پی ایم انڈیا

نمسکار!

مرکزی کابینہ کے میرے ساتھیو، گوا کے وزیر اعلیٰ، دیگر وزراء، سفیرو، سی ای اوز، معزز مہمانوں، اور دیگر تمام معززین، خواتین و حضرات!

انرجی ویک کے اس نئے ایڈیشن کے لیے دنیا بھر کے تقریباً 125 ممالک کے مندوبین گوا میں جمع ہوئے ہیں۔ آپ توانائی کے محفوظ اور پائیدار مستقبل پر بات کرنے کے لیے ہندوستان آئے ہیں۔ میں آپ سب کو خوش آمدید کہتا ہوں اور مبارکباد پیش کرتا ہوں۔

دوستو،

انڈیا انرجی ویک بہت کم وقت میں بات چیت اور عمل کے لیے ایک عالمی پلیٹ فارم کے طور پر ابھرا ہے۔ آج ہندوستان توانائی کے شعبے کے لیے بے پناہ مواقع کی سرزمین ہے۔ ہندوستان دنیا کی سب سے تیزی سے ترقی کرنے والی بڑی معیشت ہے۔ اس کا مطلب ہے کہ توانائی کی مصنوعات کی مانگ میں مسلسل اضافہ ہو رہا ہے۔ اسکے علاوہ، ہندوستان عالمی مانگ کو پورا کرنے کے لیے بہترین مواقع فراہم کرتا ہے۔ آج، ہم دنیا میں پیٹرولیم مصنوعات کے سرفہرست پانچ برآمد کنندگان میں سے ایک ہیں۔ ہماری برآمدی کوریج 150 سے زیادہ ممالک تک پھیلی ہوئی ہے۔ ہندوستان کی یہ صلاحیت آپ کے لیے بہت کام آئے گی۔ لہذا، یہ انرجی ویک پلیٹ فارم ہماری شراکتوں کو دریافت کرنے کے لیے ایک بہترین جگہ ہے۔ میں آپ کے لیے نیک خواہشات کا اظہار کرتا ہوں۔

دوستو،

اپنی بات آگے بڑھانے سے پہلے، میں ایک اہم پیش رفت پر بات کرنا چاہوں گا۔ ابھی کل ہی ہندوستان اور یورپی یونین کے درمیان ایک اہم معاہدے پر دستخط ہوئے۔ دنیا بھر میں لوگ اسے ’’مدر آف آل ڈیلز‘‘ کے طور پر زیر بحث لا رہے ہیں۔ یہ معاہدہ ہندوستان کے 140 کروڑلوگوں اور یورپی ممالک میں لاکھوں لوگوں کے لیے بے پناہ مواقع فراہم کرتا ہے۔ یہ  معاہدہ دنیا کی دو بڑی معیشتوں کے درمیان تعاون کی ایک روشن مثال بن گیاہے۔ یہ معاہدہ عالمی جی ڈی پی کا تقریباً 25 فیصد اور عالمی تجارت کا تقریباً ایک تہائی حصہ ہے۔ یہ معاہدہ تجارت کے ساتھ ساتھ جمہوریت اور قانون کی حکمرانی کے لیے ہمارے مشترکہ عزم کو مضبوط کرتا ہے۔

دوستو،

ای یو کے ساتھ یہ آزادانہ تجارتی معاہدہ برطانیہ اور ایپٹا کے معاہدوں کی تکمیل کرے گا۔ اس سے تجارت اور عالمی سپلائی چین دونوں مضبوط ہوں گے۔ میں اس کے لیے ہندوستان کے نوجوانوں اور اپنے تمام ہم وطنوں کو مبارکباد دیتا ہوں۔ میں ٹیکسٹائل، جواہرات اور زیورات، چمڑے اور جوتے سمیت تمام شعبوں سے تعلق رکھنے والے اپنے ساتھیوں کو بھی مبارکباد دیتا ہوں۔ یہ معاہدہ آپ کے لیے بہت مددگار ثابت ہوگا۔

دوستو،

یہ تجارتی معاہدہ نہ صرف ہندوستان میں مینوفیکچرنگ کو فروغ دے گا بلکہ خدمات کے شعبے کو مزید وسعت دے گا۔ یہ آزاد تجارتی معاہدہ ہندوستان میں دنیا کے ہر کاروبار اور سرمایہ کار کا اعتماد مزید مضبوط کرے گا۔

دوستو،

ہندوستان اس وقت ہر شعبے میں عالمی شراکت داری پر بڑے پیمانے پر کام کر رہا ہے۔ اگر میں صرف توانائی کے شعبے  پر بات کروں تو توانائی کی ویلیو چین کے مختلف شعبوں میں سرمایہ کاری کے بے پناہ مواقع موجود ہیں۔ ریسرچ کا میدان لیں۔ ہندوستان نے اپنے تحقیق  و دریافت کے شعبے کو نمایاں طور پر کھول دیا ہے۔ آپ ہمارے سمندر منتھن مشن سے بھی واقف ہیں، جو گہرے سمندر کی تلاش سے متعلق ہے۔ ہم اس دہائی کے آخر تک اپنے تیل اور گیس کے شعبے میں سرمایہ کاری کو 100 بلین ڈالر تک بڑھانے کی کوشش کر رہے ہیں۔ ہمارا مقصد دریافت کے شعبے کو دس لاکھ مربع کلومیٹر تک پھیلانا ہے۔ اس ہدف کے ساتھ 170 سے زائد بلاک کو نوازا جا چکا ہے۔ انڈمان اور نکوبار طاس بھی ہماری اگلی ہائیڈرو کاربن امید بن رہا ہے۔

دوستو,

ہم نے  دریافت کے شعبے میں بھی اہم اصلاحات نافذ کی ہیں۔ ناقابل رسائی خطے میں نمایاں کمی واقع ہوئی ہے۔ ہم نے انڈیا انرجی ویک کے پچھلے ایڈیشن میں آپ کی تجاویز کے جواب میں اپنے قوانین اورضوابط میں بھی تبدیلیاں کی ہیں۔ اگر آپ دریافت کے اس شعبے میں سرمایہ کاری کرتے ہیں تو آپ کی کمپنی کے منافع میں اضافہ یقینی ہے۔

دوستو،

ہندوستان کی ایک اور خصوصیت ہے جو توانائی کے شعبے میں سرمایہ کاری کو بہت منافع بخش بناتی ہے۔ ہمارے پاس ریفائننگ کی بہت بڑی صلاحیت ہے۔ ہم ریفائننگ کی صلاحیت کے لحاظ سے دنیا میں دوسرے نمبر پر ہیں۔ جلد ہی ہم دنیا میں پہلے نمبر پر ہوں گے۔ آج، ہندوستان کی ریفائننگ کی صلاحیت تقریباً ایم ایم ٹی پی اے 260ہے۔ اسے 300 ایم ایم ٹی پی اے تک بڑھانے کے لیے مسلسل کوششیں جاری ہیں۔ یہ سرمایہ کاروں کے لیے بہت بڑا فائدہ ہے۔

دوستو،

ہندوستان میں ایل این جی کی مانگ بھی مسلسل بڑھ رہی ہے۔ ہم نے اپنی توانائی کی کل طلب کا 15ایل این جی 15 فیصد سے پورا کرنے کا ہدف مقرر کیا ہے۔ لہذا، ہمیں پوری ایل این جی ویلیو چین میں کام کرنے کی ضرورت ہے۔ آج ہندوستان نقل و حمل پر بھی بڑے پیمانے پر کام کر رہا ہے۔ ہم ہندوستان میں ایل این جی کی نقل و حمل کے لیے درکار برتنوں کی تیاری کے لیے کام کر رہے ہیں۔ حال ہی میں ہندوستان میں ستر ہزار کروڑ روپے کا جہاز بنانے کا پروگرام شروع کیا گیا ہے۔ اسکے علاوہ، ملک کی بندرگاہوں پر ایل این جی کے ٹرمینلز کی تعمیر میں سرمایہ کاری کے بے شمار مواقع موجود ہیں۔ ری گیسی فیکیشن کے منصوبوں میں آپ کے لیے سرمایہ کاری کے اہم مواقع بھی موجود ہیں۔

دوستو،

بھارت کو اب ایل این جی کی نقل و حمل کے لیے ایک بڑی پائپ لائن کی ضرورت ہے۔ ہم نے پچھلے کچھ سالوں میں اس ضمن میں بہت زیادہ سرمایہ کاری کی ہے۔ تاہم اب بھی بڑے پیمانے پر سرمایہ کاری کے امکانات موجود ہیں۔ آج، سٹی گیس ڈسٹری بیوشن نیٹ ورک ہندوستان کے کئی شہروں تک پہنچ چکے ہیں، اور ہم انہیں تیزی سے دوسرے شہروں تک پھیلا رہے ہیں۔ سٹی گیس کی تقسیم بھی آپ کی سرمایہ کاری کے لیے ایک بہت پرکشش شعبہ ہے۔

دوستو،

ہندوستان میں اتنی بڑی آبادی ہے اور ہماری معیشت مسلسل ترقی کر رہی ہے۔ ہندوستان میں پیٹرو کیمیکل مصنوعات کی مانگ بھی بتدریج بڑھنے کی امید ہے۔ لہذا، ہمیں توانائی کے ایک بڑے ڈھانچے کی ضرورت ہوگی، اور اس میں آپ کی سرمایہ کاری بھی نمایاں ترقی فراہم کرے گی۔ اس کے علاوہ، ہندوستان میں آپ کے لیے ترسیل و تقسیم سے متعلق سرگرمیوں میں سرمایہ کاری کے بہت سے مواقع موجود ہیں۔

دوستو،

آج کا ہندوستان ریفارم ایکسپریس پر سوار ہے اور ہر شعبے میں تیزی سے اصلاحات نافذ کر رہا ہے۔ ہم گھریلو ہائیڈرو کاربن کو مضبوط بنانے اور عالمی تعاون کے لیے ایک شفاف اور سرمایہ کار دوست ماحول پیدا کرنے کے لیے اصلاحات نافذ کر رہے ہیں۔ ہندوستان اب توانائی کے تحفط سے آگے بڑھ رہا ہے اور توانائی کی آزادی کے مشن پر کام کر رہا ہے۔ ہندوستان توانائی کے شعبے کا ایک ماحولیاتی نظام تیار کر رہا ہے جو ہندوستان کی مقامی مانگ کو پورا کر سکتا ہے اور سستی ریفائننگ اور نقل و حمل کے حل کے ذریعے دنیا کو انتہائی مسابقتی برآمدات کو یقینی بناتا ہے۔

دوستو،

ہمارا توانائی کا شعبہ ہماری خواہشات کا مرکز ہے۔ اس کے پاس500 بلین  ڈالر کیسرمایہ کاری کے مواقع ہیں۔ اس لیے، میری  اپیل ہے: میک ان انڈیا، انوویٹ ان انڈیا، اسکیل ود انڈیا، انویسٹ ان انڈیا۔ اس خواہش کے ساتھ، میں آپ سب کو انڈیا انرجی ویک کی بہت بہت مبارکباد دیتا ہوں۔

بہت بہت شکریہ۔

***

(ش ح۔ ع و۔ ا ش ق)

URDU-1121