പിഎം ഇന്ത്യ

പ്രധാനമന്ത്രി ശ്രീ നരേന്ദ്ര മോദി ഇന്ന് ന്യൂഡൽഹിയിലെ ഭാരത് മണ്ഡപത്തിൽ ഭാരത് പുനരുപയോഗ ഊർജ്ജ ഉച്ചകോടിയും എക്സ്പോ 2026-ഉം ഉദ്ഘാടനം ചെയ്തു. ദൈനംദിന ജീവിതത്തിലും രാഷ്ട്ര വികസനത്തിലും പുനരുപയോഗ ഊർജ്ജത്തിന്റെ നിർണായക പ്രാധാന്യത്തെ അടിവരയിടുന്ന ആഗോള ഊർജ്ജ പ്രതിസന്ധികൾ നിലനിൽക്കുന്ന സവിശേഷമായ സാഹചര്യങ്ങളിലാണ് ഈ വർഷത്തെ ഉച്ചകോടി നടക്കുന്നതെന്ന് ഇന്ത്യയിൽ നിന്നും വിദേശത്തു നിന്നുമുള്ള വ്യവസായ പ്രമുഖർ, നിക്ഷേപകർ, സ്റ്റാർട്ടപ്പ് പ്രതിനിധികൾ, മുതിർന്ന ഉദ്യോഗസ്ഥർ എന്നിവരടങ്ങിയ സദസ്സിനെ അഭിസംബോധന ചെയ്തുകൊണ്ട് പ്രധാനമന്ത്രി ചൂണ്ടിക്കാട്ടി. അന്താരാഷ്ട്ര സൗരോർജ്ജ സഖ്യത്തിന്റെ (ഇന്റർനാഷണൽ സോളാർ അലയൻസ്) ഒമ്പതാം അസംബ്ലിയോടനുബന്ധിച്ചു നടക്കുന്നതിനാലും ഗ്രീൻ ഹൈഡ്രജൻ സംബന്ധിച്ച നാലാമത് സമ്മേളനത്തിലെ പ്രതിനിധികളെ ഉൾക്കൊള്ളുന്നതിനാലും ഈ വർഷത്തെ പരിപാടിയുടെ വ്യാപ്തി വളരെ വലുതാണെന്ന് അദ്ദേഹം വ്യക്തമാക്കി.

കൊറോണ മഹാമാരി മുതൽ നിലവിലുള്ള പശ്ചിമേഷ്യൻ പ്രതിസന്ധി വരെയുള്ള അഭൂതപൂർവമായ തടസ്സങ്ങളെ ആഗോള സാമ്പത്തിക രംഗം നേരിട്ടിട്ടുണ്ടെന്ന് നിരീക്ഷിച്ച പ്രധാനമന്ത്രി, ഉയർന്ന സാമ്പത്തിക വളർച്ച നിലനിർത്തിക്കൊണ്ട് തന്നെ രാജ്യം ഈ പ്രതിസന്ധികളെ എത്രത്തോളം ഫലപ്രദമായി കൈകാര്യം ചെയ്തുവെന്നതിൽ 140 കോടി ഇന്ത്യക്കാർ അഭിമാനിക്കുന്നുവെന്ന് പ്രസ്താവിച്ചു. ശുദ്ധോർജ്ജ മേഖലയിൽ കഴിഞ്ഞ പത്തുവർഷമായി നടത്തുന്ന തുടർച്ചയായ ആഭ്യന്തര നിക്ഷേപങ്ങളും വ്യവസ്ഥാപരമായ പരിഷ്കാരങ്ങളുമാണ് കടുത്ത ബാഹ്യ പ്രതിസന്ധികളിൽ നിന്ന് രാജ്യത്തെ സംരക്ഷിച്ചതെന്ന് അദ്ദേഹം ഊന്നിപ്പറഞ്ഞു. “കഴിഞ്ഞ ദശകത്തിൽ ഇന്ത്യ ശുദ്ധോർജ്ജത്തിൽ നിക്ഷേപം നടത്തുകയും ഇതിനായി പുതിയ സംവിധാനങ്ങൾ സൃഷ്ടിക്കുകയും ചെയ്തിരുന്നില്ലെങ്കിൽ നമ്മുടെ പ്രതിസന്ധി ലോകത്തിലെ മറ്റു രാജ്യങ്ങളേക്കാൾ കൂടുതൽ ഗുരുതരമാകുമായിരുന്നു,” പ്രധാനമന്ത്രി മോദി ചൂണ്ടിക്കാട്ടി.

ഊർജ്ജ സുരക്ഷയും സാമ്പത്തിക സുരക്ഷയും തമ്മിലുള്ള നേരിട്ടുള്ള ബന്ധം സമീപകാല ആഗോള തടസ്സങ്ങൾ തെളിയിച്ചിട്ടുണ്ടെന്ന് വ്യക്തമാക്കിയ പ്രധാനമന്ത്രി, ഫോസിൽ ഇന്ധനങ്ങളുടെ ശേഖരം പരിമിതവും ഏതാനും ചില പ്രദേശങ്ങളിൽ മാത്രം കേന്ദ്രീകൃതവുമാണെന്നതിനാൽ അവയെ അമിതമായി ആശ്രയിക്കുന്നത് ആഗോള സമ്പദ്‌വ്യവസ്ഥയെ നിരന്തരം തടസ്സപ്പെടുത്തുമെന്ന് മുന്നറിയിപ്പ് നൽകി. ശുദ്ധോർജ്ജത്തിന്റെ പരിധിയില്ലാത്തതും സാർവത്രികമായി പ്രാപ്യവുമായ സാധ്യതകളെ എടുത്തുകാണിച്ചുകൊണ്ട്, ഈ ദുർബലമായ സാഹചര്യവുമായി അദ്ദേഹം അതിനെ താരതമ്യം ചെയ്തു. “ഊർജ്ജ സുരക്ഷയുടെ ഭാവി ശുദ്ധോർജ്ജത്തിലാണെന്ന് നമുക്കെല്ലാവർക്കും അറിയാം” ശ്രീ മോദി ഉറപ്പിച്ചുപറഞ്ഞു.

2030-ഓടെ 500 ജിഗാവാട്ട് ഫോസിൽ ഇതര ഊർജ്ജ ശേഷി കൈവരിക്കുമെന്ന COP-26 വാഗ്ദാനം പ്രതിഫലിപ്പിക്കുന്ന വിധത്തിൽ വാഗ്ദാനങ്ങളും അഭിനിവേശവും പ്രകടനവും അടയാളപ്പെടുത്തിയ ഒന്നാണ് ഇന്ത്യയുടെ കഴിഞ്ഞ 12 വർഷത്തെ ശുദ്ധോർജ്ജ യാത്രയെന്ന് പ്രധാനമന്ത്രി വിശേഷിപ്പിച്ചു. നിർദ്ദിഷ്ട സമയത്തിന് അഞ്ച് വർഷം മുമ്പ് തന്നെ, അതായത് 2025-ൽ, ഉൽപ്പാദിപ്പിക്കുന്ന ആകെ വൈദ്യുത ശേഷിയുടെ പകുതിയും ഫോസിൽ ഇതര സ്രോതസ്സുകളിൽ നിന്ന് ഉൽപ്പാദിപ്പിക്കുമെന്ന പാരീസ് ഉടമ്പടിയിലെ പ്രതിജ്ഞ ഇന്ത്യ നിറവേറ്റിയതായി അദ്ദേഹം ചൂണ്ടിക്കാട്ടി. ആകെ വൈദ്യുത ശേഷിയുടെ 50 ശതമാനത്തിലധികം ഫോസിൽ ഇതര സ്രോതസ്സുകളിൽ നിന്നാക്കി മാറ്റിയ ഇന്ത്യ, സൗരോർജ്ജത്തിലും പുനരുപയോഗ ഊർജ്ജത്തിലും നിലവിൽ മുൻനിരയിലുള്ള മൂന്ന് രാജ്യങ്ങളിൽ ഒന്നാണെന്നും 500 ജിഗാവാട്ട് എന്ന ലക്ഷ്യത്തിലേക്ക് 300 ജിഗാവാട്ടോളം ഇതിനകം കൈവരിച്ചതായും അദ്ദേഹം ചൂണ്ടിക്കാട്ടി. തുടർന്ന് വരാനിരിക്കുന്ന 10-11 വർഷത്തിനുള്ളിൽ 500 ജിഗാവാട്ട് പുതിയ ഫോസിൽ ഇതര ഊർജ്ജ ശേഷി കൂടി കൂട്ടിച്ചേർക്കുക എന്ന അഭിലഷണീയമായ ലക്ഷ്യം അദ്ദേഹം പ്രഖ്യാപിച്ചു. “ഈ ലക്ഷ്യം അല്പം പ്രയാസകരമാണ്, പക്ഷേ എന്റെ രാജ്യത്തിന്റെ കഴിവിലും ശേഷിയിലും എനിക്ക് പൂർണ്ണ വിശ്വാസമുണ്ട്; അതിനാൽ ഞാൻ പറയുന്നു, നമ്മൾ ഇത് കൈവരിക്കുക തന്നെ ചെയ്യും!” പ്രധാനമന്ത്രി മോദി ഉറപ്പിച്ചുപറഞ്ഞു.

ഇന്ത്യയുടെ നവീനാശയങ്ങളുടെയും അനുഭവങ്ങളുടെയും നേട്ടങ്ങൾ ലോകമെമ്പാടുമുള്ള മനുഷ്യരാശിയുമായി പങ്കുവെക്കാൻ ഇന്ത്യ ആഗ്രഹിക്കുന്നുവെന്ന് ഊന്നിപ്പറഞ്ഞ പ്രധാനമന്ത്രി, പ്രത്യേക ഉദാഹരണങ്ങൾ അവതരിപ്പിക്കുന്നതിന് മുമ്പ്, അതേ സഹകരണ മനോഭാവത്തോടെയാണ് രാജ്യം ശുദ്ധോർജ്ജത്തെ സമീപിക്കുന്നതെന്ന് പ്രസ്താവിച്ചു. “ഈ രംഗത്തെ ഇന്ത്യയുടെ വിജയങ്ങൾ ലോകത്തിലെ നിരവധിയായ മറ്റ് രാജ്യങ്ങൾക്കും ഉപയോഗപ്രദമാകും,” ശ്രീ മോദി അഭിപ്രായപ്പെട്ടു.

ഒരു കോടി വീടുകളിൽ പുരപ്പുറ സൗരോർജ്ജ പാനലുകൾ സ്ഥാപിക്കുന്നതിനായി 2024 ഫെബ്രുവരിയിൽ തുടക്കം കുറിച്ച പി.എം സൂര്യഘർ മുഫ്ത് ബിജ്‌ലി യോജനയുടെ ദ്രുതഗതിയിലുള്ള പുരോഗതി വിശദീകരിച്ചുകൊണ്ട്, കഴിഞ്ഞ 24-25 മാസത്തിനുള്ളിൽ 65 ലക്ഷത്തിലധികം കുടുംബങ്ങൾ ഈ പദ്ധതിയുടെ ഭാഗമായതായി പ്രധാനമന്ത്രി ചൂണ്ടിക്കാട്ടി. പ്രതിദിനം ആറ് ദിവസത്തിൽ ഒരു ലക്ഷം പുതിയ വീടുകൾ എന്ന വേഗതയിലാണ് ഈ വളർച്ച. ഒരു പഠനമനുസരിച്ച് ഇത് വൈദ്യുതി ബില്ലുകളിൽ ഏകദേശം 76 ശതമാനം കുറവ് വരുത്തുകയും ലക്ഷക്കണക്കിന് കുടുംബങ്ങളുടെ ബില്ലുകൾ പൂജ്യത്തിലേക്ക് എത്തിക്കുകയും ചെയ്തിട്ടുണ്ട്. ഈ കുടുംബങ്ങൾ അധികമായി ഉത്പാദിപ്പിക്കുന്ന വൈദ്യുതി ഗ്രിഡിലേക്ക് തിരികെ നൽകി പണം സമ്പാദിക്കുകയും ചെയ്യുന്നു. “ഇന്ത്യയുടെ ഈ പദ്ധതിക്ക് പല രാജ്യങ്ങളിലെയും ഊർജ്ജ സുരക്ഷയ്ക്ക് വലിയ കരുത്ത് പകരാൻ കഴിയും,” പ്രധാനമന്ത്രി മോദി നിരീക്ഷിച്ചു.

കഴിഞ്ഞ 12 വർഷമായി സൗരോർജ്ജത്തെ ദൈനംദിന ജീവിതത്തിലേക്കും വ്യവസായങ്ങളിലേക്കും കൃഷിയിലേക്കും സംയോജിപ്പിക്കുന്നതിന് നടത്തുന്ന ശ്രമങ്ങൾ എടുത്തുപറഞ്ഞ പ്രധാനമന്ത്രി, 44,000-ത്തിലധികം ​ഗവൺമെന്റ് കെട്ടിടങ്ങളെ സൗരോർജ്ജവുമായി ബന്ധിപ്പിച്ചതിലൂടെ പ്രതിവർഷം ഏകദേശം 700 കോടി രൂപ ലാഭിക്കാൻ സാധിക്കുന്നുണ്ടെന്ന് വ്യക്തമാക്കി. കൂടാതെ കുസും പദ്ധതിയിലൂടെ 30 ലക്ഷത്തിലധികം കർഷകർക്ക് സോളാർ ജലസേചന സംവിധാനങ്ങൾ നൽകുകയും ഓരോ സോളാർ പമ്പ് ഗുണഭോക്താവിനും പ്രതിവർഷം ഒരു ലക്ഷത്തോളം രൂപ ലാഭിക്കാൻ സാധിക്കുകയും ചെയ്തു. ജലാശയങ്ങൾ, കുളങ്ങൾ, തടാകങ്ങൾ എന്നിവയ്ക്ക് മുകളിൽ സോളാർ പാനലുകൾ സ്ഥാപിക്കുന്ന പി.എം സൂര്യ സരോവർ യോജനയെക്കുറിച്ചും അദ്ദേഹം പരാമർശിച്ചു. ഇത് ഭൂമി ഏറ്റെടുക്കൽ ചെലവ് ലാഭിക്കുന്നതിനും ജലാശയങ്ങളെ ഫലപ്രദമായി പ്രയോജനപ്പെടുത്തുന്നതിനും സഹായിക്കുന്നു. “ഇന്ത്യ സൗരോർജ്ജത്തെ പൗരന്മാരുടെ ജീവിതത്തിന്റെ ഭാഗമാക്കുകയാണ്,” ശ്രീ മോദി വ്യക്തമാക്കി.

ഇന്ത്യയുടെ ശുദ്ധോർജ്ജ സംവിധാനം ജലം, സൗരോർജ്ജം, കാറ്റ്, ആണവോർജ്ജം എന്നിവയ്ക്ക് അപ്പുറത്തേക്ക് വ്യാപിക്കുന്നുവെന്ന് വ്യക്തമാക്കിയ പ്രധാനമന്ത്രി, ഈ ദശകത്തിന്റെ അവസാനത്തോടെ 50 ലക്ഷം ടൺ ഗ്രീൻ ഹൈഡ്രജൻ ഉത്പാദിപ്പിക്കുന്നതിനും ഗതാഗത മേഖലയിൽ ഗ്രീൻ ഹൈഡ്രജൻ ഉപയോഗിക്കുന്നതിനുമായി നാഷണൽ ഗ്രീൻ ഹൈഡ്രജൻ മിഷന് കീഴിൽ രാജ്യം മിഷൻ മോഡിൽ മുന്നേറുകയാണെന്ന് വിശദീകരിച്ചു. “ഏതാനും മാസങ്ങൾക്ക് മുമ്പ് ഇന്ത്യ അതിന്റെ ആദ്യത്തെ ഗ്രീൻ ഹൈഡ്രജൻ ട്രെയിൻ ആരംഭിച്ചു,” പ്രധാനമന്ത്രി മോദി ചൂണ്ടിക്കാട്ടി.

ഉയർന്ന ഉത്പാദനമുള്ള സോളാർ, കാറ്റാടി മേഖലകളിൽ നിന്ന് കുറഞ്ഞ ഉത്പാദനമുള്ള പ്രദേശങ്ങളിലേക്ക് ഊർജ്ജ വിതരണം ഫലപ്രദമായി നടപ്പിലാക്കണമെന്ന് അംഗീകരിച്ച പ്രധാനമന്ത്രി, എങ്കിൽ മാത്രമേ രാജ്യത്തുടനീളമുള്ള വീടുകൾക്കും കൃഷിയിടങ്ങൾക്കും വ്യവസായങ്ങൾക്കും ഒരുപോലെ പ്രയോജനം ലഭിക്കൂവെന്ന് വ്യക്തമാക്കി. അഞ്ച് പ്രാദേശിക ഗ്രിഡുകളെ ഒറ്റ ഫ്രീക്വൻസിയിലേക്ക് സംയോജിപ്പിച്ച ‘ഒരു രാജ്യം, ഒരു പവർ ഗ്രിഡ്’ ശൃംഖലയുടെ പിന്തുണയോടെ പ്രത്യേക ട്രാൻസ്മിഷൻ ലൈനുകളും സബ്‌സ്റ്റേഷനുകളും ഉൾപ്പെടുന്ന ഹരിത ഊർജ്ജ ഇടനാഴികളുടെ വികസനം അദ്ദേഹം എടുത്തുപറഞ്ഞു. ഈ ട്രാൻസ്മിഷൻ അടിസ്ഥാന സൗകര്യങ്ങൾ കൂടുതൽ ശക്തിപ്പെടുത്തുന്നതിനായി രാജ്യം ഇപ്പോൾ അടുത്ത ഘട്ടത്തിലേക്ക് കടക്കുകയാണെന്നും അദ്ദേഹം കൂട്ടിച്ചേർത്തു. “അടുത്തിടെ ഇതിനായി ഏകദേശം 2 ലക്ഷം കോടി രൂപയുടെ നിക്ഷേപം ഇന്ത്യ ലക്ഷ്യമിട്ടിട്ടുണ്ട്,” ശ്രീ മോദി പറഞ്ഞു.

ചെറിയ സോളാർ ഘടകങ്ങൾക്ക് പോലും പൂർണ്ണമായും ഇറക്കുമതിയെ ആശ്രയിച്ചിരുന്ന കാലത്തിന് ശേഷം ആഭ്യന്തര ഉൽപ്പാദനത്തിലുണ്ടായ വൻ കുതിച്ചുചാട്ടമാണ് ഇന്ത്യയുടെ ഹരിത ഊർജ്ജ വിജയത്തിന് കാരണമെന്ന് ചൂണ്ടിക്കാട്ടിയ പ്രധാനമന്ത്രി, ഒരു ദശകം മുമ്പ് 2 ജിഗാവാട്ട് മാത്രമായിരുന്ന സോളാർ മോഡ്യൂൾ നിർമ്മാണ ശേഷി ഇന്ന് 200 ജിഗാവാട്ടിലധികമായി ഉയർന്നതായി വ്യക്തമാക്കി. ഇതിനൊപ്പം ഏകദേശം 40 ജിഗാവാട്ട് സോളാർ സെൽ ശേഷിയും മറ്റ് ഘടകങ്ങളുടെ വർധിച്ചുവരുന്ന ഉത്പാദനവും നടക്കുന്നുണ്ടെന്നും അദ്ദേഹം പറഞ്ഞു. “അതായത്, ഹരിത ഊർജ്ജവുമായി ബന്ധപ്പെട്ട ഇന്ത്യയുടെ ലക്ഷ്യങ്ങൾ നമ്മുടെ ആത്മനിർഭർ ഭാരത് പ്രചാരണത്തിന്റെയും മേക്ക് ഇൻ ഇന്ത്യ പ്രചാരണത്തിന്റെയും വിജയത്തിന്റെ തെളിവ് കൂടിയാണ്,” പ്രധാനമന്ത്രി മോദി ഉറപ്പിച്ചുപറഞ്ഞു.

കൈവരിച്ച നേട്ടങ്ങളിൽ മാത്രം ഒതുങ്ങാതെ രാജ്യം വേഗത്തിലുള്ള പുരോഗതി നിലനിർത്തണമെന്ന് ഊന്നിപ്പറഞ്ഞ പ്രധാനമന്ത്രി, എല്ലാ ​ഗവൺമെന്റ് കെട്ടിടങ്ങളും സ്‌കൂളുകളും കോളേജുകളും ആശുപത്രികളും തെരുവുവിളക്ക് ശൃംഖലകളും സൗരോർജ്ജവുമായി വേഗത്തിൽ ബന്ധിപ്പിക്കണമെന്ന് ആഹ്വാനം ചെയ്തു. മികച്ച പ്രകടനം കാഴ്ചവെക്കുന്നവർക്ക് പ്രോത്സാഹനം നൽകുന്നതിനും പ്രാദേശിക വിജയ​ഗാഥകളിൽ നിന്ന് പരസ്പരം പഠിക്കുന്നതിനുമായി സംസ്ഥാനങ്ങൾക്കും തദ്ദേശ സ്വയംഭരണ സ്ഥാപനങ്ങൾക്കുമിടയിൽ ആരോഗ്യകരമായ മത്സരം വളർത്തിയെടുക്കണമെന്ന് അദ്ദേഹം നിർദ്ദേശിച്ചു. “നമുക്ക് ഈ ജോലി വേഗത്തിൽ ചെയ്യേണ്ടതുണ്ട്,” ശ്രീ മോദി ഉറപ്പിച്ചുപറഞ്ഞു.

ലക്ഷക്കണക്കിന് സോളാർ പമ്പുകൾ വിതരണം ചെയ്യുന്നതിനപ്പുറത്തേക്ക് കൃഷി ചെയ്യാത്ത തരിശുഭൂമികൾ പ്രയോജനപ്പെടുത്തുന്ന രീതിയിലേക്ക് മാറണമെന്ന് കൃഷിയിൽ സൗരോർജ്ജം വിപുലീകരിക്കുന്നതിനായി പ്രത്യേക നിർദ്ദേശം മുന്നോട്ടുവെച്ചുകൊണ്ട് പ്രധാനമന്ത്രി അഭ്യർത്ഥിച്ചു. പരമാവധി ഗ്രാമങ്ങളിലെ കർഷകരെ അവരുടെ തരിശുഭൂമികളിലും കൃഷിയിടങ്ങളുടെ അതിരുകളിലും സോളാർ പാനലുകൾ സ്ഥാപിക്കാൻ പ്രോത്സാഹിപ്പിക്കേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു. “നമ്മൾ സോളാർ പമ്പുകൾക്കപ്പുറത്തേക്ക് ചിന്തിക്കേണ്ടതുണ്ട്,” പ്രധാനമന്ത്രി മോദി അഭിപ്രായപ്പെട്ടു.

സൗരോർജ്ജ വിപ്ലവത്തിന്റെ ഈ പുതുയുഗം അത് നടപ്പിലാക്കുന്നതിൽ എത്രത്തോളം കേന്ദ്രീകരിക്കുന്നുവോ അത്രത്തോളം തന്നെ നവീനാശയങ്ങളെയും ‌ആശ്രയിച്ചാണ് നിലനിൽക്കുന്നതെന്ന് വ്യക്തമാക്കിയ പ്രധാനമന്ത്രി, ഇറക്കുമതി ചെയ്യുന്ന പാചകവാതകത്തെ ആശ്രയിക്കുന്നത് കുറയ്ക്കുന്നതിനുള്ള പുരപ്പുറ സോളാർ പാചക രീതികളും ഇലക്ട്രിക് ഇരുചക്ര വാഹനങ്ങൾക്കും കാറുകൾക്കുമുള്ള ഹോം സോളാർ ചാർജിംഗും ഉൾപ്പെടെ, വീടുകളിലെ പരമാവധി ആവശ്യങ്ങൾ നിറവേറ്റാൻ ശേഷിയുള്ള, എല്ലാ കാലാവസ്ഥയിലും 24 മണിക്കൂറും പ്രവർത്തിക്കുന്ന സോളാർ മോഡലുകൾ രൂപകൽപ്പന ചെയ്യാൻ സ്റ്റാർട്ടപ്പുകളോടും ഐ.ഐ.ടി-കളോടും നവീനാശയവക്താക്കളോടും സംരംഭകരോടും അഭ്യർത്ഥിച്ചു. “ഇതിലൂടെ രാജ്യത്തെ ഇടത്തരം കുടുംബങ്ങൾക്ക് പ്രതിവർഷം ആയിരക്കണക്കിന് രൂപ ലാഭിക്കാൻ സാധിക്കും,” ശ്രീ മോദി ചൂണ്ടിക്കാട്ടി.

ഗ്രാമീണ അനുബന്ധ മേഖലകളിൽ പ്രത്യേക ശുദ്ധോർജ്ജ സംവിധാനങ്ങൾ നടപ്പിലാക്കേണ്ടതിന്റെ ആവശ്യകത എടുത്തുകാണിച്ച പ്രധാനമന്ത്രി, ക്ഷീരമേഖലയിൽ സൗരോർജ്ജ ഉപയോഗം പ്രോത്സാഹിപ്പിക്കുന്നതിനായി സോളാർ ഉൽപന്നങ്ങൾ വികസിപ്പിക്കണമെന്ന് ആഹ്വാനം ചെയ്തു. “കാലിത്തീറ്റ നിർമ്മാണം, വിളവെടുപ്പ്, വിളവെടുപ്പിന് ശേഷമുള്ള പ്രവർത്തനങ്ങൾ എന്നിവയുമായി ബന്ധപ്പെട്ട ഓരോ ജോലിക്കുമായി പ്രത്യേക സോളാർ ഉപകരണങ്ങൾ വികസിപ്പിച്ചെടുക്കണം,” പ്രധാനമന്ത്രി മോദി ഉറപ്പിച്ചുപറഞ്ഞു.

ഈ ലക്ഷ്യങ്ങൾ കൈവരിക്കുന്നതിന് പുതുതലമുറ നവീനാശയങ്ങളും തദ്ദേശീയമായി വികസിപ്പിച്ച സ്റ്റോറേജ് ഹാർഡ്‌വെയറുകളും പുതിയ ബാറ്ററി സ്റ്റോറേജ് ശേഷിയും ആവശ്യമാണെന്ന് ഊന്നിപ്പറഞ്ഞ പ്രധാനമന്ത്രി, ഈ ആവശ്യകത ഇന്ത്യയിലെ യുവാക്കൾക്ക് മുന്നിലുള്ള വലിയ അവസരമാണെന്ന് വിശേഷിപ്പിക്കുകയും ഈ അവസരം പ്രയോജനപ്പെടുത്താൻ ഗവേഷകരോടും നിക്ഷേപകരോടും അഭ്യർത്ഥിക്കുകയും ചെയ്തു. “ഇന്ത്യയിൽ നിങ്ങൾ തയ്യാറാക്കുന്ന പരിഹാരങ്ങൾ ലോകത്തിലെ നിരവധിയായ മറ്റ് രാജ്യങ്ങൾക്കും ഉപയോ​ഗപ്രദമാകും,” ശ്രീ മോദി ഉറപ്പിച്ചുപറഞ്ഞു.

ലോകത്തിലെ ഏറ്റവും വലിയ യുവജനസംഖ്യയുള്ള രാജ്യങ്ങളിലൊന്നായ ഇന്ത്യയിൽ, ശുദ്ധോർജ്ജവുമായി ബന്ധപ്പെട്ട ഓരോ പദ്ധതിയും പാനലുകളുടെയും ഹാർഡ്‌വെയറുകളുടെയും നിർമ്മാണം, ഇൻസ്റ്റാളേഷൻ, സർവീസിംഗ്, ഗതാഗതം എന്നിവയിലുടനീളം ആയിരക്കണക്കിന് തൊഴിലവസരങ്ങൾ സൃഷ്ടിക്കുന്നുണ്ടെന്ന് ചൂണ്ടിക്കാണിച്ച പ്രധാനമന്ത്രി, സോളാർ ശേഷിയുടെ കൂടുതൽ വിപുലീകരണം സാമ്പത്തിക മേഖലയിലുടനീളം തൊഴിലവസരങ്ങൾ ഇരട്ടിപ്പിക്കുമെന്ന് വ്യക്തമാക്കി. “അടുപ്പ് മുതൽ യാത്രാമാർഗ്ഗങ്ങൾ വരെ എല്ലാം സൗരോർജ്ജത്തിലും ഹരിത ഊർജ്ജത്തിലും പ്രവർത്തിക്കുന്നതായി മാറുമ്പോൾ ഒരു പുതിയ വ്യവസായം തന്നെ ഇവിടെ സൃഷ്ടിക്കപ്പെടും,” പ്രധാനമന്ത്രി മോദി നിരീക്ഷിച്ചു.

ഇന്ത്യയുടെ സമാനതകളില്ലാത്ത ആവശ്യകത, വ്യാപ്തി, ശേഷി, രാഷ്ട്രീയ-നയ സ്ഥിരത എന്നിവ പ്രയോജനപ്പെടുത്താൻ ആഗോള നിക്ഷേപകരെ ക്ഷണിച്ചുകൊണ്ട്, പുനരുപയോഗ ഊർജ്ജ മേഖല കഴിഞ്ഞ ഒരു ദശകത്തിനിടയിൽ 15 ലക്ഷം കോടി രൂപ അഥവാ 164 ബില്യൺ ഡോളറിലധികം നിക്ഷേപം ആകർഷിച്ചതായി പ്രധാനമന്ത്രി ചൂണ്ടിക്കാട്ടി. ഇതിൽ 6 ലക്ഷം കോടി രൂപ അഥവാ 63 ബില്യൺ ഡോളറിലധികം നിക്ഷേപം എത്തിയത് 2024-ലെ ആർ.ഇ-ഇൻവെസ്റ്റ് (RE-INVEST) ഉച്ചകോടിക്ക് ശേഷമുള്ള കഴിഞ്ഞ രണ്ട് വർഷങ്ങളിൽ മാത്രമാണ്. കൂടാതെ ഈ ദശകത്തിന്റെ അവസാനത്തോടെ നിക്ഷേപ അവസരങ്ങൾ 20 ലക്ഷം കോടി രൂപ അഥവാ 220 ബില്യൺ ഡോളർ കവിയുമെന്നും പ്രവചിക്കപ്പെടുന്നു. “അതുകൊണ്ട് നിങ്ങൾക്കെല്ലാവർക്കും ഇന്ത്യയുടെ ശുദ്ധോർജ്ജ മേഖലയിൽ അവസരങ്ങളുടെ ഒരു പുതിയ ആകാശം തന്നെയാണ് തുറക്കപ്പെടാൻ പോകുന്നത്,” ശ്രീ മോദി ഉറപ്പിച്ചുപറഞ്ഞു.

രാജ്യത്തിൻ്റെ ശുദ്ധോർജ്ജ യാത്രയുടെയും അന്താരാഷ്ട്ര സൗരോർജ്ജ സഖ്യത്തിന്റെയും അടിത്തറയായ ‘ഒരു ഭൂമി, ഒരു കുടുംബം, ഒരു ഭാവി’ എന്ന ഇന്ത്യയുടെ ആഗോള സന്ദേശം അനുസ്മരിച്ചുകൊണ്ട്, സഹായം ആവശ്യമുള്ള എല്ലാ രാജ്യങ്ങളിലും ആവശ്യമായ ധനസഹായവും സാങ്കേതികവിദ്യയും വൈദഗ്ധ്യവും എത്തുന്നുണ്ടെന്ന് ഉറപ്പാക്കാൻ രാജ്യം പ്രതിജ്ഞാബദ്ധമാണെന്ന് പ്രധാനമന്ത്രി പ്രസ്താവിച്ചു. “അതുകൊണ്ട് ആഫ്രിക്കയ്ക്കായി 200 മില്യൺ ഡോളറിന്റെ ‘ആഫ്രിക്ക സോളാർ ഫെസിലിറ്റി’ എന്നൊരു നിർദ്ദേശം മുന്നോട്ടുവെച്ചിട്ടുണ്ട്,” പ്രധാനമന്ത്രി മോദി ചൂണ്ടിക്കാട്ടി.

ആഗോള കാലാവസ്ഥാ ലക്ഷ്യങ്ങൾക്ക് വരും ദശകം നിർണായകമാണെന്ന് ഊന്നിപ്പറഞ്ഞ പ്രധാനമന്ത്രി, ആശംസകൾ നേരുന്നതിന് മുമ്പ്, ഓരോ രാജ്യത്തെയും മേഖലയെയും ഈ മാറ്റവുമായി ബന്ധിപ്പിച്ചുകൊണ്ട് ഭാവി സുരക്ഷിതമാക്കുന്നതിൽ ഉച്ചകോടിയിൽ പങ്കെടുത്തവർ പ്രധാന പങ്ക് വഹിക്കുമെന്ന ആത്മവിശ്വാസം പ്രകടിപ്പിച്ചു. “എങ്കിൽ മാത്രമേ നമുക്ക് ഒരു ശുചിത്വ ഭാവിയും ഒരു ഹരിത ഭാവിയും ഒരു സുരക്ഷിത ഭാവിയും കെട്ടിപ്പടുക്കാൻ സാധിക്കൂ,” ശ്രീ മോദി ഉറപ്പിച്ചുപറഞ്ഞു.

Speaking at the Bharat Renewable Energy Summit in Delhi. Watch my speech. https://t.co/09hT8k2qmU

— Narendra Modi (@narendramodi) November 2, 2026

पिछले कुछ वर्षों से Global Economy ने अभूतपूर्व संकट देखे हैं।

कोरोना की महामारी से लेकर West Asia Crisis तक…दुनिया ने कई बड़े संकटों का सामना किया है।

और West Asia का संकट तो अभी भी जारी है…लेकिन 140 करोड़ भारतीयों को इस बात का गर्व है कि हमने अब तक इस संकट को बेहतर तरीके से संभाला है और इस संकट के बावजूद भी भारत की growth high रही है: PM @narendramodi

— PMO India (@PMOIndia) November 2, 2026

Energy Security का future Clean Energy में है: PM @narendramodi

— PMO India (@PMOIndia) November 2, 2026

सौर क्रांति का ये नया दौर केवल adoption का नहीं है…ये innovation पर भी निर्भर है।

इसलिए मैं अपने Startups से, IITs, innovators और Entrepreneurs से विशेष आग्रह करुंगा…आप आगे आएं…आप ऐसे model बनाएं जहां एक परिवार की ज्यादा से ज्यादा जरूरतें solar power से पूरी हों: PM @narendramodi

— PMO India (@PMOIndia) November 2, 2026

-SK-