ കഴിയും. ചെറിയൊരു പരിശ്രമത്തിന് പോലും വലിയൊരു സ്വാധീനം ചെലുത്താൻ സാധിക്കും. ദുരന്തസമയങ്ങളിൽ സഹായം ആവശ്യമുള്ളവരെ പിന്തുണയ്ക്കുന്നതായാലും ശുചിത്വ യജ്ഞങ്ങളിൽ പങ്കാളികളാകുന്നതായാലും, ഈ മൂല്യങ്ങൾ ഹിന്ദു വിദ്യാലയ കുടുംബത്തിന്റെ മഹത്തായ പാരമ്പര്യത്തെയാണ് അടയാളപ്പെടുത്തുന്നത്.

സുഹൃത്തുക്കളേ,

ഈ അവസരത്തിൽ മഹാനായ ഋഷിവര്യൻ തിരുവള്ളുവറെയും ഞാൻ അനുസ്മരിക്കാൻ ആഗ്രഹിക്കുന്നു. അദ്ദേഹത്തിന്റെ ഉപദേശങ്ങൾ എല്ലാ വിദ്യാർത്ഥികൾക്കും അങ്ങേയറ്റം പ്രധാനമാണ്. അടുത്തിടെ, റഷ്യൻ പ്രസിഡന്റ് പുടിന് തിരുക്കുറലിന്റെ റഷ്യൻ പരിഭാഷ സമ്മാനിക്കാൻ എനിക്ക് അവസരം ലഭിച്ചിരുന്നു. ജീവിതകാലം മുഴുവൻ പഠനം തുടരാൻ ആഗ്രഹിക്കുന്ന ഏതൊരാൾക്കും തിരുക്കുറൾ ഒരു മികച്ച വഴികാട്ടിയാണ്. തന്റെ പ്രശസ്തമായ കുറലുകളിലൊന്നിൽ, എന്തെങ്കിലും പഠിക്കുന്നത് മാത്രം പോരാ എന്നും, പഠിച്ച കാര്യങ്ങൾ ജീവിതത്തിൽ പ്രാവർത്തികമാക്കുക എന്നത് അത്രതന്നെ പ്രധാനമാണെന്നും തിരുവള്ളുവർ നമ്മെ പഠിപ്പിക്കുന്നു. വിദ്യാർത്ഥികളായ നിങ്ങൾക്കെല്ലാവർക്കും ഇതൊരു വലിയ പാഠം കൂടിയാണ്.

സുഹൃത്തുക്കളേ,

നിങ്ങളെല്ലാവരും മഹാകവി ഭാരതിയാരുടെ കൃതികൾ ആഴത്തിൽ വായിച്ചിട്ടുണ്ടാകുമല്ലോ. അദ്ദേഹത്തിന്റെ ജീവിതത്തിൽ കാശി നഗരത്തിന് വളരെ പ്രധാനപ്പെട്ട ഒരു പങ്കുണ്ട്. കാശിയിലെ അന്തരീക്ഷത്തിൽ നിറഞ്ഞുനിന്ന ആത്മീയവും ദേശീയവുമായ ഉണർവ് അദ്ദേഹത്തിന്റെ ചിന്തകളിൽ വലിയ സ്വാധീനം ചെലുത്തിയിരുന്നു.

സുഹൃത്തുക്കളേ,

ഞാൻ കാശിയിൽ നിന്നുള്ള പാർലമെന്റ് അംഗമാണ്. ഇന്നും കാശിയിലെ ജനങ്ങൾ മഹാകവി ഭാരതിയാരെ ഓർക്കുന്നു. “അച്ചമില്ലൈ, അച്ചമില്ലൈ” (നിർഭയം, നിർഭയം) എന്ന അദ്ദേഹത്തിന്റെ വാക്കുകൾ ഭയമില്ലാതെ ജീവിക്കാൻ നമ്മെ പ്രചോദിപ്പിക്കുന്നു. അതിനാൽ, ഇവിടെയുള്ള എല്ലാ യുവസുഹൃത്തുക്കളോടും എനിക്ക് പറയാനുള്ളത് ഇതാണ്: ഭയമില്ലാതെ മുന്നോട്ട് വരിക, സ്വയം അവസരങ്ങൾ കണ്ടെത്തുക. നിങ്ങളുടെ ആശയങ്ങൾക്കായി പ്രവർത്തിക്കുക. വലിയ സ്വപ്നങ്ങൾ കാണുക. വ്യത്യസ്തമായി ചിന്തിക്കുക. ഒപ്പം, നിർഭയരായിരിക്കുക.

സുഹൃത്തുക്കളേ,

രാജ്യത്തിന്റെ വിവിധ ഭാഗങ്ങളിലൂടെയുള്ള എന്റെ യാത്രകളും അവിടെ കണ്ടുമുട്ടിയ ആളുകളിൽ നിന്ന് ലഭിച്ച അറിവുകളുമാണ് ഇന്ത്യയെക്കുറിച്ചുള്ള എന്റെ കാഴ്ചപ്പാടുകൾ രൂപപ്പെടുത്തിയത്. 1990-കളുടെ തുടക്കത്തിൽ, കന്യാകുമാരി മുതൽ കാശ്മീർ വരെയുള്ള ‘ഏക്താ യാത്ര’യിൽ ഞാനും പങ്കാളിയായിരുന്നു. ആ യാത്രയ്ക്കിടയിലാണ് ഗിരിജ അമ്മയുമായി എനിക്ക് ആദ്യമായി പരിചയപ്പെടാൻ അവസരം ലഭിച്ചത്. അന്നുമുതൽ ഞങ്ങളുടെ ആ ബന്ധം തുടരുന്നു.

സുഹൃത്തുക്കളേ,

എന്റെ യാത്രകൾ ഇന്ത്യയുടെ വൈവിധ്യത്തെ അടുത്തറിയാൻ എനിക്ക് അവസരം നൽകി. തമിഴ് ഭാഷയോടും തമിഴ് സംസ്കാരത്തോടുമുള്ള എന്റെ സ്നേഹം വളർന്നുവന്നതും ആ അനുഭവങ്ങളിൽ നിന്നാണ്.

സുഹൃത്തുക്കളേ,

അതുകൊണ്ടാണ് ഇന്ത്യയെ അടുത്തറിയാൻ ഞാൻ നിങ്ങളെ പ്രോത്സാഹിപ്പിക്കുന്നത്. നിങ്ങൾ എവിടെ പോയാലും തമിഴ് സംസ്കാരത്തെ കൂടെക്കൂട്ടുക. തമിഴ് കവിതകളും കഥകളും പാരമ്പര്യങ്ങളും നിങ്ങളുടെ സുഹൃത്തുക്കളുമായി പങ്കുവെക്കുക. വ്യത്യസ്ത പശ്ചാത്തലങ്ങളിൽ നിന്നുള്ളവരുമായി സൗഹൃദം സ്ഥാപിക്കുക. നിങ്ങൾ കെട്ടിപ്പടുക്കുന്ന സൗഹൃദങ്ങളിലൂടെയാണ് നമ്മുടെ രാജ്യത്തിന്റെ ഐക്യം ശക്തിപ്പെടുന്നത്.

സുഹൃത്തുക്കളേ,

ഇന്നത്തെ യുവതലമുറയ്ക്ക് തങ്ങളുടെ സ്വപ്നങ്ങൾ സാക്ഷാത്കരിക്കാൻ അഭൂതപൂർവമായ അവസരങ്ങളാണ് ലഭിച്ചുകൊണ്ടിരിക്കുന്നത്. രാജ്യത്തെ വിദ്യാഭ്യാസ മേഖലയിൽ ഇന്ന് സംഭവിക്കുന്ന മാറ്റങ്ങൾ നോക്കൂ. 2014-ൽ ഇന്ത്യയിൽ ഏകദേശം 750 സർവകലാശാലകളാണ് ഉണ്ടായിരുന്നത്. ഇന്ന് ആ എണ്ണം 1,300-ൽ അധികമായി വർധിച്ചു. കോളേജുകളുടെ എണ്ണവും ഏകദേശം 38,000-ൽ നിന്ന് 52,000-ത്തിലധികമായി ഉയർന്നു. സമീപ വർഷങ്ങളിൽ രാജ്യത്തിന് നിരവധി പുതിയ IIT-കൾ, IIM-കൾ, IIIT-കൾ, AIIMS സ്ഥാപനങ്ങൾ എന്നിവ ലഭിച്ചു.

സുഹൃത്തുക്കളേ,

ഇന്ന്, പുതിയ വിദ്യാഭ്യാസ നയം രാജ്യത്തെ വിദ്യാഭ്യാസത്തിന്റെ ഗുണനിലവാരം മെച്ചപ്പെടുത്തുന്നു. ഇന്ത്യൻ വിദ്യാഭ്യാസ സ്ഥാപനങ്ങൾക്ക് ആഗോളതലത്തിൽ ലഭിക്കുന്ന അംഗീകാരവും വർധിച്ചുവരികയാണ്. 2015-ലെ QS റാങ്കിംഗിൽ ഇന്ത്യയിൽ നിന്ന് 14 സർവകലാശാലകൾ മാത്രമേ ഉണ്ടായിരുന്നുള്ളൂ. ഏറ്റവും പുതിയ റാങ്കിംഗിൽ ആ എണ്ണം 52 ആയി ഉയർന്നു. ഈ കണക്കുകൾ നൽകുന്ന സന്ദേശം വളരെ വ്യക്തമാണ്: കൂടുതൽ സ്ഥാപനങ്ങൾ, കൂടുതൽ തിരഞ്ഞെടുപ്പുകൾ, ഒപ്പം നിങ്ങൾക്ക് കൂടുതൽ അവസരങ്ങളും.

സുഹൃത്തുക്കളേ,

ഓരോ യുവാവിനും വ്യത്യസ്തമായ സ്വപ്നങ്ങളും കഴിവുകളുമാണുള്ളത്. ഉദാഹരണത്തിന്, നിങ്ങളിൽ പലരും കായികരംഗത്തെ തങ്ങളുടെ തൊഴിൽ മേഖലയായി തിരഞ്ഞെടുക്കാൻ ആഗ്രഹിക്കുന്നുണ്ടാകാം. അതിനാൽ, കായികം കേവലം വിനോദമായി മാത്രം ഒതുങ്ങിനിൽക്കുന്നില്ലെന്ന് രാജ്യം ഉറപ്പാക്കുന്നു. അതുകൊണ്ടാണ് ഇന്ന് ഇന്ത്യയിലുടനീളം പുതിയ കായിക സൗകര്യങ്ങൾ ഒരുക്കുന്നത്. യുവ കായികതാരങ്ങൾക്ക് മികച്ച പരിശീലനവും പിന്തുണയും ലഭിക്കുന്നു. ഒപ്പം, അന്താരാഷ്ട്ര കായികരംഗത്ത് ഇന്ത്യയുടെ സ്ഥാനവും ഉയരുകയാണ്.

സുഹൃത്തുക്കളേ,

2030-ലെ കോമൺവെൽത്ത് ഗെയിംസിന് ആതിഥേയത്വം വഹിക്കാൻ ഇന്ത്യ തയ്യാറെടുക്കുകയാണ്. 2036-ലെ ഒളിമ്പിക്സിന് ആതിഥേയത്വം വഹിക്കുക എന്ന സ്വപ്നവുമായും ഞങ്ങൾ മുന്നോട്ട് പോകുന്നു. വരും വർഷങ്ങളിൽ ഇന്ത്യയിൽ പ്രധാനപ്പെട്ട ആഗോള കായിക മത്സരങ്ങൾ നടക്കുമ്പോൾ, നമ്മുടെ യുവജനങ്ങൾക്ക് അവരുടെ കഴിവുകൾ പ്രകടിപ്പിക്കാനുള്ള വേദിയും അവസരവും ലഭിക്കും. അതിനാൽ, ഇന്ത്യയിലെ യുവജനങ്ങൾക്ക് ഇപ്പോൾ വേദിയും സാധ്യതയും പിന്തുണയുമുണ്ട്. അതിനർത്ഥം അവസരങ്ങൾ അനന്തമാണെന്നാണ്! കായികരംഗത്തും ഇന്ത്യയെ പുതിയ ഉയരങ്ങളിലേക്ക് നിങ്ങളുടെ തലമുറ നയിക്കുമെന്ന് എനിക്ക് ഉറപ്പുണ്ട്.

സുഹൃത്തുക്കളേ,

ഇന്ന് നിങ്ങളുടെ ഇടയിൽ വന്ന് നിങ്ങളുടെ സ്വപ്നങ്ങൾ അടുത്തറിഞ്ഞപ്പോൾ, എന്റെ ആത്മവിശ്വാസം കൂടുതൽ ശക്തമായിരിക്കുന്നു. ഇന്ത്യയുടെ ഭാവി മഹത്തായതായിരിക്കുമെന്ന് എനിക്ക് ഉറപ്പിച്ചു പറയാൻ കഴിയും. ആ ഭാവിയുടെ ഏറ്റവും വലിയ നായകന്മാർ നിങ്ങളെല്ലാവരുമാണ്. നിങ്ങളുടെ കഴിവിലും ആത്മവിശ്വാസത്തിലും ശേഷിയിലും എനിക്ക് വിശ്വാസമുണ്ട്. അതുകൊണ്ട്, ഇന്ന് നിങ്ങളോടൊപ്പം ചേർന്ന് ചില പ്രധാന പ്രതിജ്ഞകൾ ആവർത്തിക്കാൻ ഞാൻ ആഗ്രഹിക്കുന്നു. ഞാൻ പറയുന്നത് നിങ്ങൾ ഏറ്റുപറയണം : നമ്മൾ അത് ചെയ്യും! നിങ്ങൾ അത് ആവർത്തിച്ചു പറയില്ലേ? ഉറപ്പായും?

2047-ഓടെ വികസിത ഇന്ത്യ.

2047-ഓടെ വികസിത ഇന്ത്യ. നമ്മൾ അത് ചെയ്യും!

എനിക്കൊപ്പം പറയൂ: നമ്മൾ അത് ചെയ്യും!

2047-ഓടെ വികസിത ഇന്ത്യ, നമ്മൾ അത് ചെയ്യും!

ലോകത്തിലെ മികച്ച മൂന്ന് സമ്പദ്‌വ്യവസ്ഥകളിൽ ഒന്ന്, നമ്മൾ അത് ചെയ്യും!

സ്വയംപര്യാപ്ത ഇന്ത്യ, നമ്മൾ അത് ചെയ്യും!

ആഗോള ഉൽപ്പാദന കേന്ദ്രം, നമ്മൾ അത് ചെയ്യും!

ഒളിമ്പിക്സിന് ആതിഥേയത്വം വഹിക്കൽ, നമ്മൾ അത് ചെയ്യും!

ചന്ദ്രനിൽ ഒരു ഇന്ത്യക്കാരൻ, നമ്മൾ അത് ചെയ്യും!

അതെ, നമ്മൾ അത് ചെയ്യും! നമ്മൾ അത് ചെയ്യും!

വികസിത തമിഴ്‌നാട്, നമ്മൾ അത് ചെയ്യും!

വികസിത തമിഴ്‌നാട്, നമ്മൾ അത് ചെയ്യും!

വികസിത ഇന്ത്യ, നമ്മൾ അത് ചെയ്യും!

വളരെയധികം നന്ദി.

നന്ദി, വണക്കം!

***

SK